GST 2.0 : ఈరోజు నుండి కొత్త స్లాబ్లు ..ఈరోజే ఎందుకు అంటే ..!!
GST 2.0 : నేటి నుంచి (సెప్టెంబర్ 22, 2025) కొత్త జీఎస్టీ స్లాబ్లు అమలులోకి వచ్చాయి. ఇప్పటి వరకు ఉన్న నాలుగు స్లాబ్లలో 12% మరియు 28%లను తొలగించి, 5% మరియు 18% స్లాబ్లను మాత్రమే కొనసాగించారు
- Author : Sudheer
Date : 22-09-2025 - 10:45 IST
Published By : Hashtagu Telugu Desk
భారతదేశంలో వస్తువులు, సేవల పన్ను (GST) అమలులోకి వచ్చిన 2017 నుండి ఇప్పటివరకు ఇది అత్యంత పెద్ద పన్ను సంస్కరణగా పరిగణించబడుతోంది. నేటి నుంచి (సెప్టెంబర్ 22, 2025) కొత్త జీఎస్టీ స్లాబ్లు అమలులోకి వచ్చాయి. ఇప్పటి వరకు ఉన్న నాలుగు స్లాబ్లలో 12% మరియు 28%లను తొలగించి, 5% మరియు 18% స్లాబ్లను మాత్రమే కొనసాగించారు. అదనంగా లగ్జరీ వస్తువులు, పొగాకు ఉత్పత్తులు, ప్రైవేట్ విమానాలు, యాచ్లు వంటి వస్తువులపై 40% ప్రత్యేక జీఎస్టీ విధించారు. ఈ మార్పులు ప్రజల వినియోగ ఖర్చు తగ్గించే దిశగా, అలాగే పన్ను వ్యవస్థను సరళీకరించే దిశగా తీసుకున్న నిర్ణయాలు అని కేంద్రం తెలిపింది. ముఖ్యంగా లైఫ్ ఇన్సూరెన్స్, టర్మ్ ఇన్సూరెన్స్ వంటి పాలసీలపై జీఎస్టీని పూర్తిగా తొలగించడం ప్రజలకు ఊరట కలిగించే నిర్ణయంగా మారింది.
Superwood: ఉక్కును మించిన సూపర్వుడ్.. భవిష్యత్ నిర్మాణాలకు కొత్త దారిదీపం
ఈ మార్పుల వెనుక ప్రభుత్వం తీసుకున్న సమయం కూడా ప్రాముఖ్యత సంతరించుకుంది. సెప్టెంబర్ 22వ తేదీ నవరాత్రి పండుగ ప్రారంభం కావడంతో, దేశ ఆర్థిక వ్యవస్థకు ఇది శుభారంభం అవుతుందని భావించి ఈ రోజు నుంచి జీఎస్టీ కొత్త స్లాబ్లు అమలు చేస్తున్నామని ఆర్థిక మంత్రిత్వ శాఖ వెల్లడించింది. గత 56వ GST కౌన్సిల్ సమావేశంలోనే ఈ నిర్ణయాలు తీసుకున్నట్లు కేంద్ర ఆర్థిక మంత్రి నిర్మలా సీతారామన్ ప్రకటించారు. ఈ క్రమంలో 295 రకాల వస్తువులపై పన్ను రేట్లు తగ్గించగా, మరికొన్ని వస్తువులపై పూర్తిగా జీఎస్టీని ఎత్తివేశారు. దీంతో వినియోగదారులకు ప్రత్యక్ష లాభం చేకూరనుంది.
నవరాత్రి మొదటి రోజు నుంచి అమలులోకి వచ్చిన ఈ కొత్త స్లాబ్ల వల్ల సాధారణ ప్రజలు, రైతులు, విద్యార్థులు, గృహిణీలు, పరిశ్రమలు ఇలా ప్రతి వర్గానికీ లాభాలు చేరనున్నాయి. విద్యార్థులకు అవసరమైన స్టేషనరీ వస్తువులపై జీఎస్టీ మినహాయింపు, పాల ఉత్పత్తులపై తక్కువ పన్ను, గృహ వినియోగ వస్తువులపై 12% నుంచి 5%కి తగ్గింపు ప్రజల గృహ వ్యయాన్ని తగ్గించనున్నాయి. వాహనాలు, టీవీలు, ఫ్రిజ్లు, వాషింగ్ మిషన్లు వంటి వస్తువులు కూడా తక్కువ రేటుకు దొరకనున్నాయి. మరోవైపు, స్టీల్, సిమెంట్పై పన్ను తగ్గించడం గృహనిర్మాణ రంగానికి ఊతమివ్వనుంది. అలాగే సోలార్ ప్యానెల్స్, విండ్ మిల్స్పై జీఎస్టీని 5%కు తగ్గించడం పునరుత్పాదక శక్తి వినియోగాన్ని మరింత ప్రోత్సహిస్తుంది. ఈ నిర్ణయాలన్నీ కలిపి చూస్తే, కొత్త జీఎస్టీ స్లాబ్లు దేశ ఆర్థిక వ్యవస్థను చురుకుగా మార్చడమే కాకుండా ప్రజలకు మరింత సులభమైన జీవన విధానం అందించనున్నాయి.
Follow us
