Social Media : 10 కోట్ల ఫాలోవర్లతో ఇన్స్టాలో మోదీ రికార్డ్

PM Modi

Modi Instagram : సోషల్ మీడియా దిగ్గజం ఇన్స్టాగ్రామ్ (Instagram) వేదికగా భారత ప్రధానమంత్రి నరేంద్ర మోదీ సరికొత్త రికార్డును సృష్టించారు. 2026 ఫిబ్రవరి నాటికి ఆయన ఫాలోవర్ల సంఖ్య 10 కోట్లు (100 మిలియన్లు) మార్కును దాటింది. ఈ ఘనత సాధించిన తొలి ప్రపంచ నాయకుడిగా మోదీ చరిత్రకెక్కారు. 2014లో ఈ ప్లాట్‌ఫామ్‌లోకి ప్రవేశించిన నాటి నుండి, ఆయన తన పోస్ట్‌ల ద్వారా ప్రజలతో, ముఖ్యంగా యువతతో నిరంతరం అనుసంధానమవుతూ వస్తున్నారు. కేవలం రాజకీయ నేతగానే కాకుండా, అత్యధిక ఫాలోయింగ్ కలిగిన గ్లోబల్ సెలబ్రిటీల సరసన ఆయన నిలవడం విశేషం.

ప్రపంచవ్యాప్తంగా ఇతర దేశాల నేతలతో పోలిస్తే మోదీ హవా స్పష్టంగా కనిపిస్తోంది. ప్రస్తుత గణాంకాల ప్రకారం, అమెరికా అధ్యక్షుడు డొనాల్డ్ ట్రంప్ 4.32 కోట్ల ఫాలోవర్లతో రెండో స్థానంలో ఉండగా, ప్రధాని మోదీ ఆయన కంటే రెట్టింపు కంటే ఎక్కువ ఫాలోయింగ్‌ను కలిగి ఉన్నారు. వీరి తర్వాత ఇండోనేషియా అధ్యక్షుడు ప్రబోవో సుబియాంతో (1.5 కోట్లు), బ్రెజిల్ అధ్యక్షుడు లూలా (1.44 కోట్లు), టర్కీ అధ్యక్షుడు ఎర్డోగాన్ (1.16 కోట్లు) తర్వాతి స్థానాల్లో ఉన్నారు. టాప్-5లో ఉన్న మిగిలిన నలుగురు నేతల మొత్తం ఫాలోవర్ల సంఖ్యను కలిపినా, అది మోదీ ఒక్కరి ఫాలోయింగ్ కంటే తక్కువగా ఉండటం ఆయన గ్లోబల్ క్రేజ్‌కు నిదర్శనం.

ఈ రికార్డు మోదీకి డిజిటల్ దౌత్యంలో (Digital Diplomacy) ఉన్న పట్టును తెలియజేస్తుంది. కేవలం ఇన్స్టాగ్రామ్‌లోనే కాకుండా, గతంలోనే ఆయన ‘X’ (ట్విట్టర్) లో కూడా 10 కోట్ల మార్కును అందుకున్నారు. అలాగే యూట్యూబ్‌లో 2 కోట్ల మంది సబ్‌స్క్రైబర్లను కలిగిన ఏకైక ప్రపంచ నేతగా నిలిచారు. ఇటీవల వెలువడిన ‘మార్నింగ్ కన్సల్ట్’ సర్వేలో కూడా 67 శాతం అప్రూవల్ రేటింగ్‌తో అత్యంత ప్రజాదరణ పొందిన నాయకుడిగా మోదీ అగ్రస్థానంలో నిలిచారు. పాలకులకు, ప్రజలకు మధ్య ఉన్న దూరాన్ని తగ్గించడంలో సోషల్ మీడియాను మోదీ ఒక శక్తివంతమైన సాధనంగా మలుచుకున్నారని విశ్లేషకులు భావిస్తున్నారు.

Follow us