India’s first private sector rocket: అంతరిక్ష రంగంలో నూతన శకం.. ప్రయోగానికి సిద్దమైన తొలి ప్రైవేట్ రాకెట్..!

అంతరిక్ష రంగంలో హైదరాబాద్‌కు చెందిన స్పేస్ స్టార్టప్ స్కైరూట్ ఏరోస్పేస్ నూతన శకానికి నాంది పలకనుంది. త్వరలో అంతరిక్షంలోకి ప్రవేట్ రాకెట్‌ Vikram-Sను ప్రయోగించిన భారతదేశపు మొట్టమొదటి ప్రైవేట్ అంతరిక్ష సంస్థగా అవతరించనుంది. విక్రమ్-ఎస్ ను నవంబర్ 12 నుంచి 16 మధ్య తేదీలలో ప్రయోగానికి సిద్ధంగా ఉందని హైదరాబాద్‌కు చెందిన స్పేస్ స్టార్టప్ స్కైరూట్ ఏరోస్పేస్ తెలిపింది.

నవంబర్ 12-16 మధ్య మిషన్‌ను ప్రారంభించవచ్చని చెప్పినప్పటికీ.. చివరి ప్రయోగ తేదీ గురించి వారు ఇంకా ఎలాంటి వివరాలను విడుదల చేయలేదు. స్పేస్-టెక్ ప్లేయర్‌లను ప్రోత్సహించడం, నియంత్రించడం కోసం దేశంలోని నోడల్ ఏజెన్సీ అయిన IN-SPAce నుండి కంపెనీ ఇప్పటికే సాంకేతిక ప్రయోగ అనుమతిని పొందింది. స్కైరూట్ బిజినెస్ డెవలప్‌మెంట్ లీడ్ శిరీష్ పల్లికొండ మాట్లాడుతూ.. Vikram-S మూడు కస్టమర్ పేలోడ్‌లతో కూడిన రాకెట్ మిషన్‌ అని అన్నారు. “మేము లాంచ్ కోసం ఇంకా చివరి తేదీని ఖరారు చేయలేదు. అయితే విక్రమ్-ఎస్ నవంబర్ 12-16 మధ్య ప్రారంభించబడుతుంది” అని ఆయన చెప్పారు.

స్కైరూట్ ఏరోస్పేస్ తొలి మిషన్ కు ‘ప్రారంభ్’ అని ఇస్రో ఛైర్మన్ ఎస్ సోమనాథ్ పేరు పెట్టినట్లు స్కైరూట్ తెలిపింది. శ్రీహరికోటలోని భారత అంతరిక్ష పరిశోధన సంస్థ నుంచి ఈ రాకెట్ ను ప్రయోగించనున్నారు. ఇస్రో , ఇండియన్ నేషనల్ స్పేస్ ప్రమోషన్ అండ్ ఆథరైజేషన్ సెంటర్ (IN-SPAce) సహకారంతో స్కైరూట్ విక్రమ్-ఎస్ రాకెట్ మిషన్‌ను సిద్ధం చేయగలిగింది. స్కైరూట్ విక్రమ్ రాకెట్ మూడు వేరియంట్‌లను అభివృద్ధి చేస్తోంది.

విక్రమ్-I 480 కిలోగ్రాముల పేలోడ్‌ను లో ఎర్త్ ఆర్బిట్‌కు మోసుకెళ్లగలిగితే, విక్రమ్-II 595 కిలోగ్రాముల కార్గోతో లిఫ్ట్ చేయడానికి అమర్చబడింది. అదే సమయంలో విక్రమ్-III 815 కిలోల నుండి 500 కిమీ తక్కువ వంపు కక్ష్యతో ప్రయోగించగలదు. “శ్రీహరికోట నుండి మా మొదటి ప్రయోగ మిషన్ #ప్రారంభ్‌ను ప్రకటించినందుకు చాలా థ్రిల్‌గా ఉంది” అని స్కైరూట్ సహ వ్యవస్థాపకుడు పవన్ చందన ట్వీట్ చేశారు. స్పేస్‌ కిడ్జ్ఇండియా ఆధ్వర్యంలో భారతదేశంతో సహా అనేక దేశాల విద్యార్థులు అభివృద్ధి చేసిన 2.5 కిలోగ్రాముల పేలోడ్‌తో సహా మూడు పేలోడ్‌లను ఈ మిషన్ మోసుకెళ్లనుంది.