PM Modi : భారత్ ప్రపంచ హబ్‌గా మారుతుంది: ప్రధాని మోడీ

PM Modi

PM Modi : ఎలక్ట్రిక్ వాహనాల తయారీ, ఎగుమతుల రంగాల్లో భారత్ మరో కీలక మైలురాయిని అధిగమించింది. దేశీయంగా తయారైన ఈవీలు (ఎలక్ట్రిక్ వెహికల్స్) తొలిసారి 100 దేశాలకు ఎగుమతి కాబోతున్న నేపథ్యంలో ఇది ‘మేడ్ ఇన్ ఇండియా’ ఉద్యమానికి గర్వకారణంగా నిలిచింది. గుజరాత్‌లోని అహ్మదాబాద్ సమీపంలోని హన్సల్‌పూర్‌లో మంగళవారం జరిగిన ప్రత్యేక కార్యక్రమంలో ప్రధాని నరేంద్ర మోడీ ఈ ఎగుమతులకు అధికారికంగా జెండా ఊపారు. ఇదే వేదికపై, హైబ్రిడ్ వాహనాలకు అవసరమైన బ్యాటరీ ఎలక్ట్రోడ్‌లను భారత్‌లోనే ఉత్పత్తి చేసే ప్రక్రియను కూడా ఆయన ప్రారంభించడం విశేషం. ఈ సందర్భంగా మాట్లాడిన ప్రధాని మోడీ క్లీన్ ఎనర్జీ మరియు క్లీన్ మొబిలిటీ రంగాల్లో భారత్‌ను ప్రపంచ హబ్‌గా తీర్చిదిద్దేందుకు కేంద్ర ప్రభుత్వం ప్రణాళికాబద్ధంగా ముందుకెళ్తోందన్నారు. గతంలో ఈవీ వాహనాల కీలక భాగమైన బ్యాటరీలను పూర్తిగా విదేశాల నుండి దిగుమతి చేసుకునే పరిస్థితి ఉండేది. కానీ ఇప్పుడు పరిస్థితి మారుతోంది. మూడు ప్రముఖ జపాన్ సంస్థలు కలసి భారత్‌లో బ్యాటరీ సెల్స్, ఎలక్ట్రోడ్‌ల తయారీలో భాగస్వామ్యం అవుతున్నాయి. ఇది దేశీయంగా తయారవుతున్న హైబ్రిడ్ వాహనాలకు కొత్త ఊపునిస్తుంది అని మోడీ పేర్కొన్నారు.

భారత్-జపాన్ భాగస్వామ్యం, వాణిజ్యానికి దాటి, సంస్కృతికి స్పర్శ

ప్రధాని మోదీ భారత్-జపాన్ మధ్య బలమైన సంబంధాల పట్ల కూడా స్పష్టతతో స్పందించారు. ఈ బంధం కేవలం వ్యాపార పరిమితికి మాత్రమే కాదు, సాంస్కృతిక, చారిత్రక సంబంధాలకు ప్రతీకగా కూడా నిలుస్తోంది. సుజుకి సంస్థ ఇక్కడ కార్లు తయారు చేసి జపాన్‌కి ఎగుమతి చేస్తుండటం ద్వారా ఈ ద్వైపాక్షిక సంబంధాల బలం స్పష్టంగా తెలుస్తోంది. మారుతి-సుజుకితో ప్రారంభమైన ఈ ప్రయాణం ఇప్పుడు బుల్లెట్ ట్రైన్ వేగంతో ముందుకు సాగుతోంది అని ఆయన హర్షం వ్యక్తం చేశారు.

ఆర్థిక సంస్కరణలు, ఫలితాలపై ప్రధాని వ్యాఖ్యలు

గత దశాబ్ద కాలంలో కేంద్ర ప్రభుత్వం చేపట్టిన ఆర్థిక సంస్కరణలు ఇప్పుడు ఫలితాలివ్వడం గమనార్హం. ‘మేక్ ఇన్ ఇండియా’ ‘ఇజ్ ఆఫ్ డోయింగ్ బిజినెస్’ వంటి కార్యక్రమాల ద్వారా పెట్టుబడులకు అనుకూల వాతావరణాన్ని రూపొందించాం. లాజిస్టిక్స్ పార్కులు, పారిశ్రామిక కారిడార్ల ఏర్పాటుతో సమర్థవంతమైన సరఫరా వ్యవస్థను అందించాం. దీని ప్రభావంగా గత పదేళ్లలో ఎలక్ట్రానిక్ వస్తువుల తయారీ 500 శాతం పెరిగింది అని వివరించారు.

భవిష్యత్తు ప్రణాళికలు ,సెమీకండక్టర్లు, కీలక ఖనిజాలపై దృష్టి

భారత్ ఇకపై కూడా ఇదే దిశగా పురోగమిస్తుందని మోడీ స్పష్టంగా చెప్పారు. ఇది మొదటి అడుగే. ఇకపై సెమీకండక్టర్ల తయారీపై దృష్టి పెడతాం. ఇప్పటికే ఆరు సెమీకండక్టర్ ప్లాంట్ల పనులు ప్రారంభ దశలో ఉన్నాయి. అదేవిధంగా నేషనల్ క్రిటికల్ మినరల్స్ మిషన్ ద్వారా కీలక ఖనిజాల అన్వేషణ, వినియోగాన్ని ప్రోత్సహిస్తున్నాం అని వెల్లడించారు.

రాష్ట్రాలకు పిలుపు, పోటీదారులా అభివృద్ధి వైపుకు

ఈ అభివృద్ధి దిశగా రాష్ట్రాల పాత్రను గుర్తిస్తూ ప్రధాని మోడీ రాష్ట్రాలు పెట్టుబడుల కోసం పరస్పరం పోటీ పడాలి. అభివృద్ధి అనుకూల విధానాలను అమలు చేస్తూ పెట్టుబడిదారుల విశ్వాసాన్ని గెలుచుకోవాలి. భారత్ అభివృద్ధిలో ముందుండాలంటే, కేంద్రంతో పాటు రాష్ట్రాలు కూడా అదే తపనతో పనిచేయాలి అని పిలుపునిచ్చారు. ఈవీ రంగంలో భారత్ చేస్తున్న పురోగతితో దేశ ఉత్పత్తి సామర్థ్యం ప్రపంచవ్యాప్తంగా గుర్తింపు పొందుతోంది. ఈవీలతో పాటు బ్యాటరీ టెక్నాలజీ, సెమీకండక్టర్ల తయారీ వంటి రంగాల్లో భారత్ ప్రవేశిస్తున్న కొత్త దశ దేశ ఆర్థికతను మరింత బలపరచనుంది.

Read Also: AP : ఏపీ లిక్కర్‌ స్కామ్ కేసు… 12 మంది నిందితుల రిమాండ్ పొడిగింపు

Follow us