Goa Minister and former CM Ravi Naik : గుండెపోటుతో గోవా మాజీ సీఎం కన్నుమూత

Ramesh Nayak

గోవా మాజీ ముఖ్యమంత్రి, ప్రస్తుత వ్యవసాయశాఖ మంత్రి రవి నాయక్ మరణం రాష్ట్ర రాజకీయ వర్గాలను విషాదంలో ముంచేసింది. 79 ఏళ్ల వయసులో ఆయన గుండెపోటుతో కన్నుమూశారు. నిన్న రాత్రి ఇంట్లో ఉన్న సమయంలో అకస్మాత్తుగా ఛాతినొప్పి రావడంతో కుటుంబ సభ్యులు ఆయనను సమీపంలోని ఆస్పత్రికి తరలించారు. అయితే, వైద్యులు పరీక్షించి చూడగా అప్పటికే ఆయన మృతి చెందినట్లు ప్రకటించారు. రాత్రి ఒంటి గంట సమయంలో జరిగిన ఈ ఘటనతో గోవా రాజకీయాల్లో తీవ్ర దిగ్భ్రాంతి వ్యక్తమవుతోంది. ఆయనకు భార్య, ఇద్దరు కుమారులు ఉన్నారు. ఇవాళ మధ్యాహ్నం 3 గంటలకు ఆయన అంత్యక్రియలు రాష్ట్ర ప్రభుత్వ అధికార పూర్వకంగా నిర్వహించనున్నారు.

Bihar Election 2025 : నేను ఎన్నికల్లో పోటీ చేయట్లేదు -ప్రశాంత్ కిశోర్

రవి నాయక్ గోవా రాజకీయాల్లో సుదీర్ఘమైన సేవ చేసిన నేతగా గుర్తింపు పొందారు. 1994 నుండి 2005 మధ్య రెండు సార్లు ముఖ్యమంత్రిగా పనిచేసిన ఆయన, కాంగ్రెస్ పార్టీలోనూ, తర్వాత బీజేపీ పాలనలోనూ కీలక పదవులు చేపట్టారు. ఇటీవల వ్యవసాయశాఖ మంత్రిగా వ్యవహరిస్తూ రైతు సంక్షేమ కార్యక్రమాలకు చురుకైన పాత్ర పోషించారు. ప్రజలతో అనుబంధాన్ని కొనసాగిస్తూ, గ్రామీణ అభివృద్ధి, వ్యవసాయ రంగ ప్రగతికి కృషి చేశారు. ఆయన రాజకీయ జీవితం మూడు దశాబ్దాలపాటు గోవా అభివృద్ధికి అంకితమైందని సహచర నేతలు స్మరించుకుంటున్నారు.

రవి నాయక్ మరణం పట్ల దేశవ్యాప్తంగా రాజకీయ నాయకులు సంతాపం వ్యక్తం చేస్తున్నారు. ప్రధాన మంత్రి నరేంద్ర మోదీ ట్వీట్ చేస్తూ “రవి నాయక్ గారు జీవితాన్ని ప్రజాసేవకే అంకితం చేశారు. ఆయన కృషి గోవా అభివృద్ధిలో ఎప్పటికీ గుర్తుండిపోతుంది” అని పేర్కొన్నారు. అలాగే గోవా ముఖ్యమంత్రి ప్రమోద్ సావంత్, కాంగ్రెస్ నేతలు, ఇతర పార్టీ ప్రముఖులు కూడా ఆయన కుటుంబానికి ప్రగాఢ సానుభూతి తెలిపారు. రవి నాయక్ మరణంతో గోవా రాజకీయాల్లో ఏర్పడిన ఖాళీ త్వరగా నిండదని పలువురు వ్యాఖ్యానిస్తున్నారు.

Follow us