Emergency Ticket System : ‘ఐఆర్‌సీటీసీ‌’లో ఎమర్జెన్సీ టికెట్ సిస్టమ్‌పై వివాదం.. ఏజెంట్ల దందా

Emergency Ticket System : ఇండియన్ రైల్వే కేటరింగ్‌ అండ్ టూరిజం కార్పొరేషన్‌ (IRCTC) వెబ్‌సైట్ నిర్వహణ తీరు పేలవంగా మారింది.  ఐఆర్‌సీటీసీకి చెందిన ఈ- టికెట్ సేవల్లో పదేపదే అంతరాయం తలెత్తుతోంది. రైల్వే టికెట్లను బుక్ చేసుకోవడంలో రోజువారీ సవాళ్లు ఎదురవుతున్నాయి. దీంతో అత్యవసరాలు ఏర్పడినప్పుడు తత్కాల్ టికెట్ల బుకింగ్ సర్వీసులపై ఆధారపడే వేలాది మంది ప్రయాణికులు తీవ్ర అసౌకర్యానికి గురవుతున్నారు. బుకింగ్‌లకు అంతరాయం కలిగి ఇబ్బంది పడుతున్నారు. ఏజెంట్లను ప్రోత్సహిస్తూ రైల్వే వ్యవస్థ ప్రజల్లో చేతులారా ప్రతిష్ఠను మసకబార్చుకుంటోందనే విమర్శలు వినవస్తున్నాయి.

Also Read :2024 Elections Donations : 2024 ఎన్నికల వేళ బీజేపీ విరాళాలు 87 శాతం జంప్.. కాంగ్రెస్‌కు సైతం..

రైల్వే మంత్రి ఒకసారి ఈ వెబ్‌సైట్‌ను..

ఆన్‌లైన్‌లో తత్కాల్ రైల్వే టికెట్ల బుకింగ్‌ సేవలు కష్టతరంగా మారాయని ఐఆర్‌సీటీసీకి(Emergency Ticket System) ఫిర్యాదులు వెల్లువెత్తుతున్నాయి. తత్కాల్ రైలు టిక్కెట్లను బుక్ చేసుకోవడానికి రైల్వే మంత్రి ఒకసారి IRCTC వెబ్‌సైట్‌ను ఉపయోగించాలని రైల్వే ప్రయాణికులు సూచిస్తున్నారు. ‘‘IRCTC వెబ్‌సైట్/యాప్ ఉదయం 10 గంటలకు పని చేయదు. మీరు లాగిన్ అయ్యే సమయానికి అన్ని టిక్కెట్లు దాదాపు అయిపోతాయి. ఒక దశాబ్దం గడిచినా వారు దీన్ని సరిదిద్దలేరు’’ అని ఒక నెటిజన్ సోషల్ మీడియా వేదికగా ట్వీట్ చేశాడు. దీన్ని చూసి చాలామంది నెటిజన్లు స్పందిస్తున్నారు. ‘‘జొమాటో, స్విగ్గీ, ఓలా, ఉబెర్‌ లాంటి యాప్స్  ఎక్కువ డిమాండ్ ఉన్న సమయంలోనూ కచ్చితత్వంతో సిస్టమ్ ఎలా హ్యాండిల్ చేస్తుంటాయి ?’’ అని రవిసుతంజని నెటిజన్ కామెంట్ పెట్టారు. దీన్ని చాలామంది నెటిజన్లు సమర్ధించారు.