ఇన్సులిన్ రెసిస్టెన్స్ అంటే ఏమిటి?

Insulin Resistance

Insulin Resistance: సాధారణంగా పొట్ట చుట్టూ కొవ్వు పెరగడం, రోజంతా అలసటగా అనిపించడం, మాటిమాటికీ తీపి పదార్థాలు తినాలనిపించడం, తలలో భారంగా అనిపించడాన్ని మనం చాలా సాధారణ విషయాలుగా భావిస్తాం. కానీ నిపుణుల అభిప్రాయం ప్రకారం.. ఇవి శరీరంలో పెరుగుతున్న ఇన్సులిన్ రెసిస్టెన్స్ (Insulin Resistance), ఫ్యాటీ లివర్ (Fatty Liver) కు సంబంధించిన ప్రారంభ హెచ్చరికలు కావచ్చు. విచారకరమైన విషయం ఏమిటంటే.. రక్తంలో చక్కెర స్థాయిలు (Blood Sugar Levels) గణనీయంగా పెరిగే వరకు చాలా మందికి ఈ సమస్య గురించి తెలియదు. మన రోజువారీ భారతీయ ఆహారపు అలవాట్లు, జీవనశైలే క్రమంగా కాలేయాన్ని ఫ్యాటీ లివర్‌గా మార్చి శరీరాన్ని ఇన్సులిన్ రెసిస్టెన్స్‌ వైపు నెడుతున్నాయని నిపుణులు హెచ్చరిస్తున్నారు.

ఇన్సులిన్ రెసిస్టెన్స్ అంటే ఏమిటి?

ఇన్సులిన్ అనేది రక్తంలోని చక్కెరను నియంత్రించే ఒక హార్మోన్. శరీరంలోని కణాలు ఇన్సులిన్‌కు సాధారణంగా స్పందించడం తగ్గించినప్పుడు దానిని ‘ఇన్సులిన్ రెసిస్టెన్స్’ అంటారు. దీనికి పేలవమైన ఆహారపు అలవాట్లు, శారీరక శ్రమ లేకపోవడం, ఒత్తిడి, ధూమపానం, మద్యపానం వంటివి ప్రధాన కారణాలు. సమయానికి జీవనశైలిలో మార్పులు చేసుకోవడం ద్వారా ప్రి-డయాబెటిస్, ప్రారంభ దశలో ఉన్న ఫ్యాటీ లివర్‌ను చాలా వరకు నయం చేయవచ్చు. ఫ్యాటీ లివర్‌కు రెండు ప్రధాన కారణాలు ఉన్నాయి. ఒకటి మితిమీరిన మద్యపానం, రెండవది నాన్-ఆల్కహాలిక్ ఫ్యాటీ లివర్ డిసీజ్ (NAFLD). అధిక బరువు, కదలిక లేని జీవనశైలి, రిఫైన్డ్ కార్బోహైడ్రేట్లు, శాచురేటెడ్ ఫ్యాట్ ఎక్కువగా ఉండే ఆహారం తీసుకోవడం వల్ల ఇది సంభవిస్తుంది.

Also Read: భారీ వ‌ర్షం.. టీ20 వ‌ర‌ల్డ్ క‌ప్‌లో సూప‌ర్- 8 మ్యాచ్ ర‌ద్దు!

అర్థరాత్రి భోజనం చేయడం

నిపుణుల అభిప్రాయం ప్రకారం.. ఆలస్యంగా డిన్నర్ చేయడం వల్ల శరీరంలోని సర్కాడియన్ రిథమ్ (Circadian Rhythm) దెబ్బతింటుంది. రాత్రి సమయంలో ఇన్సులిన్ సెన్సిటివిటీ తగ్గుతుంది. దీనివల్ల ఆలస్యంగా తినడం వల్ల బ్లడ్ షుగర్, కార్టిసాల్ స్థాయిలు పెరుగుతాయి. దీర్ఘకాలంలో ఈ అలవాటు షుగర్ నియంత్రణను పూర్తిగా తప్పిస్తుంది. అందుకే రాత్రి భోజనాన్ని త్వరగా ముగించడం, భోజనంలో కూరగాయలకు ప్రాధాన్యత ఇవ్వడం మంచిది.

అల్పాహారంలో ప్రోటీన్ లోపం

రోజును అధిక ప్రోటీన్, తక్కువ గ్లైసెమిక్ ఇండెక్స్ ఉన్న అల్పాహారంతో ప్రారంభిస్తే అది రోజంతా రక్తంలో చక్కెర స్థాయిలను సమతుల్యంగా ఉంచడంలో సహాయపడుతుంది. దీనివల్ల అనవసరమైన ఆకలి తగ్గుతుంది. ప్రతి భోజనంలో ఆరోగ్యకరమైన కొవ్వులు, పీచు పదార్థం ఉండేలా చూసుకోవాలి. చక్కెరను తగ్గించి, తగినంత నిద్రపోవడం, ఒత్తిడిని తగ్గించుకోవడం వల్ల హార్మోన్ల సమతుల్యత దెబ్బతినదు.

స్ట్రెంత్ ట్రైనింగ్ చేయకపోవడం

కేవలం నడక మాత్రమే సరిపోదు. స్ట్రెంత్ ట్రైనింగ్ (Strength Training) చేయడం వల్ల ఇన్సులిన్ సెన్సిటివిటీ మెరుగుపడుతుంది. ఇది రక్త ప్రసరణను మెరుగుపరుస్తుంది. డయాబెటిస్ వల్ల వచ్చే నరాల దెబ్బతినడం, కంటి సమస్యల ముప్పును తగ్గిస్తుంది. అంతేకాకుండా ఇది బరువును నియంత్రించడంలో, రక్తపోటును తగ్గించడంలో, కొలెస్ట్రాల్ స్థాయిలను మెరుగుపరచడంలో సహాయపడి గుండె జబ్బుల ముప్పును తగ్గిస్తుంది.

Follow us