స్నానం సమయంలో మూత్ర విసర్జన చేస్తున్నారా? ఆరోగ్యంపై ప్రభావం ఇదే

Doctor explains stop peeing in the shower

Bathing Vs Peeing  ప్రతి ఒక్కరికి రోజూ స్నానం చేసే అలవాటు ఉంటుంది. అయితే, చాలా మంది స్నానం చేసేటప్పుడు మూత్ర విసర్జన చేస్తుంటారు. ఇది బయటికి చెప్పకపోయినా ఈ అలవాటు చాలా మందికి ఉంటుంది. అంటే స్నానం చేస్తున్నప్పుడు మూత్ర విసర్జన చేయాలన్న అనుభూతి కలుగుతుంది. అయితే, స్నానం చేసేటప్పుడు మూత్ర విసర్జన అలవాటు మంచిదేనా? ఎవరిపై ప్రభావం ఉంటుంది? తీసుకోవాల్సిన జాగ్రత్తలేంటో డాక్టర్ కారంజ్ ఎస్ వేణుగోపాల్ వివరించారు. ఆ వివరాలు ఇప్పుడు తెలుసుకుందాం.

స్నానం చేస్తున్నప్పుడు మూత్ర విసర్జన చేయడం చాలా మందికి ఉన్న అలవాటు. అయితే, దీని గురించి అంతగా బయటకి చెప్పుకోరు. కానీ ఇది చాలా సాధారణం. చాలా మంది స్నానం మధ్యలో మూత్ర విసర్జన చేస్తారు. స్నానం చేయడం ప్రారంభించిన వెంటనే మూత్ర విసర్జన చేయాలనే ఒత్తిడి అనుభూతి చెందడం ప్రారంభమవుతుంది. అయితే, ఈ అలవాటు వల్ల వారికి ఎటువంటి ప్రమాదం లేదు.

స్నానం చేసేటప్పుడు మూత్ర విసర్జన ఎందుకు చేయాలనిపిస్తుంది ?

అమెరికన్ అకాడమీ ఆఫ్ పీడియాట్రిక్స్‌లోని ఓ నివేదిక ప్రకారం స్నానం చేస్తున్నప్పుడు మూత్ర విసర్జన చేయడం సాధారణం. స్నానం చేసేటప్పుడు నీరు పోసినప్పుడు శరీరంలోని సానుభూతి నాడీ వ్యవస్థ సక్రియం అవుతుంది. ఇది రక్తపోటును పెంచుతుంది. మూత్రపిండాలు సాధారణ రక్తపోటును నిర్వహించడానికి ఎక్కువ ద్రవాన్ని ఫిల్టర్ చేయడం ప్రారంభిస్తాయి. ఈ మొత్తం ప్రక్రియను ఇమ్మర్షన్ డైయూరిసిస్ అంటారు. దీంతో, మూత్రాశయం వేగంగా నిండిపోవడం ప్రారంభమవుతుంది. మూత్రాశయం ఇలా నిండిపోవడం వల్ల మూత్ర విసర్జన చేయాలనే ఒత్తిడి అనుభూతి కలుగుతుంది.

ఇది సురక్షితమేనా?

సాధారణంగా ఆరోగ్యంగా ఉన్నవారికి స్నానం చేసే సమయంలో మూత్ర విసర్జన చేయడం వల్ల ఎలాంటి ఇబ్బంది ఉండదు. దీనికి కొన్ని కారణాలు ఉన్నాయి.

1. క్రిములు ఉండవు: ఆరోగ్యంగా ఉన్నవారి మూత్రం సాధారణంగా ‘స్టెరైల్'(Sterile)గా ఉంటుంది. దీని అర్థం అందులో హానికరమైన బ్యాక్టీరియా ఉండదు.
2. శుభ్రత: నీళ్లు ధారగా పడుతున్నప్పుడు మూత్రం అందులో కలిసిపోయి వెంటనే డ్రైనేజీలోకి వెళ్ళిపోతుంది. ఇది అపరిశుభ్రమైన అలవాటు కాదు.
3. పైపులకు నష్టం లేదు: మూత్రంలో నీరు, లవణాలు మాత్రమే ఉంటాయి. అందుకే ప్లంబింగ్ వ్యవస్థకు ఎలాంటి హాని జరగదు.

జాగ్రత్త పడాల్సిన సందర్భాలు

అయితే, కొన్ని ప్రత్యేక సందర్భాల్లో ఈ అలవాటు వల్ల ఇబ్బందులు రావచ్చు:

• ఇన్ఫెక్షన్లు ఉన్నప్పుడు: మూత్రపిండాల ఇన్ఫెక్షన్, యూరిన్ ట్రాక్ట్ ఇన్ఫెక్షన్ (UTI) వంటివి ఉన్నప్పుడు, మూత్రంలో బ్యాక్టీరియా ఉండే అవకాశం ఉంది. ఇది నేలపై పడినప్పుడు ఇతరులకు లేదా మీకే మళ్ళీ సోకే ప్రమాదం ఉంటుంది. అందుకే స్నానపు గదిని ఎప్పటికప్పుడు శుభ్రం చేసుకోవాలి.
• కాళ్ళకు గాయాలైనప్పుడు: పాదాలకు దెబ్బలు తగిలినా, ఫంగల్ ఇన్ఫెక్షన్లు ఉన్నా, చర్మం పగిలినా అశుభ్రమైన నేల మీద నిలబడటం వల్ల ఇన్ఫెక్షన్లు పెరిగే అవకాశం ఉంటుంది.
• సరైన సమయం: స్నానం మొదట్లోనే మూత్ర విసర్జన చేయడం మంచిది. దీనివల్ల స్నానం పూర్తయ్యేలోపు శరీరంపై పడిన మూత్రం పూర్తిగా క్లీన్ అవుతుంది.

మెదడుపై ప్రభావం (Bladder Conditioning)

1. ఈ అలవాటు వైద్యపరంగా కంటే మానసికంగా ఎక్కువ ప్రభావం చూపుతుంది.
2. పదే పదే నీటి శబ్దాన్ని వింటూ మూత్ర విసర్జన చేయడం వల్ల మెదడు నీటి శబ్దం వినగానే మీకు ఈ అనుభూతి కలుగుతుంది.
3. దీని వల్ల భవిష్యత్తులో బయట ఎక్కడైనా నీటి శబ్దం విన్నా లేదా వర్షం పడుతున్నా సరే.. మీకు తెలియకుండానే మూత్ర విసర్జన చేయాలనే బలమైన కోరిక కలగవచ్చు. ఇది మూత్ర పిండాల నియంత్రణ సమస్యలకు దారితీయవచ్చు.
4. దీనిని శాస్త్రీయంగా పెల్విక్ ఫ్లోర్ రిఫ్లెక్స్ అని పిలుస్తారు. స్నానం చేసేటప్పుడు మూత్ర విసర్జన చేయడం వల్ల పెల్విక్ ఫ్లోర్ బలహీనత ఉన్నవారికి సమస్యాత్మకంగా ఉంటుంది. నిలబడి ఉన్నప్పుడు తరచుగా మూత్ర విసర్జన చేయడం వల్ల పెల్విక్ ఫ్లోర్ కండరాలు పూర్తిగా సక్రియం కాకుండా నిరోధిస్తాయి. ఇది కాలక్రమేణా వాటిని బలహీనపరుస్తుంది.

పురుషులు, స్త్రీలపై వేర్వేరు ప్రభావం

స్నానం చేసేటప్పుడు మూత్ర విసర్జన అనేది పురుషులు, స్త్రీలపై వేర్వేరు ప్రభావాల్ని కలిగి ఉంటుంది.

UTI ఇన్ఫెక్షన్ ప్రమాదం

మహిళలు నిలబడి స్నానం చేయడం మానుకోవాలని నిపుణులు సూచిస్తున్నారు. మహిళల శరీర నిర్మాణ శాస్త్రం కారణంగా, నిలబడి ఉన్న మూత్రం పూర్తిగా బయటకు రాకపోవచ్చు. దీని వల్ల యూరిన్ ట్రాక్ట్ ఇన్ఫెక్షన్ సమస్య పెరగవచ్చు. అంతేకాకుండా నేషనల్ లైబ్రరీ ఆఫ్ మెడిసిన్ ప్రకారం , స్నానం చేసేటప్పుడు మూత్ర విసర్జన చేయడం చర్మంపై ప్రతికూల ప్రభావాన్ని చూపుతుంది. యూరియా, అమ్మోనియా, మూత్రంలో ఉండే ఇతర రసాయన సమ్మేళనాలు చర్మాన్ని ప్రభావితం చేస్తాయి. ఇతరులతో బాత్రూమ్ పంచుకునేటప్పుడు మరింత జాగ్రత్తగా ఉండాలి.

తీసుకోవాల్సిన జాగ్రత్తలు

1) బాత్‌రూమ్ పరిశుభ్రత ముఖ్యం

• క్రమం తప్పకుండా క్లీనింగ్: వారానికి కనీసం రెండుసార్లు బాత్రూమ్‌ని బాగా క్లీన్ చేయాలి. యాంటీ బ్యాక్టీరియాల్ మందులతో బాత్రూమ్ నేలను, షవర్లను, ట్యాపులను క్లీన్ చేయాలి. దీని వల్ల మూత్రం లేదా ఇతర వ్యర్థాల ద్వారా వచ్చే బ్యాక్టీరియా నశిస్తుంది.
• వెంటిలేషన్: స్నానం చేసిన తర్వాత బాత్రూమ్ తలుపులు లేదా కిటికీలు తెరిచి ఉంచండి. తేమ ఎక్కువగా ఉంటే ఫంగస్ త్వరగా పెరుగుతుంది.

2) పాదాల రక్షణ

• పాదాల శుభ్రత: స్నానం చేసిన వెంటనే వేళ్ల మధ్యలో నీరు లేకుండా తుడుచుకోవాలి. తేమ ఉంటే ఫంగల్ ఇన్ఫెక్షన్లు వచ్చే అవకాశం ఉంది. అంతేకాకుండా చంకలు, జననేంద్రియ ప్రాంతాల్లో తేమ లేకుండా బాగా శుభ్రం చేసుకోండి. ఇందుకు శుభ్రమైన మెత్తటి టవల్‌ ఉపయోగించండి.
• చెప్పుల వాడకం: పబ్లిక్ టాయిలెట్స్ లేదా షవర్లు వాడుతున్నప్పుడు ఖచ్చితంగా చెప్పులు వేసుకోవాలి. అక్కడ ఇన్ఫెక్షన్లు సోకే ప్రమాదం ఎక్కువగా ఉంటుంది.

3) మూత్రపిండాల ఆరోగ్యం

• మూత్రాన్ని ఆపుకోవద్దు: మూత్రం వచ్చినప్పుడు ఎక్కువ సేపు ఆపుకోకూడదు. ఇలా చేయడం వల్ల బ్లాడర్ బలహీనపడుతుంది. దీంతో పాటు యూరినరీ ట్రాక్ట్ ఇన్ఫెక్షన్ వచ్చే అవకాశం ఉంటుంది.
• సరైన భంగిమ: మూత్ర విసర్జన చేసేటప్పుడు కండరాల్ని ఒత్తిడికి గురి చేయకుండా రిలాక్స్‌డ్‌గా ఉంచాలి. స్నానపు గదిలో నిలబడి చేయడం కంటే కూర్చొని చేయడం వల్ల మూత్రాశయం పూర్తిగా ఖాళీ అవుతుంది.

చివరగా ఏం తెలుసుకోవాలి?

అప్పుడప్పుడు ఈ అలవాటు వల్ల పెద్ద నష్టం లేదు. కానీ దీన్ని అలవాటుగా మార్చుకోకుండా ఉండటం ముఖ్యం. అంతేకాకుండా స్నానపు గదిని శుభ్రంగా ఉంచుకోవడం మీ ఆరోగ్యానికి మంచిది. మూత్ర విసర్జన చేసిన వెంటనే ఆ ప్రాంతాన్ని కేవలం నీటితో కాకుండా, తక్కువ ఘాటున్న సబ్బు లేదా లిక్విడ్స్‌తో కడిగితే వాసన రాకుండా ఉంటుంది.

Follow us