గొంతులో ఆహారం అడ్డుప‌డుతుందా?

Choking

Choking: మనం త్వరత్వరగా ఆహారం తీసుకోవడం లేదా తింటూ మాట్లాడటం వల్ల ఒక్కోసారి ఆహారం గొంతులో అడ్డుపడుతుంది. ఆ సమయంలో కంగారు, ఊపిరి ఆడకపోవడం, అసౌకర్యం కలుగుతాయి. ఇది చిన్న విషయంగా అనిపించినా, కొన్నిసార్లు ప్రాణాంతకం కావచ్చు. ముఖ్యంగా ఆహారం శ్వాసనాళంలో చిక్కుకుపోయినప్పుడు శరీరానికి ఆక్సిజన్ అందక ప్రాణాపాయం సంభవిస్తుంది. అందుకే ఇలాంటి స్థితిలో ఏం చేయాలి? ఏం చేయకూడదు అనే సరైన అవగాహన ఉండటం చాలా ముఖ్యం. ఒకవేళ మీరు ఇంట్లో ఒంటరిగా ఉన్నప్పుడు ఇలా జరిగితే మీ ప్రాణాలను ఎలా కాపాడుకోవాలో ఈ కథనంలో తెలుసుకుందాం.

ఈ తప్పులు అస్సలు చేయకండి

గొంతులో ఆహారం అడ్డుపడినప్పుడు మనం చేసే కొన్ని పొరపాట్లు పరిస్థితిని మరింత తీవ్రం చేస్తాయి. దీనిపై ఆరోగ్య నిపుణులు కీలక సూచనలు చేశారు.

నీళ్లు తాగకండి: ఆహారం అడ్డుపడగానే నీళ్లు తాగడం వల్ల ఆ ముక్క మరింత లోపలికి వెళ్లి శ్వాసనాళాన్ని పూర్తిగా మూసివేసే ప్రమాదం ఉంది.

వేళ్లు పెట్టకండి: గొంతులో వేళ్లు పెట్టి తీయడానికి ప్రయత్నించడం వల్ల ఆ ముక్క ఇంకా కిందకు జారిపోవచ్చు.

నేరుగా పడుకోకండి: నేరుగా పడుకోవడం లేదా కంగారుగా అటు ఇటు పరిగెత్తడం వల్ల ఊపిరి ఆగిపోయే ముప్పు పెరుగుతుంది.

Also Read: ట్రైన్‌నే లాగిన కారు.. ధ‌ర ఎంతో తెలుసా?

వెంటనే ఉపశమనం పొందే మార్గాలు

ఒంటరిగా ఉన్నప్పుడు గొంతులో ఆహారం అడ్డుపడితే ఈ పద్ధతులు పాటించండి.

గట్టిగా దగ్గండి: శ్వాసనాళంలో అడ్డుపడిన ముక్క బయటకు రావడానికి గట్టిగా దగ్గడానికి ప్రయత్నించండి. ఇది అత్యంత ప్రాథమిక, సమర్థవంతమైన మార్గం.

అబ్డామినల్ థ్రస్ట్: మీ చేతిని పిడికిలి బిగించి నాభి (బొడ్డు) పైభాగంలో ఉంచి, లోపలికి, పైకి గట్టిగా ఒత్తిడి ఇవ్వండి.

కుర్చీ లేదా టేబుల్ సహాయం: ఒక కుర్చీ వెనుక భాగం లేదా టేబుల్ అంచును మీ పొట్టకు ఆనించి, ముందుకు వంగి గట్టిగా ఒత్తిడి ఇవ్వండి. దీనివల్ల లోపల చిక్కుకున్న ఆహారం బయటకు వస్తుంది.

ఎమర్జెన్సీ కాల్: పరిస్థితి తీవ్రంగా ఉంటే వెంటనే సహాయం కోసం కాల్ చేయండి. ఫోన్‌ను స్పీకర్‌లో ఉంచి వీలైతే ఇంటి తలుపులు అన్‌లాక్ చేయండి (మెడికల్ టీమ్ లోపలికి రావడానికి వీలుగా).

వైద్యుడిని ఎప్పుడు సంప్రదించాలి?

ఆహారం పదే పదే గొంతులో అడ్డుపడుతున్నా లేదా మింగడంలో ఇబ్బందిగా ఉన్నా దానిని నిర్లక్ష్యం చేయకూడదు. ఇది లోపల ఏదైనా తీవ్రమైన ఆరోగ్య సమస్యకు సంకేతం కావచ్చు. కాబట్టి వెంటనే డాక్టర్‌ను సంప్రదించి పరీక్ష చేయించుకోవడం మంచిది.

Follow us