Ugadi Pachadi: ఉగాది పచ్చడిలో షడ్రుచుల వెనుక ఉన్న రహస్యం ఇదే..!

Ugadi Pachadi Significance

Ugadi Pachadi  ప్రతి పండుగకీ ఒక ప్రత్యేకమైన వంటకం ఉండనే ఉంటుందనే విషయం తెలిసిందే. అనాదిగా వస్తున్న సంస్కృతీ సంప్రదాయాలను కొనసాగిస్తూ నియమ నిష్టలతో తయారు చేసుకునే ఈ విభిన్న వంటకాల్లో ఆరోగ్యాన్ని అందించే సుగుణాలు బోలెడుంటాయనే విషయం కూడా విధితమే. ఆ క్రమంలో తెలుగు సంవత్సరాది ఉగాది పండుగకి చేసుకునే ఉగాది పచ్చడి కూడా ఇందుకు మినహాయింపు కాదు. ఉగాది పచ్చడిలోని ఆరు రుచులు రుచిలోనే కాదు.. ఆరోగ్యాన్ని అందించడంలోనూ మిన్నే! శ్రీ పరాభవ నామ సంవత్సరంలోకి అడుగుపెడుతున్న వేళ.. ఉగాది పచ్చడి తయారీ విధానం, ఆరోగ్య ప్రయోజనాలు ఏంటో తెలుసుకుందాం..

తెలుగు వారి తొలి పండుగ ఉగాది. ఈ ఏడాది మార్చి 19వ తేదీన శ్రీపరాభవ నామ సంవత్సరం ప్రారంభం కానుంది. ఉగాది పండుగ (Ugadi Festival) అంటేనే షడ్రుచుల సమ్మేళనం. ఉగాది పచ్చడిలో వేసే తీపి, పులుపు, చేదు, వగరు, కారం, ఉప్పు ఇలా ఒక్కో రుచి మనిషి జీవితంలోని ఒక్కో భావానికి ప్రతీక అని పెద్దలు చెబుతుంటారు. అందుకే ఉగాది పచ్చడిలోని షడ్రుచుల అర్థం క్షుణ్నంగా తెలుసుకుంటే మనిషి జీవిత పరమార్థం అర్థమైనట్లేనని అంటారు.

అంతే కాకుండా సంవత్సరం పొడవునా ఎదురయ్యే మంచి చెడులను, కష్టసుఖాలను ఓర్పుతో, నేర్పుతో స్వీకరించాలన్న సందేశాన్ని కూడా ఉగాది పచ్చడి ఇస్తుంది. అయితే ఉగాది పచ్చడిలో వేసే ఆరు రుచులు సరిసమానంగా ఉన్నప్పుడే ఉగాది పచ్చడికి ఓ అర్థం. మరి ఇంకెందుకు ఆలస్యం అసలు సిసలైన ఉగాది పచ్చడిని ఎలా తయారు చేసుకోవాలో, దీని వల్ల కలిగే ఆరోగ్య ప్రయోజనాలు ఏంటో ఇప్పుడు చూసేద్దాం..

ఉగాది పచ్చడికి కావాల్సిన పదార్థాలు

Ugadi Pachadi

• కొత్త చింతపండు – 30 – 50 గ్రాములు
• వేప పూత – 1 టేబుల్​ స్పూన్​
• రాళ్ల ఉప్పు – సరిపడేంత​
• బెల్లం – 2 టేబుల్​ స్పూన్లు
• మామిడి పిందె – సైజుని బట్టి 1 లేదా 2
• పచ్చిమిర్చి – చిన్నవి 1 లేదా 2 లేదా మిరియాలు – 15
• చెరకు రసం -1/2 కప్పు​

ఉగాది పచ్చడి తయారీ విధానం

Ugadi 2026.

Step 1: మొదట పులుపు కోసం వేసే చింతపండును గింజలు, నార లేకుండా తీసుకోవాలి. ఈ చింతపండును ఒక కొత్త గిన్నెలో 250ml గోరువెచ్చని నీళ్లు పోసి పావుగంట సేపు నానబెట్టాలి. చేదు కోసం వేసే వేప పూత తీసుకుని మొగ్గలు, కాడలు లేకుండా వేప పూరేకులు మాత్రమే తీసుకుని ఓ ప్లేట్​లో పెట్టుకోవాలి.

Step 2: ఇక కారం కోసం వేసే మిరియాలు వేస్తే పొడి చేసుకోవాలి లేదా పచ్చిమిర్చి వేస్తే సన్నగా తురుముకోవాలి. తర్వాత రాళ్ల ఉప్పును మెత్తగా గ్రైండ్​ చేసుకోవాలి. ఇక మామిడి కాయలు పులుపుతో ఉంటాయి కాబట్టి వగరు కోసం మామిడి పిందెలు తీసుకుంటే బాగుంటుంది.

Step 3: ఆ మామిడి పిందెలు బాగా కడిగి చిన్న చిన్న ముక్కలుగా కట్​ చేసుకోవాలి. తీపి కోసం వేసే బెల్లాన్ని తురుముకోవాలి. ఇప్పుడు బాగా నానిన చింత పండును గట్టిగా పిండి గుజ్జు తీసుకుని పిప్పి పడేయాలి.

Step 4: ఆ చింతపండు గుజ్జులో వేప పూత, మిరియాలు లేదా పచ్చిమిర్చి తురుము, మామిడి ముక్కలు, రాళ్లఉప్పు మిశ్రమం, బెల్లం తురుము వేసి బెల్లం కరిగే వరకు బాగా కలుపుతూ ఉండాలి. అంతే.. షడ్రుచోపేతమైన ఉగాది పచ్చడి రెడీ.

వసంత లక్ష్మికి నైవేద్యంగా సమర్పించాలి

Vasantha Lakshmi

ఈ ఉగాది పచ్చడి సిద్ధమైన తర్వాత వసంత లక్ష్మిని ఆహ్వానించి అమ్మవారికి ఉగాది పచ్చడి నైవేద్యంగా సమర్పించి ఆ తర్వాత స్వీకరించాలి. అంతేకాదు ఉగాది పచ్చడిని మనం తీసుకోవడమే కాకుండా చుట్టూ ఉన్న వాళ్లకు కూడా పంచిపెట్టాలి. ఈ ఉగాది పచ్చడి సేవనం జీవితంలో ఎదురయ్యే సుఖదుఃఖాలను, మంచి చెడులను చవిచూడాలనే పచ్చి నిజాన్ని తెలియజేస్తుంది.

ఉగాది పచ్చడి తినేటప్పుడు చదవాల్సిన శ్లోకం

Ugadi Special

తాయుష్యం వజ్ర దేహం దదాత్యర్థం సుఖానిచ
సర్వారిష్ట వినాశంచ నింబకందళ భక్షణమ్‌

ఉగాది పచ్చడి రుచికే కాదు ఆరోగ్యానికీ ఎంతో మేలు

Ugadi Pachadi.

ఉగాది పచ్చడిలో వేసే బెల్లం నిస్సత్తువ పోగొట్టి తక్షణ శక్తినిస్తుంది. అరటిపండులో పొటాషియం పుష్కలంగా ఉంటుంది. National Library of Medicine అధ్యయనం ప్రకారం పోటాషియం ఉండటం వల్ల బీపీ, కిడ్నీ ప్రాబ్లమ్స్‌ను నిరోధిస్తుంది. చింతపండు ఉష్ణ దోషాలు తగ్గుతాయని ఆయుర్వేదం సైతం చెబుతోంది. ఇక ఉప్పు త్రిదోషాలైన వాత, పిత్త, కఫాలను తొలగిస్తుంది. మామిడి పిందెల్లో విటమిన్‌ సీ పుష్కలంగా ఉంటుంది. ఈ విటమిన్‌ సీ వల్ల రోగనిరోధక శక్తి పెరుగుతుందని అధ్యయనాలు వెల్లడిస్తున్నాయి. వేప పూలు కఫదోషాన్ని, క్రిమి దోషాలను, జీర్ణకోశ సమస్యలను నివారిస్తాయి. ఇక మిరియాలు చర్మవ్యాధులను అరికట్టడమే కాకుండా, జీర్ణశక్తిని పెంచుతాయి.

Follow us