ఆదివారం మౌని అమావాస్య విశేషాలు.. ప్రాముఖ్యత

Sunday's Mauni Amavasya special features.. Importance

. త్రివేణి సంగమంలో మహాపుణ్య స్నానం

. పితృ తర్పణం మరియు ఆచారాల విశేషత

. పూజ, దానం మరియు సాత్విక జీవనం

Mauni Amavasya 2026: 2026 జనవరి 18 ఆదివారం నాడు మౌని అమావాస్య . ఈ పవిత్ర తేదీ ప్రయాగరాజ్‌లో జరుగుతున్న మాఘ మేళాలో అత్యంత ముఖ్యమైన రోజుగా భావిస్తారు. ముఖ్యంగా గంగా, యమునా, అంతర్దానంగా ప్రవహించే సరస్వతి నదులు కలిసే త్రివేణి సంగమంలో ఈ రోజున చేసే స్నానానికి విశేష ఆధ్యాత్మిక విలువ ఉంది. శాస్త్రాల ప్రకారం మౌని అమావాస్య నాడు పవిత్ర నదుల్లో స్నానం చేయడం వల్ల పాపాలు నశించి ఆత్మకు శుద్ధి కలుగుతుంది. అంతేకాదు మరణానంతరం మోక్షప్రాప్తి కలుగుతుందన్న నమ్మకం కూడా ఉంది. అందువల్ల దేశం నలుమూలల నుంచి భక్తులు ప్రయాగరాజ్‌కు చేరుకుని అమృత స్నానం ఆచరిస్తారు.

మౌని అమావాస్య రోజున పూర్వీకులు భూమిపైకి వస్తారని హిందూ ధర్మంలో విశ్వాసం ఉంది. అందుకే ఈ రోజున సంగమ స్నానం అనంతరం పితృ తర్పణం చేయడం అత్యంత ముఖ్యమైన కర్తవ్యంగా చెబుతారు. త్రివేణి సంగమం నుండి తీసుకున్న పవిత్ర జలంతో పూర్వీకులను స్మరిస్తూ అర్ఘ్యం సమర్పించాలి. ఈ అనుష్ఠానం ద్వారా పితృదేవతలు సంతృప్తి చెంది కుటుంబానికి ఆశీర్వాదాలు ప్రసాదిస్తారని నమ్మకం. అలాగే మౌని అమావాస్య నాడు ఆచారాల స్వచ్ఛతను కాపాడుకోవడం చాలా అవసరం. అనవసర మాటలు, కోపతాపాలు, అసత్యాలు నివారిస్తూ మౌనం పాటించడం వల్ల ఆధ్యాత్మిక ఫలితాలు మరింత పెరుగుతాయని పండితులు సూచిస్తున్నారు.

పవిత్ర స్నానం పూర్తయ్యాక శివుడు మరియు విష్ణువులను భక్తిశ్రద్ధలతో పూజించడం మౌని అమావాస్య ప్రత్యేకత. ఈ పూజల వల్ల జీవితంలో శాంతి, ఆనందం, సానుకూల మార్పులు కలుగుతాయని విశ్వాసం. అలాగే ఈ రోజున దానం చేయడం చాలా శ్రేయస్కరం. ఆహారం, వస్త్రాలు, ధనం లేదా అవసరమైన వస్తువులు మీ సామర్థ్యానికి తగినట్లుగా దానం చేయవచ్చు. దానం ద్వారా పొందే పుణ్యం అనేక రెట్లు పెరుగుతుందని శాస్త్రాలు చెబుతున్నాయి. మౌని అమావాస్య నాడు సాత్విక ఆహారం మాత్రమే తీసుకోవాలి, మద్యం, మాంసాహారం పూర్తిగా వర్జించాలి. స్నానం అనంతరం సమీప ఆలయాన్ని దర్శించి ప్రార్థనలు చేయడం వల్ల మనస్సుకు ప్రశాంతత లభిస్తుంది. మౌని అమావాస్య రోజు నియమ నిష్ఠలతో గడిపితే ఆధ్యాత్మిక పురోగతితో పాటు కుటుంబ జీవితం కూడా సుఖసంతోషాలతో నిండుతుందని భక్తుల నమ్మకం.

Follow us