జైలర్ 2’లో బాలీవుడ్ బాద్షా ? రివీల్ చేసిన మిథున్ చక్రవర్తి !

Shah Rukh Khan Jailer 2

రజనీకాంత్ ప్రధాన పాత్రలో నెల్సన్ దిలీప్ కుమార్ దర్శకత్వంలో తెరకెక్కిన బ్లాక్ బస్టర్ సినిమా ‘జైలర్’. దీనికి సీక్వెల్ గా ‘జైలర్ 2’ సినిమా రూపొందుతున్న సంగతి తెలిసిందే. ప్రస్తుతం షూటింగ్ దశలో ఉన్న ఈ చిత్రంపై అభిమానుల్లో భారీ అంచనాలు నెలకొన్నాయి. ఫస్ట్ పార్ట్ లో మోహన్ లాల్, శివ రాజ్ కుమార్ వంటి స్టార్లు క్యామియా రోల్స్ చేశారు. ఇప్పుడు సీక్వెల్ లో కూడా మరిన్ని సర్ప్రైజులు ప్లాన్ చేస్తున్నట్లు తెలుస్తోంది. ఇందులో రజినీతో పాటుగా మరో సూపర్ స్టార్ కనిపించబోతున్నారు. ఈ విషయాన్ని సీనియర్ నటుడు మిథున్ చక్రవర్తి ధృవీకరించారు. ఇంతకీ ఆ స్టార్ ఎవరంటే?

సూపర్‌స్టార్ రజనీకాంత్ హీరోగా దర్శకుడు నెల్సన్ దిలీప్‌ కుమార్ తెరకెక్కించిన సినిమా ‘జైలర్’. 2023లో వచ్చిన ఈ పాన్ ఇండియా మూవీ బాక్సాఫీస్ వద్ద ఏ స్థాయి విజయం సాధించిందో ప్రత్యేకంగా చెప్పాల్సిన పనిలేదు. తలైవా క్రేజ్, అనిరుధ్ మ్యూజిక్, ఇతర భాషల స్టార్ హీరోల క్యామియో రోల్స్ ఈ సినిమాను బ్లాక్ బస్టర్‌గా నిలబెట్టాయి. ప్రస్తుతం ఈ చిత్రానికి సీక్వెల్‌గా ‘ జైలర్ 2 ‘ సినిమా రూపొందుతున్న సంగతి అందరికీ తెలిసిందే. ప్రస్తుతం ఈ మూవీ షూటింగ్ శరవేగంగా జరుగుతోంది. ఈ క్రమంలో ఇందులో నటించబోయే తారాగణంపై ఇప్పుడు ఓ ఇంట్రెస్టింగ్ న్యూస్ రివీల్ అయింది.

మొదటి పార్ట్ కంటే భారీ స్థాయిలో ‘జైలర్ 2’ చిత్రాన్ని రూపొందిస్తున్నారు నెల్సన్. జైలర్ లో మోహన్ లాల్, శివ రాజ్ కుమార్, జాకీ ష్రాఫ్ వంటి స్టార్ యాక్టర్స్ క్యామియా రోల్స్ చేశారు. సీక్వెల్ లోనూ వీరిద్దరి పాత్రలు కొనసాగనున్నాయని సమాచారం. వీరితో పాటుగా పలు ఇండస్ట్రీలకు చెందిన స్టార్స్ స్పెషల్ క్యారెక్టర్స్ చేస్తున్నట్లు గత కొన్ని రోజులుగా వార్తలు వస్తున్నాయి. బాలీవుడ్ సూపర్ స్టార్ షారుక్ ఖాన్ కూడా రజనీకాంత్ తో స్క్రీన్ షేర్ చేసుకోబోతున్నారని, ఆయన పవర్‌ఫుల్ రోల్ లో కనిపిస్తారని టాక్ వచ్చింది. అయితే ఈ విషయాన్ని బాలీవుడ్ సీనియర్ నటుడు మిథున్ చక్రవర్తి తాజాగా ధృవీకరించారు.

‘జైలర్ 2’ సినిమాలో కింగ్ ఖాన్ షారుక్ ఖాన్ నటిస్తున్నట్లు మిథున్ చక్రవర్తి ఓ ఇంటర్వ్యూలో చెప్పారు. రజనీకాంత్, మోహన్ లాల్, షారూక్, రమ్యకృష్ణ వంటి పెద్ద పెద్ద స్టార్లు కలిసి నటిస్తున్నట్లు తెలిపారు. దీంతో ‘జైలర్’ సీక్వెల్ లో బాలీవుడ్ బాద్ షా నటిస్తున్నట్లు అభిమానులు ఫిక్స్ అయ్యారు. రజనీకి వీరాభిమాని అయిన షారుక్.. ఇప్పుడు ఆయన సినిమాలో కలిసి నటిస్తుండటం, ఇద్దరూ ఒకే ఫ్రేమ్ లో కనిపించడం నిజంగా ఫ్యాన్స్ కి ట్రీట్ అనే చెప్పాలి. దీనిపై మేకర్స్ నుంచి అధికారిక ప్రకటన రావాల్సి ఉంది.

రజనీకాంత్ నటించిన ‘కూలీ’ సినిమాలో బాలీవుడ్ మిస్టర్ పర్ఫెక్షనిస్ట్ ఆమిర్ ఖాన్ స్పెషల్ క్యామియో చేసిన సంగతి తెలిసిందే. ఇప్పుడు షారుక్ ఖాన్ ‘జైలర్ 2’లో భాగమైతే ఈ ప్రాజెక్ట్ స్థాయి పాన్ ఇండియా లెవల్‌లో స్కై హైకి చేరుతుందని అనడంలో ఎలాంటి సందేహం లేదు. కాకపోతే కూలీలో ఆమీర్ క్యారెక్టర్ పై విమర్శలు వచ్చాయి. డైరెక్టర్ లోకేష్ కనగరాజ్ ఒక స్టార్ హీరో క్యామియోని వేస్ట్ చేశారని, సరిగ్గా ఉపయోగించుకోలేదని ట్రోల్ చేశారు. ఇప్పుడు జైలర్-2లో షారుక్ నటించేది నిజమే అయితే.. నెల్సన్ దిలీప్‌ ఎలాంటి రోల్ లో ప్రజెంట్ చేస్తారో అనే డిస్కషన్ మొదలైంది.

సన్ పిక్చర్స్ బ్యానర్ లో కళానిధి మారన్ ‘జైలర్ 2’ చిత్రాన్ని రూపొందిస్తున్నారు. ఇందులో ఎస్.జె సూర్య, యోగిబాబు, మిరానా కీలక పాత్రలు పోషిస్తున్నారు. విద్యా బాలన్, మిథున్ చక్రవర్తి, అన్నా రాజన్ కూడా నటిస్తున్నట్లు సమాచారం. అనిరుధ్ రవిచందర్ ఈ సినిమాకి సంగీతం సమకూరుస్తున్నారు. ఇప్పటికే విడుదలైన అనౌన్స్ మెంట్ వీడియోకి మంచి రెస్పాన్స్ వచ్చింది. వచ్చే ఏడాది ద్వితీయార్థంలో ఈ చిత్రం ప్రేక్షకుల ముందుకు రానుంది.

Follow us