Dadasaheb Phalke Award: సూపర్‌స్టార్ మోహ‌న్‌లాల్‌కు దాదా సాహెబ్ ఫాల్కే అవార్డు!

Dadasaheb Phalke Award: భారతీయ చలనచిత్ర పరిశ్రమలో అత్యున్నత పురస్కారమైన దాదా సాహెబ్ ఫాల్కే అవార్డు (Dadasaheb Phalke Award) ఈ ఏడాది మలయాళీ సూపర్‌స్టార్‌ మోహ‌న్‌లాల్‌ను వరించింది. భారత ప్రభుత్వం సినిమా రంగానికి ఆయన చేసిన విశేష కృషికి గాను ఈ ప్రతిష్టాత్మక అవార్డును ప్రకటించింది. నాలుగు దశాబ్దాలకు పైగా సినీ జీవితంలో ఆయన చూపించిన అద్భుతమైన ప్రతిభ, వైవిధ్యమైన పాత్రలు, భారతీయ సినిమాకు అందించిన సేవలను గుర్తించి ఈ గౌరవం దక్కింది.

కేరళలోని తిరువనంతపురంలో జన్మించిన మోహన్‌లాల్ 1980లో వచ్చిన ‘మంజిల్‌ విరింజ్ పౌవ్‌కల్’ చిత్రంతో నటుడిగా అడుగుపెట్టారు. ఆ తర్వాత ఆయన వెనుతిరిగి చూడలేదు. నటుడిగా, నిర్మాతగా, గాయకుడిగా, ఇంకా అనేక రంగాల్లో ఆయన తన సత్తాను చాటారు. కేవలం మలయాళంలోనే కాకుండా తమిళం, తెలుగు, కన్నడ, హిందీ చిత్రాల్లో కూడా నటించి దేశవ్యాప్తంగా అభిమానులను సంపాదించుకున్నారు.

Also Read: GST Effect : గ్యాస్ సిలిండర్ ధర తగ్గుతుందా?

గ్రాండ్ మాస్టర్‌గా ప్రసిద్ధి చెందిన మోహన్‌లాల్ తనదైన సహజ నటనతో ఎందరో ప్రేక్షకులను ఆకట్టుకున్నారు. ఆయన నటించిన కొన్ని ముఖ్యమైన చిత్రాల్లో ‘భారతం’, ‘వనప్రస్థం’, ‘కిరీడం’, ‘దేవాసురం’. ఈ చిత్రాల్లో ఆయన నటన విమర్శకుల ప్రశంసలు పొందింది. ‘భారతం’, ‘వనప్రస్థం’ చిత్రాలకు గాను ఉత్తమ నటుడిగా రెండుసార్లు జాతీయ అవార్డులను అందుకున్నారు. అంతేకాకుండా నాలుగు జాతీయ చలనచిత్ర పురస్కారాలు, తొమ్మిది కేరళ రాష్ట్ర చలనచిత్ర పురస్కారాలు, అనేక ఫిల్మ్‌ఫేర్ అవార్డులు, ఇతర గౌరవాలను పొందారు.

మోహన్‌లాల్‌కు దాదా సాహెబ్ ఫాల్కే అవార్డు ప్రకటించడంతో సినీ పరిశ్రమ, అభిమానులు ఆనందం వ్యక్తం చేస్తున్నారు. భారతీయ సినిమాకు ఆయన చేసిన సేవలు, కష్టపడి పనిచేసే తత్వం, ఇంకా వినయ స్వభావం చాలామందికి స్ఫూర్తినిచ్చాయి. ఈ అవార్డు మలయాళీ చిత్ర పరిశ్రమకే కాకుండా భారతీయ సినిమాకు లభించిన గౌరవంగా భావిస్తున్నారు. ఈ పురస్కారం ద్వారా ఆయన కృషికి తగిన గుర్తింపు లభించిందని పలువురు సినీ ప్రముఖులు పేర్కొన్నారు. ఈ ఏడాది చివర్లో జరిగే జాతీయ చలనచిత్ర పురస్కారాల ప్రదానోత్సవంలో రాష్ట్రపతి చేతుల మీదుగా ఆయన ఈ అవార్డును అందుకోనున్నారు. ఈ సందర్భంగా భారత ప్రభుత్వం మోహ‌న్‌లాల్‌ను సత్కరిస్తుంది. ఈ ప్రతిష్టాత్మక అవార్డును అందుకున్న వారిలో ఆయన కూడా ఒకరవుతారు.