గుణ శేఖర్ ‘యుఫోరియా’ ఎలా ఉందంటే !!

Euphoria

Euphoria Telugu : దర్శకుడు గుణశేఖర్ అనగానే మనకు ‘చూడాలని ఉంది’, ‘ఒక్కడు’ వంటి భారీ చిత్రాలు గుర్తొస్తాయి. అయితే ఈసారి ఆయన రూట్ మార్చి, నేటి సమాజంలో యువతను పట్టిపీడిస్తున్న డ్రగ్స్ సమస్య నేపథ్యంలో ‘యుఫోరియా’ చిత్రం తెరకెక్కించారు. నేటి తరం యువత డ్రగ్స్ వంటి వ్యసనాలకు బానిసలైతే వారి భవిష్యత్తు ఎంత దారుణంగా మారుతుందనే సున్నితమైన అంశాన్ని గుణశేఖర్ ఈ సినిమాలో చర్చించారు. డ్రగ్స్ మత్తులో యువత చేసే పొరపాట్లు, అకృత్యాలు వారి జీవితాలనే కాకుండా వారి కుటుంబాలను కూడా ఎలా తలకిందులు చేస్తాయనేది కథాంశం. ఈ చిత్రంలో భూమిక, సారా తమ నటనతో ఆకట్టుకున్నారు. ముఖ్యంగా యువతను ఆలోచింపజేసే సీన్లు, సమాజానికి ఇచ్చే సందేశం బాగున్నాయి. క్లైమాక్స్ సన్నివేశాలు భావోద్వేగంగా సాగుతూ ప్రేక్షకులను మెప్పిస్తాయి.

అయితే, బలమైన కథాంశం ఉన్నప్పటికీ, దానిని వెండితెరపై ఆసక్తికరంగా మలచడంలో దర్శకుడు గుణశేఖర్ కొంత తడబడ్డారు. మొదటి భాగం పాత్రల పరిచయంతో సాఫీగా సాగినప్పటికీ, సెకండాఫ్ వచ్చేసరికి స్క్రీన్ ప్లే గందరగోళానికి గురిచేస్తుంది. కథనం నెమ్మదించడం మరియు కొన్ని సన్నివేశాల్లో స్పష్టత లోపించడం సినిమా వేగాన్ని తగ్గించాయి. సినిమాలోని చాలా సన్నివేశాలు నిజ జీవిత సంఘటనల ఆధారంగా తీయడం వల్ల, ఆ తర్వాత ఏం జరుగుతుందో ప్రేక్షకులు ముందే ఊహించేలా (Predictable) ఉన్నాయి. ఇది సినిమాలోని ఉత్కంఠను దెబ్బతీసింది.

సాంకేతిక విభాగాల విషయానికి వస్తే, మ్యూజిక్ పర్వాలేదనిపిస్తుంది. నేటి ట్రెండ్‌కు తగ్గట్లుగా నేపథ్య సంగీతం ఉన్నా, పాటలు మాత్రం అంతగా గుర్తుండిపోవు. సినిమాటోగ్రఫీ మరియు నిర్మాణ విలువలు బాగున్నాయి. డ్రగ్స్ వల్ల కలిగే అనర్థాలను కళ్లకు కట్టినట్లు చూపించడంలో దర్శకుడు సక్సెస్ అయ్యారు కానీ, ఒక కమర్షియల్ సినిమాగా ప్రేక్షకులను కూర్చోబెట్టే విషయంలో మాత్రం పూర్తిస్థాయిలో మెప్పించలేకపోయారు. సందేశాత్మక చిత్రాలను కోరుకునే వారికి, యువతకు ఈ సినిమా ఒక పాఠంలా ఉపయోగపడుతుంది.

Follow us