Chiranjeevi Political Re Entry : నన్ను రాజకీయాల్లోకి లాగొద్దు – చిరంజీవి స్వీట్ వార్నింగ్
Chiranjeevi Political Re Entry : తనను రాజకీయాల్లోకి లాగొద్దని పరోక్షంగా స్పష్టం చేశారు. తాను రాజకీయాలకు దూరంగా ఉన్నప్పటికీ, కొందరు రాజకీయ నాయకులు చేసే విమర్శలకు స్పందించనని
- By Sudheer Published Date - 05:02 PM, Wed - 6 August 25
మెగాస్టార్ చిరంజీవి (Chiranjeevi) రాజకీయాలకు దూరంగా ఉన్నప్పటికీ, ఆయనపై రాజకీయ విమర్శలు మాత్రం ఆగడం లేదు. ఇటీవల జూబ్లీ హిల్స్ ఉప ఎన్నికలలో (Jubilee Hills by-Election) కాంగ్రెస్ పార్టీ తరపున చిరంజీవి పోటీ చేయవచ్చని పుకార్లు రావడంతో ఈ విమర్శలు మరింత పెరిగాయి. ఈ నేపథ్యంలో, ఫోనిక్స్ సంస్థ ఆధ్వర్యంలో జరిగిన రక్తదాన శిబిరం కార్యక్రమంలో చిరంజీవి మాట్లాడుతూ.. తనను రాజకీయాల్లోకి లాగొద్దని పరోక్షంగా స్పష్టం చేశారు. తాను రాజకీయాలకు దూరంగా ఉన్నప్పటికీ, కొందరు రాజకీయ నాయకులు చేసే విమర్శలకు స్పందించనని, తాను చేసే మంచి తనకు శ్రీరామరక్ష అని పేర్కొన్నారు. ఈ వ్యాఖ్యలు జూబ్లీ హిల్స్ ఉప ఎన్నికలు, కాంగ్రెస్ పార్టీలో ఆయన క్రియాశీలక పాత్ర గురించి వచ్చిన పుకార్లకు సమాధానంగా భావించవచ్చు.
జూబ్లీ హిల్స్ ఎమ్మెల్యే మాగంటి గోపినాథ్ మరణంతో ఆ స్థానానికి ఉప ఎన్నికలు అనివార్యం కాగా, కాంగ్రెస్ పార్టీ చిరంజీవిని బరిలోకి దింపాలని ఆలోచిస్తున్నట్లు సోషల్ మీడియాలో పెద్ద ఎత్తున ప్రచారం జరిగింది. చిరంజీవి నిరాకరిస్తే మరో సినీ సెలబ్రిటీని బరిలోకి దింపాలని కాంగ్రెస్ భావిస్తున్నట్లు కూడా వార్తలు వచ్చాయి. ఈ ప్రచారం నేపథ్యంలో చిరంజీవిపై కొందరు విమర్శలు గుప్పించారు. తనపై వస్తున్న విమర్శలకు స్పందించిన చిరంజీవి, ఒక మహిళా అభిమాని తన నటనకు కాకుండా వ్యక్తిత్వానికి అభిమాని అయిందని చెప్పి, తాను చేసే మంచి పనులే తనకు రక్షణ అని వివరించారు.
చిరంజీవి వ్యాఖ్యలు రాజకీయాల నుండి తన వైఖరిని స్పష్టం చేయడమే కాకుండా, తన చుట్టూ జరుగుతున్న రాజకీయ కదలికలకు దూరంగా ఉండాలన్న ఆయన కోరికను తెలియజేస్తున్నాయి. జర్నలిస్ట్ రాసిన ఆర్టికల్ స్ఫూర్తితో బ్లడ్ బ్యాంకు స్థాపించినట్లు చెప్పి, సామాజిక సేవా కార్యక్రమాలపై తనకున్న నిబద్ధతను చాటిచెప్పారు. ఈ విధంగా చిరంజీవి తన అభిమానులకు మరియు రాజకీయ నాయకులకు ఒక “స్వీట్ వార్నింగ్” ఇచ్చారని చెప్పవచ్చు. భవిష్యత్తులో రాజకీయాలపై ఎలాంటి విమర్శలు వచ్చినా తాను స్పందించనని ఆయన స్పష్టం చేశారు.
