Chiranjeevi: ఎగ్జిబిటర్లకు చిరంజీవి బిగ్ షాక్

Chiranjeevi Delivers a Big Shock to Exhibitors

తెలుగు చలనచిత్ర పరిశ్రమలో నిర్మాతలు, సింగిల్ స్క్రీన్ థియేటర్ల యజమానుల (ఎగ్జిబిటర్లు) మధ్య గత కొన్ని రోజులుగా నలుగుతున్న ‘పర్సంటేజ్ సిస్టమ్’ వివాదం క్లైమాక్స్ దశకు చేరుకుంది. ఈ సంక్షోభాన్ని పరిష్కరించి, పరిశ్రమకు మేలు చేసేందుకు మెగాస్టార్ చిరంజీవి స్వయంగా రంగంలోకి దిగారు. తెలంగాణ ఎగ్జిబిటర్ల అసోసియేషన్ ప్రతినిధులు ఈ రోజు సాయంత్రం 4 గంటలకు చిరంజీవి నివాసంలో ఆయనతో ప్రత్యేకంగా సమావేశం కానుండటంతో ఫిలింనగర్‌లో సర్వత్రా ఆసక్తి నెలకొంది.

ఏమిటీ వివాదం?
ప్రస్తుతం మల్టీప్లెక్స్‌లలో సినిమా కలెక్షన్ల ఆధారంగా నిర్మాతలు, థియేటర్ల యజమానులు వాటాలు (పర్సంటేజ్) పంచుకుంటున్నారు. కానీ, సింగిల్ స్క్రీన్లకు మాత్రం సినిమా ఫలితంతో సంబంధం లేకుండా పాత పద్ధతిలోనే అద్దె (ఫిక్స్‌డ్ రెంటల్) చెల్లిస్తున్నారు. దీనిపై ఎగ్జిబిటర్లు తీవ్ర అభ్యంతరం వ్యక్తం చేస్తున్నారు. ఓటీటీల ప్రభావం, భారీగా పెరిగిన కరెంట్ బిల్లులు, థియేటర్ల నిర్వహణ ఖర్చులతో సింగిల్ స్క్రీన్ల మనుగడ ప్రశ్నార్థకంగా మారిందని వారు ఆవేదన వ్యక్తం చేస్తున్నారు. సినిమా ఆడకపోయినా లక్షల్లో అద్దెలు కట్టలేక అప్పుల పాలవుతున్నామని, దేశంలోని ఇతర రాష్ట్రాల్లో ఉన్నట్లే తమకు కూడా రెవెన్యూ షేరింగ్ విధానం అమలు చేయాలని వారు గట్టిగా పట్టుబడుతున్నారు.

‘పెద్ది’ విడుదలపై ప్రభావం
ఈ వివాదం మెగా పవర్ స్టార్ రామ్ చరణ్ నటిస్తున్న పాన్-ఇండియా చిత్రం ‘పెద్ది’ విడుదలపై తీవ్ర ప్రభావం చూపేలా ఉంది. జూన్ 4న భారీ ఎత్తున రిలీజ్ కానున్న ఈ సినిమా నుంచే పర్సంటేజ్ విధానాన్ని కచ్చితంగా అమలు చేయాలని, లేనిపక్షంలో థియేటర్లలో సినిమాను ప్రదర్శించేది లేదని తెలంగాణ ఎగ్జిబిటర్ల సంఘం హెచ్చరించింది. గతంలో నిర్మాత దిల్ రాజు నేతృత్వంలో జరిగిన చర్చలు ఫలించకపోవడంతో వారు తమ నిర్ణయానికే కట్టుబడి ఉన్నారు. దీనికి తోడు, టికెట్ ధరల పెంపును కూడా వారు వ్యతిరేకిస్తున్నారు. అధిక రేట్లు పెడితే సామాన్య ప్రేక్షకులు థియేటర్లకు దూరమవుతారని, ఈ విషయంపై ఇప్పటికే ముఖ్యమంత్రి రేవంత్ రెడ్డికి కూడా లేఖ రాశామని వారు చెబుతున్నారు.

చిరంజీవి చొరవతో పరిష్కారం దొరికేనా?
పరిశ్రమలో ఎలాంటి సమస్య తలెత్తినా పెద్దన్న పాత్ర పోషించే చిరంజీవి, ఈసారి తన కుమారుడి సినిమా విడుదల ఇరకాటంలో పడటం, అదే సమయంలో వందలాది థియేటర్ల యజమానుల భవిష్యత్తును దృష్టిలో ఉంచుకుని ఈ సమస్య పరిష్కారానికి నడుం బిగించారు. నిర్మాతల మండలి, ప్రొడ్యూసర్స్ గిల్డ్‌తో చర్చించి, ఇటు నిర్మాతలకు నష్టం జరగకుండా, అటు ఎగ్జిబిటర్లకు న్యాయం జరిగేలా ఒక మధ్యేమార్గం కనుగొంటారని ఇండస్ట్రీ వర్గాలు ఆశిస్తున్నాయి. ఈ మెగా భేటీ తర్వాతైనా ఈ వివాదానికి తెరపడి, ‘పెద్ది’ సినిమా విడుదలకు మార్గం సుగమం అవుతుందో లేదో వేచి చూడాలి.

Follow us