అవతార్ ఫైర్ అండ్ యాష్ రివ్యూ!

Avatar Fire And Ash

Avatar  Fire and Ash : డిసెంబర్ 19న ప్రపంచవ్యాప్తంగా థియేటర్లలోకి వచ్చిన జేమ్స్ కామెరూన్ ప్రతిష్టాత్మక చిత్రం ‘అవతార్: ఫైర్ అండ్ యాష్’కు మిశ్రమ స్పందన లభిస్తోంది. భారీ అంచనాల మధ్య విడుదలైన ఈ సినిమా ఓపెనింగ్స్ పరంగా బాక్సాఫీస్ వద్ద దూకుడు చూపుతోంది. ప్రేక్షకులు విజువల్స్, CGI, సౌండ్ డిజైన్, పండోరా ప్రపంచాన్ని విస్తరించిన తీరు అద్భుతమని ప్రశంసిస్తున్నారు. అయితే కథ పరంగా కొత్తదనం లేదని, గత భాగాల తరహాలోనే సాగిందని కొందరు అభిప్రాయపడుతున్నారు. నిడివి ఎక్కువగా ఉందన్న విమర్శలూ వినిపిస్తున్నాయి. అయినప్పటికీ సిల్వర్ స్క్రీన్‌పై లభించే విజువల్ అనుభవం కోసం ఈ సినిమాను థియేటర్‌లో చూడదగ్గ చిత్రంగా అభిమానులు చెబుతున్నారు.

• థియేటర్లలోకి వచ్చిన ‘అవతార్ 3’
• విజువల్ వండర్‌కి ఆడియన్స్ ఫిదా
• కథలో కొత్తదనం లేదంటోన్న ప్రేక్షకులు

ప్రపంచ సినీ అభిమానులు ఎంతో ఆసక్తిగా ఎదురుచూసిన జేమ్స్ కామెరూన్ ప్రతిష్టాత్మక ప్రాజెక్ట్ ‘అవతార్: ఫైర్ అండ్ యాష్’ ( Avatar 3 ) శుక్రవారం (డిసెంబర్ 19) ప్రపంచవ్యాప్తంగా థియేటర్లలోకి వచ్చింది. ఇప్పటికే రెండు భాగాలతో బాక్సాఫీస్ చరిత్ర సృష్టించిన అవతార్ ఫ్రాంచైజీకి ఇది మూడో చిత్రం కావడంతో రిలీజ్‌కు ముందే అంచనాలు ఆకాశాన్ని తాకాయి. ముఖ్యంగా హాలీవుడ్‌తో పాటు ఇండియాలోనూ ఈ సినిమాకు భారీ క్రేజ్ కనిపించింది. అడ్వాన్స్ బుకింగ్స్, ఆన్‌లైన్ ట్రెండ్స్ చూస్తే అవతార్ 3 ఓపెనింగ్స్ విషయంలో భారీ రికార్డులు సృష్టిస్తుందనే అంచనాలు వినిపించాయి. ట్రేడ్ వర్గాల లెక్కల ప్రకారం, ఈ చిత్రం తొలి వారాంతంలోనే ప్రపంచవ్యాప్తంగా వందల మిలియన్ డాలర్ల గ్రాస్ సాధించే అవకాశాలు ఉన్నాయని అంచనా వేశారు. గత రెండు భాగాలు రెండు బిలియన్ డాలర్లకు పైగా వసూళ్లు సాధించిన నేపథ్యంలో, ఈ భాగం కూడా అదే దారిలో దూసుకెళ్తుందనే నమ్మకం వ్యక్తమైంది.

అయితే భారీ అంచనాల మధ్య విడుదలైన ‘అవతార్: ఫైర్ అండ్ యాష్’కు మిశ్రమ స్పందన లభిస్తోంది. తొలి షోలు పడిన వెంటనే ప్రేక్షకులు సోషల్ మీడియా వేదికగా తమ అభిప్రాయాలను పంచుకుంటున్నారు. చాలా మంది ఈ సినిమాను విజువల్ వండర్‌గా అభివర్ణిస్తున్నారు. పండోరా ప్రపంచాన్ని మరింత విస్తృతంగా చూపించిన తీరు, కొత్త తెగల పరిచయం, యాక్షన్ సన్నివేశాల స్కేల్ ప్రేక్షకులను ఆకట్టుకుంటున్నాయని కామెంట్స్ చేస్తున్నారు. ముఖ్యంగా జేమ్స్ కామెరూన్ మార్క్ మేకింగ్, అద్భుతమైన గ్రాఫిక్స్, సౌండ్ డిజైన్ సినిమాను థియేటర్లలో ప్రత్యేక అనుభూతిగా మార్చాయని ప్రశంసలు వెల్లువెత్తుతున్నాయి.

అయితే కథ పరంగా మాత్రం ప్రేక్షకులు పూర్తిగా సంతృప్తి వ్యక్తం చేయడం లేదు. గత భాగాలైన ‘అవతార్’ మరియు ‘అవతార్: ది వే ఆఫ్ వాటర్’లో కనిపించిన కథా అంశాలే మళ్లీ ఈ చిత్రంలో రిపీట్ అయినట్లుగా అనిపించిందని నెటిజన్లు అభిప్రాయపడుతున్నారు. “విజువల్స్ అద్భుతం కానీ కథలో కొత్తదనం లేదు” అనే కామెంట్స్ ఎక్కువగా కనిపిస్తున్నాయి. మరికొందరు మాత్రం రెండో భాగంతో పోలిస్తే మూడో భాగం కాస్త మెరుగ్గా అనిపించిందని, కానీ మొదటి ‘అవతార్’ స్థాయిలో మాత్రం లేదని పేర్కొంటున్నారు.

నిడివి విషయంలోనూ భిన్నాభిప్రాయాలు వ్యక్తమవుతున్నాయి. సుమారు మూడు గంటలకు పైగా రన్‌టైమ్ ఉండటంతో, కొన్ని చోట్ల కథ నెమ్మదిగా సాగుతుందనే విమర్శలు వస్తున్నాయి. “ఎమోషనల్ సీన్స్ బాగున్నాయి కానీ లెంగ్త్ కొంచెం కట్ చేసి ఉంటే ఇంకా బాగా ఉండేదేమో” అని కొంతమంది అభిప్రాయపడుతున్నారు. అయినప్పటికీ, థియేటర్‌లో సిల్వర్ స్క్రీన్‌పై కనిపించే విజువల్ ఎక్స్‌పీరియన్స్ కోసం ఈ సినిమా తప్పకుండా చూడాల్సిందే అన్న మాట కూడా వినిపిస్తోంది. మొత్తంగా చూస్తే, ‘అవతార్: ఫైర్ అండ్ యాష్’ కథ పరంగా వావ్ ఫ్యాక్టర్ అందరికీ కలిగించకపోయినా, విజువల్స్, టెక్నికల్ విలువలు, గ్రాండ్ ప్రెజెంటేషన్ విషయంలో మాత్రం మరోసారి జేమ్స్ కామెరూన్ తన స్థాయిని చాటుకున్నారని చెప్పాలి. మిక్స్‌డ్ టాక్ మధ్య కూడా ఈ సినిమా బాక్సాఫీస్ వద్ద భారీ ఓపెనింగ్ దిశగా దూసుకెళ్తోందని ట్రేడ్ వర్గాలు అంచనా వేస్తున్నాయి. ఇక లాంగ్ రన్‌లో ఈ చిత్రం ఎలాంటి వసూళ్లు సాధిస్తుందో, అవతార్ ఫ్రాంచైజీ మూడో భాగం ఏ స్థాయిలో నిలుస్తుందో చూడాల్సిందే.

Follow us