Akhanda 2 New Release Date : ఈరోజు రాత్రికే ‘అఖండ 2’ ప్రీమియర్ షోలు!

Akhanda 2

Akhanda 2:  అఖండ 2 విడుదల చివరి నిమిషంలో వాయిదా పడటంతో బాలకృష్ణ అభిమానులు తీవ్ర నిరాశ వ్యక్తం చేశారు. అయితే విశ్వసనీయ సమాచారం ప్రకారం, సినిమా విడుదలను ఆపిన ఫైనాన్షియల్ సమస్యలు మేకర్స్ పూర్తిగా క్లియర్ చేసినట్లు తెలుస్తోంది. ఫిర్యాదుదారులు చెల్లింపులు అందినట్లు కోర్టుకు తెలియజేసిన వెంటనే మద్రాస్ హైకోర్టు స్టే ఎత్తివేయనుంది. ఇదే సమయంలో నైజాంలో డిసెంబర్ 6వ తేదీకి మాత్రమే బుకింగ్స్ ప్రారంభం కావడం, 5వ తేదీ సాయంత్రం నుంచే ప్రీమియర్ షోలు ప్రారంభమయ్యే అవకాశాలను బలపరుస్తోంది. మొత్తంగా సినిమా కేవలం 24 గంటల ఆలస్యంతో విడుదలయ్యే అవకాశం కనిపిస్తోంది.

బోయపాటి శ్రీను–బాలకృష్ణ కాంబినేషన్‌లో భారీ అంచనాలతో రూపొందిన ‘ అఖండ 2 ’ విడుదల చివరి నిమిషంలో వాయిదా పడటంతో అభిమానుల్లో తీవ్ర నిరాశ నెలకొంది. డిసెంబర్ 5న ప్రపంచ వ్యాప్తంగా గ్రాండ్ రిలీజ్ అవుతుందని అందరూ సిద్ధమవుతున్న సమయంలో ప్రీమియర్ షోల్ని రద్దు చేయడంతో బాలయ్య అభిమానులు సోషల్‌మీడియా వేదికగా తీవ్ర ఆగ్రహం వ్యక్తం చేస్తున్నారు. “ఎన్నాళ్లుగానో ఎదురు చూసిన సినిమా ఇలా చివరి నిమిషంలో ఆగిపోతుందని అస్సలు ఊహించలేదు” అంటూ ఫ్యాన్స్ అసహనం వ్యక్తం చేస్తున్నారు. విడుదలకు గంటల ముందు ఇలా అడ్డంకులు రావడం పట్ల పరిశ్రమలో కూడా చర్చ మొదలైంది.

ఇక ఈ గందరగోళం మధ్య ఇండస్ట్రీలో వినిపిస్తున్న తాజా విశ్వసనీయ సమాచారం ప్రకారం… సినిమాతో సంబంధం ఉన్న ఫైనాన్షియల్ ఇష్యూలు చాలా వరకు క్లియర్ అయినట్లు తెలుస్తోంది. గతంలో ఉన్న బకాయిలపై మద్రాస్ హైకోర్టు విధించిన స్టే తొలగించడానికి అవసరమైన చెల్లింపులు మేకర్స్ పూర్తిచేశారనే సమాచారం విశ్వసనీయ వర్గాల నుంచి బయటకు వస్తోంది. ఈరోజు మద్రాస్ కోర్టు తెరుచుకోగానే ఫిర్యాదుదారులు చెల్లింపులు అందినట్లు తెలియజేసిన వెంటనే స్టే ఎత్తివేయడానికి అవకాశముందని తెలుస్తోంది. దీన్నిబట్టి కోర్టు స్టే ఎత్తివేయగానే మేకర్స్ రిలీజ్‌కి ప్లాన్ చేస్తున్నట్లు తెలుస్తోంది. అన్నీ అనుకున్నట్లుగా జరిగితే ఈరోజు (డిసెంబర్ 5) సాయంత్రమే ప్రీమియర్స్ వేసి.. శనివారం యథాతథంగా రిలీజ్ చేసేందుకు ప్లాన్ చేస్తున్నారట మేకర్స్.

ఈ నేపథ్యంలోనే నైజాం బుకింగ్స్ పరిస్థితి కూడా ఈ వార్తలకు ఊతమిస్తోంది. ‘అఖండ 2’ అధికారిక రిలీజ్ డేట్ డిసెంబర్ 5 అయినప్పటికీ, ఆన్లైన్లో ఐదో తేదీకి టిక్కెట్లు కనిపించకపోవడం సినీ లవర్స్‌ని కన్‌ఫ్యూస్ చేసింది. అయితే ఆరో తేదీకి సంబంధించిన షోలు మాత్రం ఓపెన్‌ అయినట్లు కనిపిస్తున్నాయి. దీన్ని పరిశీలిస్తే ఐదో తేదీ రాత్రి ప్రీమియర్స్, ఇంకా ఆరో తేదీ నుండి రెగ్యులర్ షోలు ప్రారంభం అయ్యే అవకాశం ఉందని ట్రేడ్ వర్గాలు చెబుతున్నాయి. ‘అఖండ 2’ సినిమా విడుదల పూర్తిగా ఆగిపోలేదని, కేవలం 24 గంటల ఆలస్యంతో థియేటర్లలోకి రావచ్చని అంటున్నారు.

గతంలో కూడా ‘అఖండ 2’ సెప్టెంబర్లో వస్తుందని ప్రచారం జరిగినా, VFX పనులు పూర్తికాకపోవడంతో వాయిదా పడింది. ఇప్పుడు టెక్నికల్ కారణాలు కాకుండా ఫైనాన్షియల్ సమస్యలే విడుదలను అడ్డుకున్నాయి. అయితే సమస్యలు పరిష్కార దశలో ఉండటం అభిమానుల్లో మళ్లీ నమ్మకం పెరుగుతోంది. దీనిపై ఈరోజు మధ్యాహ్నానికి ఓ క్లారిటీ వచ్చే అవకాశముందని ఇండస్ట్రీ వర్గాలు చెబుతున్నాయి. భారీ బడ్జెట్, మాస్ మానియాతో తెరకెక్కిన చిత్రం విషయంలో మేకర్స్ నిర్లక్ష్యంగా వ్యవహరించడమే ఈ గందరగోళానికి కారణమని ఫ్యాన్స్ మండిపడుతున్నారు.

Follow us