Vishal: గవర్నర్ తీరును తప్పుబట్టిన హీరో విశాల్!

Actor Vishal Criticizes Governor's Conduct

కోలీవుడ్ నటుడు విశాల్, తమిళనాడు రాజకీయాలపై కీలక వ్యాఖ్యలు చేశారు. నటుడు విజయ్ నేతృత్వంలోని తమిళగ వెట్రి కళగం (టీవీకే) పార్టీకి ప్రభుత్వ ఏర్పాటుకు అవకాశం ఇవ్వాలని ఆయన డిమాండ్ చేశారు. దాదాపు మెజారిటీ స్థానాలు సాధించినా, విజయ్‌ను ప్రభుత్వ ఏర్పాటుకు ఆహ్వానించడానికి గవర్నర్ ఎందుకు వెనుకడుగు వేస్తున్నారని అసంతృప్తి వ్యక్తం చేశారు.

గతంలో 2017-18లో కర్ణాటక, గోవా, మణిపూర్, మేఘాలయ వంటి రాష్ట్రాల్లో అతిపెద్ద పార్టీని ప్రభుత్వ ఏర్పాటుకు ఆహ్వానించి, శాసనసభలో బలం నిరూపించుకోవాలని (ఫ్లోర్ టెస్ట్) కోరిన విషయాన్ని విశాల్ గుర్తుచేశారు. “అదే తరహాలో విజయ్‌కు ఎందుకు అవకాశం ఇవ్వడం లేదు? ప్రజా తీర్పుకు ఇదేనా గౌరవం?” అని ఆయన గవర్నర్‌ను సూటిగా ప్రశ్నించారు. రాష్ట్రానికి ప్రభుత్వం అవసరమని, గవర్నర్ పాలన కాదని ఆయన అన్నారు.

ఈ సందర్భంగా విజయ్‌కు పూర్తి మద్దతు ప్రకటిస్తూ, “విజయ్.. మీరు కచ్చితంగా ప్రభుత్వాన్ని ఏర్పాటు చేస్తారు. ఒక ఓటరుగా నేను ఇదే జరగాలని కోరుకుంటున్నాను” అని విశాల్ పేర్కొన్నారు. ఈ ప్రాథమిక హక్కులు కేవలం రాజకీయ నాయకులకే కాదని, ‘తమిళనాడు ప్రజలు’ అనే శక్తికి కూడా తెలుసని ఆయన తన అభిప్రాయాన్ని బలంగా వినిపించారు.

Follow us