భారత విమానయాన రంగంలోకి కొత్తగా మూడు ఎయిర్‌లైన్స్!

Air Journey

Airlines: భారత పౌర విమానయాన రంగంలో పోటీని పెంచే దిశగా కేంద్ర ప్రభుత్వం ఒక ముఖ్యమైన అడుగు వేసింది. కార్యకలాపాలు ప్రారంభించడానికి సిద్ధంగా ఉన్న రెండు కొత్త విమానయాన సంస్థలు AI Hindi Air, FlyExpressలకు కేంద్రం అనుమతి ఇచ్చింది. పౌర విమానయాన మంత్రిత్వ శాఖ ఈ రెండు కంపెనీలకు నో అబ్జెక్షన్ సర్టిఫికేట్ (NOC) జారీ చేసింది.

విమానయాన రంగంపై ఒత్తిడిని తగ్గించే ప్రయత్నం

ఇండిగో సంక్షోభం, ఇతర ఎయిర్‌లైన్స్‌పై పెరుగుతున్న నిర్వహణ ఒత్తిడి కారణంగా దేశీయ విమానయాన మార్కెట్లో పోటీ పరిమితంగా ఉన్న సమయంలో ఈ నిర్ణయం వెలువడింది. గత కొన్నేళ్లుగా విమాన ప్రయాణికుల సంఖ్య గణనీయంగా పెరిగినప్పటికీ అధిక వ్యయం, భారీ అప్పులు, నిర్వహణ సవాళ్ల వల్ల కొత్త సంస్థల రాక కష్టంగా మారింది. ప్రస్తుతం మార్కెట్లో ఉన్న కొన్ని కంపెనీల గుత్తాధిపత్యాన్ని తగ్గించి, సమతుల్యత తీసుకురావడమే ప్రభుత్వ ఈ నిర్ణయం వెనుక ఉన్న ప్రధాన ఉద్దేశ్యం.

Also Read: విజయ్ హజారే ట్రోఫీలో రికార్డుల విధ్వంసం.. ఇషాన్ కిషన్ మెరుపు సెంచరీ!

వీటితో పాటు ఉత్తరప్రదేశ్‌కు చెందిన Shankh Air ఇప్పటికే NOC పొందింది. ఈ సంస్థ 2026 నుండి తన వాణిజ్య విమాన సర్వీసులను ప్రారంభించే అవకాశం ఉంది. అక్టోబర్‌లో ‘ఫ్లై బిగ్’ తన సేవలను నిలిపివేసిన తర్వాత, భారత్‌లో ప్రస్తుతం కేవలం తొమ్మిది ఎయిర్‌లైన్స్ మాత్రమే యాక్టివ్‌గా ఉన్నాయి. ప్రస్తుతం భారత విమానయాన రంగం ప్రధానంగా ఇండిగో, ఎయిర్ ఇండియా గ్రూపుల నియంత్రణలో ఉంది.

ఆకాశంలో పెరగనున్న పోటీ

దేశీయ మార్కెట్లో ఇండిగో ఒక్కటే సుమారు 65 శాతం వాటాను కలిగి ఉండగా.. ఎయిర్ ఇండియా, ఎయిర్ ఇండియా ఎక్స్‌ప్రెస్‌లతో కలిపి ఈ నియంత్రణ 90 శాతానికి చేరుకుంటుంది. కొత్త కంపెనీల రాక వల్ల మార్కెట్లో పోటీ పెరగడమే కాకుండా విమాన టికెట్ల ధరలు అందుబాటులోకి వస్తాయి. సేవల నాణ్యత మెరుగుపడుతుంది. ప్రయాణికులకు మరిన్ని ఎంపికలు అందుబాటులోకి వస్తాయి. మొత్తంమీద, AI Hindi Air, FlyExpress, Shankh Air వంటి కొత్త కంపెనీల ప్రవేశం రాబోయే సంవత్సరాల్లో భారత విమానయాన పరిశ్రమకు సరికొత్త వేగాన్ని అందించే అవకాశం ఉంది.

Follow us