India Post Payments Bank: ఇక‌పై ఇంటి నుండే ఆ సర్టిఫికేట్ పొందవచ్చు!

India Post Payments Bank: ప్రభుత్వ రంగ సంస్థ అయిన ఇండియా పోస్ట్ పేమెంట్స్ బ్యాంక్ (India Post Payments Bank), ఈపీఎఫ్ఓ (ఎంప్లాయీస్ ప్రావిడెంట్ ఫండ్ ఆర్గనైజేషన్) పెన్షనర్లకు వారి ఇంటి వద్దనే డిజిటల్ జీవన ధృవీకరణ పత్రం (Digital Life Certificate) సేవలను అందించనుంది. ఈ మేరకు రెండు సంస్థల మధ్య అవగాహన ఒప్పందం కుదిరింది.

ఈ సహకారం కింద.. ఇండియా పోస్ట్ పేమెంట్స్ బ్యాంక్ తన విస్తృత నెట్‌వర్క్‌ను ఉపయోగించుకుంటుంది. ఇందులో 1.65 లక్షలకు పైగా పోస్టాఫీసులు, మూడు లక్షల మంది పోస్టల్ సర్వీస్ ప్రొవైడర్‌లు (పోస్ట్‌మ్యాన్, గ్రామీణ డాక్ సేవక్‌లు) ఉంటారు. వీరంతా బ్యాంకింగ్ పరికరాలతో సన్నద్ధమై ఉంటారు. ఈ పరికరాలు ఫేషియల్ రికగ్నిషన్ టెక్నాలజీ, ఫింగర్‌ప్రింట్ బయోమెట్రిక్ వెరిఫికేషన్ వంటి డిజిటల్ ప్రక్రియల కోసం ఉపయోగించబడతాయి. దీని ద్వారా ఈపీఎఫ్ఓ పెన్షనర్లు తమ డిజిటల్ జీవన ధృవీకరణ పత్రాన్ని సులభంగా సమర్పించడానికి సహాయం అందుతుంది.

ఒప్పందం గురించిన సమాచారం

ఇండియా పోస్ట్ పేమెంట్స్ బ్యాంక్.. ఉద్యోగుల పెన్షన్ పథకం, 1995 కింద ఉన్న పెన్షనర్లకు ఇంటి వద్దనే డిజిటల్ లైఫ్ సర్టిఫికేట్ సేవలను అందించడానికి ఈపీఎఫ్ఓతో ఈ అవగాహన ఒప్పందంపై సంతకం చేసింది. డిజిటల్ జీవన ధృవీకరణ పత్రం (DLC) పెన్షనర్లకు ధృవీకరణ కోసం ప్రతి సంవత్సరం కార్యాలయానికి రావాల్సిన అవసరాన్ని తొలగించి, ఆన్‌లైన్‌లో ధృవీకరణను పూర్తి చేయడానికి సహాయపడుతుంది. దీనితో పాటు, సాంప్రదాయ కాగితపు ధృవీకరణ పత్రాన్ని సమర్పించడానికి బ్యాంకు శాఖలకు లేదా ఈపీఎఫ్ఓ కార్యాలయాలకు వెళ్లవలసిన అవసరం కూడా ఉండదు.

Also Read: Rs 2,000 Notes: మ‌రోసారి చ‌ర్చ‌నీయాంశంగా రూ. 2 వేల నోట్లు!?

ఈ సేవ ఉచితం

విడుదల చేసిన ప్రకటన ప్రకారం.. డిజిటల్ జీవన ధృవీకరణ పత్రం జారీకి అయ్యే పూర్తి ఖర్చును ఈపీఎఫ్ఓ భరిస్తుంది. దీని వల్ల ఈ సేవ పెన్షనర్లకు ఉచితంగా లభిస్తుంది. జీవన ధృవీకరణ పత్రం జారీ చేయడంలో పట్టే సమయాన్ని తగ్గించడానికి, ఇండియా పోస్ట్ పేమెంట్స్ బ్యాంక్ ఇప్పటికే ఆధార్ ఆధారిత బయోమెట్రిక్ వెరిఫికేషన్‌ను ఉపయోగించి పెన్షనర్ల కోసం లైఫ్ సర్టిఫికేట్‌ను తయారు చేయడానికి 2020లోనే డిజిటల్ లైఫ్ సర్టిఫికేట్ డోర్‌స్టెప్ సేవను ప్రారంభించింది.

విశ్వేశ్వరన్ వ్యాఖ్యానిస్తూ.. ఈపీఎఫ్ఓతో భాగస్వామ్యం భారతదేశంలోని ప్రతి ఇంటికి అవసరమైన ఆర్థిక, పౌర సేవలను అందించాలనే IPPB లక్ష్యాన్ని ధృవీకరిస్తుంది. “మా సాంకేతికత-ఆధారిత పోస్టల్ నెట్‌వర్క్, నమ్మదగిన చివరి మైలు (Last Mile) సేవతో ఈపీఎఫ్ఓ పెన్షనర్లు ఇప్పుడు తమ జీవన ధృవీకరణ పత్రాన్ని సులభంగా సమర్పించగలరు” అని అన్నారు.

ప్రకటన ప్రకారం.. ఈ సేవను పొందడానికి ఈపీఎఫ్ఓ పెన్షనర్లు తమ పోస్ట్‌మ్యాన్ లేదా గ్రామీణ డాక్ సేవక్‌ను సంప్రదించాలి లేదా తమ సమీపంలోని పోస్టాఫీసుకు వెళ్లాలి. అక్కడ ఆధార్-అనుసంధానమైన ఫేషియల్ అథెంటికేషన్ లేదా ఫింగర్‌ప్రింట్ బయోమెట్రిక్ వెరిఫికేషన్ కోసం తమ ఆధార్ నంబర్, పెన్షన్ వివరాలను అందించాల్సి ఉంటుంది.