Familys Financial Security : టర్మ్ పాలసీతో ఫ్యామిలీ సేఫ్.. మరి ఏ సంస్థను ఎంచుకోవాలి?

Familys Financial Security

కుటుంబానికి ఆర్థిక భద్రత కల్పించేటువంటి అంశాల్లో.. అత్యంత ముఖ్యమైన నిర్ణయాల్లో టర్మ్ పాలసీ ఒకటి. ఒకటేంటీ ఇదే అత్యంత అవసరం. అయితే.. ఇక్కడ టర్మ్ ప్లాన్ తీసుకోవాలని ఉన్నప్పటికీ.. ఎందులో తీసుకోవాలనేది ఒక నిర్ణయానికి వెంటనే రాలేకపోతుంటారు. అయితే ఇక్కడ ఏమేం అంశాల్ని పరిశీలించాలి. ఏమేం బెనిఫిట్స్ గురించి ప్రధానంగా తెలుసుకోవాలి.. వంటి వివరాలు తెలుసుకుందాం.

ఏ కుటుంబానికైనా ఆర్థిక భద్రత కల్పించడంలో టర్మ్ పాలసీ ముందు వరుసలో ఉంటుంది. మన జీవితంలో ఎప్పుడు ఏం జరుగుతుందో ముందుగానే చెప్పలేం. అందుకే అన్నింటికీ ముందుగానే సిద్ధపడాల్సి ఉంటుంది. అందుకే మనకేమైనా అనుకోనిది జరిగితే.. మనమే ప్రధాన ఆదాయ వనరుగా ఉంటే.. అప్పుడు కుటుంబం ఇబ్బందుల్లో పడుతుంది కదా. ఒక్కసారిగా వారికేం చేయాలో తెలియదు. జీవనం కష్టమవుతుంది. ఇది ఊహించుకుంటేనే చాలా కష్టంగా ఉంటుందని చెప్పొచ్చు. అందుకే.. టర్మ్ ఇన్సూరెన్స్ ఇక్కడ కీలకంగా వ్యవహరిస్తుంది. పాలసీదారుడికి దురదృష్టవశాత్తు ఏమైనా జరిగినా.. కుటుంబానికి ఆసరాగా ఉంటుంది టర్మ్ పాలసీ. అయితే.. టర్మ్ ప్లాన్ ఎక్కడ తీసుకోవాలి అనేదే చాలా మందికి పెద్ద చిక్కు ప్రశ్న. అన్నీ బాగానే కనిపిస్తుంటాయి కానీ ఎక్కడో చోట ఆగిపోతుంటారు. అందుకే.. మనం ఇప్పుడు టర్మ్ ఇన్సూరెన్స్ తీసుకోవాలంటే ఏయే అంశాల్ని పరిగణనలోకి తీసుకోవాలో చూద్దాం.

క్లెయిమ్ చెల్లింపుల నిష్పత్తి టర్మ్ ప్లాన్ ప్రధాన ఉద్దేశం కష్ట సమయంలో డబ్బు అందించడం. అందుకే.. కంపెనీ క్లెయిమ్ చెల్లింపుల నిష్పత్తిని చూడటం అత్యంత కీలకం. వెబ్‌సైట్లో ఏటా ఈ రేషియోను ప్రకటిస్తారు. ఇక్కడ కనీసం 98 శాతం కంటే ఎక్కువ CSR ఉన్న కంపెనీలనే ఎంచుకోవాలి. అంటే ఇక్కడ 100 క్లెయిమ్స్‌కు 98 క్లెయిమ్స్‌ను పరిష్కరించగలిగే సంస్థలు.. మీ కుటుంబానికి భరోసా ఇవ్వగలవు.

కంపెనీ బలం- బీమా అనేది ఒక లాంగ్ టర్మ్ కాంట్రాక్ట్ అని చెప్పొచ్చు. అందుకే ఆ ఇన్సూరెన్స్ సంస్థ.. ఆర్థికంగా బలంగా ఉండి.. దివాలా తీయకుండా ఉంటేనే మనకు భరోసా. ఇక్కడ కంపెనీ ఆర్థిక బలాన్ని తెలుసుకోవాలంటే.. సాల్వెన్సీ రేషియోను చూడాలి. అంటే.. కంపెనీ ఏదైనా ఇబ్బందికర పరిస్థితుల్లో చిక్కుకున్నప్పుడు అప్పుడు తగినంత ఆర్థిక వనరులు ఉన్నాయో లేదో ఈ నిష్పత్తి తెలియజేస్తుంది. రూల్స్ ప్రకారం.. ఇది కనీసం 1.5 కంటే ఎక్కువగానే ఉండాలి.

ఫిర్యాదులు- కంపెనీలు ఎంత వరకు నాణ్యమైన సేవలు అందిస్తున్నాయో తెలుసుకునేందుకు కూడా అవకాశం ఉంటుంది. అప్పుడు.. ఆ సంస్థపై ఫిర్యాదులు ఎలా ఉన్నాయో పరిశీలించాలి. 10 వేల పాలసీలకు.. 5 కంటే తక్కువ ఫిర్యాదులు వస్తే.. అప్పుడు దానిని మంచి కంపెనీగా పరిగణించొచ్చు. ఎక్కువ ఫిర్యాదులు ఉంటే.. పాలసీ తీసుకునే ముందు ఒకటికి రెండు సార్లు ఆలోచించాలి.

ప్రీమియం- టర్మ్ ప్లాన్ విషయంలో ప్రీమియం గురించి ప్రధానంగా ఆలోచించాలి. ఇక్కడ ఒకే వయసు, ఒకే పాలసీ విలువకు.. ప్రీమియంలో తేడాలుంటాయి. కొన్ని అన్నీ ఒకేలా ఉన్నా.. ప్రీమియం ఎక్కువ వసూలు చేస్తాయి. ఇంకొన్ని దానిపైనే తక్కువ వసూలు చేస్తాయి. అయితే ఇక్కడ ప్రీమియం తక్కువగా ఉందని.. పాలసీ తీసుకోవాలని చూడొద్దు. ప్రీమియం తక్కువగా ఉంటే.. క్లెయిమ్ చెల్లింపుల్లో ఇబ్బంది పెట్టే అవకాశాలు కూడా ఉంటాయని గుర్తుంచుకోవాలి. కాబట్టి.. ప్రీమియం గురించి కాకుండా.. పాలసీ ప్రయోజనాలపై దృష్టి సారించాలి.

రైడర్స్- ప్రాథమిక పాలసీతో సహా కొన్ని అనుబంధ ప్రయోజనాలు కూడా ఉంటే.. ఆ పాలసీ మరింత ఉపయోగకరంగా ఉంటుంది. ముఖ్యంగా ప్రమాదవశాత్తు మరణం, తీవ్ర వ్యాధులకు కూడా రక్షణ కల్పించేలా పాలసీలో రైడర్స్ ఉండాలి. ఇంకా పాలసీ మొత్తాన్ని.. దశల వారీగా పెంచుకోవచ్చా లేదా అనేది కూడా చూడాలి.

ఈ రోజుల్లో దాదాపుగా అన్ని కంపెనీలు కూడా డిజిటల్ విధానంలోనే సేవల్ని అందిస్తున్నాయి. పాలసీ కొనుగోలు నుంచి మొదలు.. క్లెయిమ్ వరకు అన్నీ సులభంగా ఉండాలి. అనవసర పత్రాల్ని అడుగుతూ.. కాలయాపన చేసే వాటికి దూరంగా ఉండటమే మంచిది. కుటుంబానికి రక్షణ కల్పించేలా పాలసీ తీసుకున్నప్పుడు.. అది కష్టకాలంలో ఆదుకునేలా ఉండాలి. అందుకే.. అన్ని జాగ్రత్తలు తీసుకోవాలి.

Follow us