26 Launches: భారత మార్కెట్లోకి ఏకంగా 26 కొత్త వాహనాలు విడుదల?!
రాబోయే ఐదు ఆర్థిక సంవత్సరాల్లో (2025-2030) సంస్థ 26 కొత్త వాహనాలను విడుదల చేయనుంది. ఈ లక్ష్యంలో 20 ఇంటర్నల్ కంబస్షన్ ఇంజన్ (ICE) వాహనాలు (పెట్రోల్, డీజిల్, CNG), 6 ఎలక్ట్రిక్ వాహనాలు (EV) ఉన్నాయి.
- Author : Gopichand
Date : 18-05-2025 - 2:00 IST
Published By : Hashtagu Telugu Desk
26 Launches: హ్యుందాయ్ మోటార్ ఇండియా 2025-2030 మధ్య 26 కొత్త వాహనాల విడుదలకు (26 Launches) సన్నాహాలు చేస్తోంది. దేశంలోని ప్రముఖ కార్ తయారీ సంస్థ హ్యుందాయ్ మోటార్ ఇండియా లిమిటెడ్ (HMIL) భారత మార్కెట్లో తన ఆధిపత్యాన్ని మరింత బలోపేతం చేసేందుకు సమగ్ర ప్రణాళికలతో సిద్ధమవుతోంది. రాబోయే ఐదు ఆర్థిక సంవత్సరాల్లో (2025-2030) సంస్థ 26 కొత్త వాహనాలను విడుదల చేయనుంది. ఈ లక్ష్యంలో 20 ఇంటర్నల్ కంబస్షన్ ఇంజన్ (ICE) వాహనాలు (పెట్రోల్, డీజిల్, CNG), 6 ఎలక్ట్రిక్ వాహనాలు (EV) ఉన్నాయి. ఈ లైనప్లో సరికొత్త మోడళ్లు, మోడల్ అప్గ్రేడ్లు, కొత్త డిజైన్లతో కూడిన వాహనాలు ఉంటాయి. ఇవన్నీ కస్టమర్ల అవసరాలను దృష్టిలో ఉంచుకుని రూపొందించనున్నారు.
హైబ్రిడ్ కార్ల ప్రవేశం
మారుతి సుజుకి, టయోటా లాంటి సంస్థలతో పోటీపడేందుకు హ్యుందాయ్ కూడా స్ట్రాంగ్ హైబ్రిడ్ మోడళ్లను పరిచయం చేయడానికి సన్నాహాలు చేస్తోంది. అయితే, ఈ హైబ్రిడ్ మోడళ్ల విడుదలకు ఇంకా నిర్దిష్ట టైమ్లైన్ ప్రకటించలేదు. నివేదికల ప్రకారం.. రాబోయే నెలల్లో విడుదల కానున్న 8 మోడళ్లలో కొన్ని హైబ్రిడ్ ఆప్షన్లతో రావచ్చు. దీంతో హ్యుందాయ్ తొలిసారిగా భారతదేశంలో హైబ్రిడ్ సెగ్మెంట్లోకి అడుగుపెట్టనుంది. ఈ విషయంపై హ్యుందాయ్ మోటార్ ఇండియా మేనేజింగ్ డైరెక్టర్, సీఈఓ ఉన్సూ కిమ్ మాట్లాడుతూ.. “వచ్చే ఆర్థిక సంవత్సరం 2030 నాటికి మేము 26 ఉత్పత్తులను విడుదల చేస్తాము. ఇందులో కొత్త మోడళ్లు, పూర్తి మోడల్ మార్పులు, ఉత్పత్తి మెరుగుదలలు ఉంటాయి. ఇందులో 20 ICE వాహనాలు, 6 EVలు ఉంటాయి” అని తెలిపారు. రాబోయే సెప్టెంబర్లో జరిగే ఇన్వెస్టర్ డే సందర్భంగా భవిష్యత్ వ్యూహాలు, ప్రణాళికలపై వివరణాత్మక సమాచారం పంచుకుంటామని కంపెనీ వెల్లడించింది.
Also Read: EPFO: పీఎఫ్ ఖాతా ఉన్నవారికి మరో గుడ్ న్యూస్.. ఇకపై మిస్డ్ కాల్తో!
ఎగుమతులపై దృష్టి
భారత మార్కెట్లో సవాళ్లను అధిగమించడానికి హ్యుందాయ్ ఎగుమతులను పెంచే వ్యూహాన్ని అవలంబిస్తోంది. జనవరి-మార్చి త్రైమాసికంలో కంపెనీ ఎగుమతులు 14% పెరిగాయి. దీనివల్ల మొత్తం విక్రయాలలో క్షీణత కేవలం 1%కి పరిమితమైంది. హ్యుందాయ్ ఈ ఆర్థిక సంవత్సరం (2024-25) నాల్గవ త్రైమాసికంలో దేశీయ మార్కెట్లో 1,53,550 వాహనాలను విక్రయించింది. ఇది గత ఆర్థిక సంవత్సరం (2023-24) ఇదే కాలంలో 1,60,317 యూనిట్లతో పోలిస్తే 4% తగ్గింది. అదే సమయంలో ఎగుమతులు 33,400 యూనిట్ల నుంచి 38,100 యూనిట్లకు పెరిగాయి.
2024-25 ఆర్థిక సంవత్సరంలో హ్యుందాయ్ మోటార్ ఇండియా నికర లాభం 7% తగ్గి 5,640 కోట్ల రూపాయలకు చేరింది. ఇది 2023-24లో 6,060 కోట్ల రూపాయలుగా ఉంది. కంపెనీ ఆదాయం 69,829 కోట్ల రూపాయల నుంచి 69,193 కోట్ల రూపాయలకు స్వల్పంగా తగ్గింది. ఈ సవాళ్లు ఉన్నప్పటికీ హ్యుందాయ్ భారతదేశంలో రెండవ అతిపెద్ద కార్ తయారీ సంస్థగా తన స్థానాన్ని నిలబెట్టుకుంది. మారుతి సుజుకి మొదటి స్థానంలో ఉంది.
Follow us
