రాజకీయ లబ్ధి కోసమే జల వివాదం

Telugu States Water Dispute

ఆంధ్రప్రదేశ్ మరియు తెలంగాణ రాష్ట్రాల మధ్య మరోసారి జల జగడం రాజకీయ ప్రకంపనలు సృష్టిస్తోంది. తెలుగు రాష్ట్రాల మధ్య నీటి పంపిణీ అంశం కేవలం సాంకేతికమైనది మాత్రమే కాదు, అది భావోద్వేగాలతో కూడిన రాజకీయ అంశంగా మారింది. ఆంధ్రప్రదేశ్ జలవనరుల శాఖ మంత్రి నిమ్మల రామానాయుడు ఈ వివాదం పై మాట్లాడుతూ, గోదావరి నది నుండి ఏటా సుమారు 3,000 టీఎంసీల నీరు వృధాగా సముద్రం పాలు అవుతోంది. ఇందులో కేవలం 200 టీఎంసీలను రాయలసీమ అవసరాల కోసం వాడుకోవాలని ఏపీ ప్రభుత్వం భావిస్తుంటే, తెలంగాణ నేతలు అభ్యంతరం తెలపడంపై ఏపీ ప్రభుత్వం విస్మయం వ్యక్తం చేస్తోంది. కాళేశ్వరం ప్రాజెక్టు ద్వారా తెలంగాణ నీటిని వాడుకుంటున్నప్పుడు, దిగువన ఉన్న పోలవరం లేదా ఇతర ప్రాజెక్టుల ద్వారా ఆంధ్రప్రదేశ్ తన వాటాను వాడుకోవడంలో తప్పేముందని ఏపీ ప్రభుత్వం ప్రశ్నిస్తోంది. ముఖ్యంగా రాయలసీమ వంటి కరువు ప్రాంతాలకు నీరందించే విషయంలో రాజకీయాల కంటే ప్రజల ప్రయోజనాలకే పెద్దపీట వేయాలని కూటమి ప్రభుత్వం స్పష్టం చేస్తోంది.

Ramohan

రాయలసీమ ఎత్తిపోతల పథకం (RLS) నిలిపివేతకు సంబంధించి ప్రస్తుతం జరుగుతున్న ప్రచారంపై వాస్తవాలు భిన్నంగా ఉన్నాయి. 2020లో నాటి వైఎస్సార్సీపీ ప్రభుత్వం ఎటువంటి పర్యావరణ అనుమతులు లేకుండా, కేవలం రాజకీయ ప్రచారం కోసమే ఈ ప్రాజెక్టు పనులు చేపట్టిందని కూటమి ప్రభుత్వం ఆరోపిస్తోంది. జగన్ ప్రభుత్వం చేసిన హడావుడి వల్లే తెలంగాణ ప్రభుత్వం ఎన్జీటీ (NGT) మరియు కేంద్ర ప్రభుత్వానికి ఫిర్యాదు చేసే అవకాశం దక్కిందని, ఫలితంగా 2020లోనే ఈ ప్రాజెక్టుపై స్టే వచ్చిందని గణాంకాలు చెబుతున్నాయి. 2024లో చంద్రబాబు ప్రభుత్వం రాకముందే కేంద్రం ఈ పనులను నిలిపివేసింది. గత ఐదేళ్లలో రాయలసీమ ప్రాజెక్టుల కోసం కేవలం 2,000 కోట్లు మాత్రమే ఖర్చు చేసిన జగన్ ప్రభుత్వం, రాయలసీమకు తీరని ద్రోహం చేసిందని, కానీ ప్రస్తుత ప్రభుత్వం కేవలం ఏడాదిన్నర కాలంలోనే 8,000 కోట్లు ఖర్చు చేసి ప్రాజెక్టులను పరుగులు పెట్టిస్తోందని ఏపీ నేతలు వివరిస్తున్నారు.

తెలంగాణ ముఖ్యమంత్రి రేవంత్ రెడ్డి చేసిన వ్యాఖ్యలు చూస్తే చంద్రబాబు తనపై గౌరవంతో రాయలసీమ లిఫ్ట్ పనులు ఆపేశారన్న మాటలు ఏపీలో తీవ్ర దుమారం రేపుతున్నాయి. ఇది కేవలం తెలంగాణలో రాజకీయ లబ్ధి కోసం ఆడుతున్న డ్రామాగా ఏపీ ప్రజలు భావిస్తున్నారు. నిజానికి, హంద్రీనీవా వంటి కీలక ప్రాజెక్టులను రికార్డు స్థాయిలో పూర్తి చేసిన ఘనత చంద్రబాబుదేనని, పుంగనూరు, మడకశిర బ్రాంచ్ కెనాల్స్ ద్వారా చిట్టచివరి చెరువులకు కృష్ణమ్మ నీటిని చేర్చిన చరిత్ర ఆయనదని కూటమి నేతలు గుర్తు చేస్తున్నారు. శ్రీకృష్ణదేవరాయల పాలన తర్వాత రాయలసీమ చెరువులు జలకళతో కళకళలాడుతున్నాయంటే అది చంద్రబాబు విజన్ వల్లే సాధ్యమైందని వారు వాదిస్తున్నారు. పొరుగు రాష్ట్రాల రాజకీయాల్లో చంద్రబాబు పేరును వాడుకుంటూ అటు తెలంగాణ, ఇటు ఏపీలోని ప్రతిపక్షాలు పబ్బం గడుపుకోవాలని చూస్తున్నాయని, కానీ ఏపీ నీటి హక్కుల విషయంలో రాజీ పడే ప్రసక్తే లేదని ప్రభుత్వం స్పష్టం చేస్తోంది.

Follow us