Kadambari Jatwani case : నేడు సీఐడీ ఎదుటకు ఆ ఇద్దరు మాజీ పోలీస్ ఉన్నతాధికారులు

Kadambari Jatwani case : తెలుగు రాష్ట్రాల్లో పెద్ద సంచలనం రేపిన నటి కాదంబరి జత్వానీ కేసు మరో కీలక దశకు చేరుకుంది. ఈ కేసులో నిందితులుగా ఉన్న ఇద్దరు మాజీ ఐపీఎస్ అధికారులు కాంతిరాణా టాటా, విశాల్ గున్నీలు ఈరోజు విజయవాడ సీఐడీ కార్యాలయంలో అధికారుల ఎదుట విచారణకు హాజరయ్యే అవకాశముంది. సీఐడీ అధికారులు వారిద్దరికీ ఇటీవల నోటీసులు జారీ చేసిన నేపథ్యంలో, సోమవారం విచారణ జరగనుంది. నటి కాదంబరి జత్వానీ, ఆమె కుటుంబ సభ్యులు గత వైసీపీ ప్రభుత్వ హయాంలో తప్పుడు కేసుల బాటలో చిక్కుకుని, అక్రమంగా అరెస్టుకు గురైనట్లు ఆరోపణలు రావడంతో ఈ కేసు వెలుగులోకి వచ్చింది. ఈ నేపథ్యంలో, ఇప్పటికే ముగ్గురు ఐపీఎస్ అధికారులతో పాటు పలువురు దిగువ స్థాయి పోలీసు అధికారులను ప్రభుత్వం సస్పెండ్ చేసింది.

Read Also: AP Liqour Scam : జగన్ చుట్టూ బిగిస్తున్న ఉచ్చు

ఈ కేసులో అత్యంత కీలకంగా భావించబడుతున్న మాజీ ఇంటెలిజెన్స్ చీఫ్ పీఎస్ఆర్ ఆంజనేయులు ఇప్పటికే సీఐడీ చేతిలో అరెస్టయ్యారు. ప్రస్తుతం ఆయన విజయవాడ జిల్లా జైలులో రిమాండ్ ఖైదీగా ఉన్నారు. గత వారం కోర్టు అనుమతితో సీఐడీ అధికారులు ఆయనను కస్టడీలోకి తీసుకుని మూడురోజుల పాటు విచారణ జరిపిన విషయం తెలిసిందే. అంతకుముందు, ఈ కేసులో ఆరోపణలు ఎదుర్కొంటున్న కాంతిరాణా టాటా, విశాల్ గున్నీలు న్యాయస్థానాన్ని ఆశ్రయించగా, వారికి ముందస్తు బెయిల్ లభించింది. దీంతో అరెస్టు ముప్పు నుంచి తాత్కాలిక ఊరట లభించింది. అయితే, విచారణ నిమిత్తంగా సీఐడీ ఎదుట హాజరుకావాల్సిన బాధ్యత వారిపై కొనసాగుతోంది.

సీఐడీ ఇప్పటికే కేసుకు సంబంధించిన ఆధారాలను సేకరించేందుకు పలు కోణాల్లో దర్యాప్తు కొనసాగిస్తోంది. ముఖ్యంగా, కాదంబరి కుటుంబాన్ని టార్గెట్ చేసిన వెనుక అసలైన కుట్రదారులెవరు? ఎవరి ఆదేశాలతో పోలీసులు చర్యలకు దిగారు? అనే అంశాలపై ఆరా తీస్తున్నారు. ఈ విచారణ నేపథ్యంలో ఈరోజు జరిగే సీఐడీ ఇంటరాగేషన్ కీలకంగా మారనున్నట్లు సమాచారం. కాదంబరి జత్వానీ కేసు ప్రస్తుతం రాజకీయంగా కూడా చర్చనీయాంశంగా మారుతోంది. అధికార-విపక్ష పార్టీల మధ్య మాటల యుద్ధం మళ్లీ మొదలయ్యే అవకాశాలు కనిపిస్తున్నాయి. విచారణలో ఏమి వెలుగుచూస్తుందోనన్న ఉత్కంఠ ప్రజల్లో నెలకొంది.

Read Also: Nitin Gadkari : నేడు తెలంగాణకు కేంద్ర మంత్రి నితిన్ గడ్కరీ..రూ.5,413 కోట్ల పనులకు శ్రీకారం