సంక్రాంతి వేళ విషాదం..కాకినాడ జిల్లాలో భారీ అగ్నిప్రమాదం

Kakinada Fire Accident

సంక్రాంతి వేళ కాకినాడ జిల్లా సార్లంక గిరిజన గ్రామంలో ఘోర అగ్నిప్రమాదం సంభవించింది. గ్రామస్తులంతా పండుగ ఏర్పాట్లలో ఉండగా.. అగ్ని ప్రమాదం సంభవించి.. వారిని రోడ్డున పడేసింది. ఈ ప్రమాదంలో గ్రామంలో 40 పూరిళ్లు పూర్తిగా దగ్ధం అయ్యాయి. సిలిండర్లు పేలడంతో నష్టం మరింత తీవ్రమైంది. కట్టుబట్టలతో రోడ్డున పడ్డ గ్రామస్తులు ప్రభుత్వ సహాయం కోసం ఎదురుచూస్తున్నారు. ఈ అగ్ని ప్రమాదం వల్ల లక్షల్లో ఆస్తి నష్టం జరిగింది.

• పండగ పూట తీవ్ర విషాదం
• కాకినాడ, సార్లంక గ్రామంలో భారీ అగ్ని ప్రమాదం
• 40 ఇళ్లు దగ్ధం.. రోడ్డు పాలైన గ్రామస్తులు

సంక్రాంతి పండుగ వేళ జరిగిన భారీ అగ్ని ప్రమాదం ఆ గ్రామాన్ని రోడ్డున పడేసింది. ప్రజలంతా పండుగ ఏర్పాట్లలో బిజీగా ఉన్న సమయంలో అనుకోని రీతిలో అంటుకున్న కార్చిచ్చు ఊరు ఊరంతటిని కాలి బూడిద చేసింది. పదుల సంఖ్యలో ఇళ్లను దగ్ధం చేసింది. దీంతో పండుగ పూట కట్టుబట్టలతో ఆ గ్రామ ప్రజలు రోడ్డున పడ్డారు. మంటల్లో కాలి బూడిదైన ఇళ్లను చూసుకుని కన్నీళ్లు పెట్టుకుంటున్నారు. ఆంధ్రప్రదేశ్, కాకినాడ జిల్లాలోని ఓ గిరిజన గ్రామంలో ఈ భారీ అగ్నిప్రమాదం చోటు చేసుకుంది. ఈ ప్రమాదంలో రెండు, మూడు ఇళ్లు మినహా మిగతా పూరిళ్లన్నీ దగ్ధమయ్యాయి. లక్షల్లో ఆస్తి నష్టం సంభవించింది. బాధితులంతా కన్నీరుమున్నీరుగా విలపిస్తున్నారు.

కాకినాడ జిల్లాలోని రౌతులపూడి మండలంలో సార్లంక అనే గిరిజన గ్రామంలో ఈ భారీ అగ్నిప్రమాదం చోటు చేసుకుంది. మారుమూల ప్రాంతంలో ఉన్న సార్లంక గ్రామంలో అధికంగా పూరిళ్లే ఉన్నాయి. సంక్రాంతి పండుగ కావడంతో.. గ్రామంలోని చాలామంది గిరిజనులు బట్టలు, సరుకులు కొనుక్కోవడానికి రౌతులపూడి, తుని వంటి దిగువ ప్రాంతాలకు వెళ్లారు. దీంతో ప్రమాదం జరిగిన సమయంలో గ్రామంలో చాలా కొద్దిమంది మాత్రమే ఉన్నారు.

సాయంత్రం 5 గంటల సమయంలో ఒక పూరి గుడిసెలో మంటలు మొదలయ్యాయి. అవి వేగంగా ఇతర గుడిసెలకు వ్యాపించాయి. గుడిసెల్లో ఉన్న సిలిండర్లు పేలడంతో ప్రమాదం మరింత తీవ్రమైంది. గ్రామంలో ఉన్న కొద్దిమంది ప్రాణభయంతో ఇళ్లలోంచి బయటకు పరుగులు తీశారు. గ్రామంలో దాదాపు అన్ని ఇళ్లు పూరిళ్లే కావడంతో, ఒకదాని తర్వాత ఒకటి అగ్నికి ఆహుతయ్యాయి. ఈ ప్రమాదంలో లక్షల్లో ఆస్తి నష్టం జరిగింది. గుడిసెల్లోని సిలిండర్లు పేలడంతో మంటల తీవ్రత పెరిగింది. ఈ ప్రమాదం వల్ల గ్రామంలోని ప్రజలంతా నిరాశ్రయులయ్యారు.

అగ్ని ప్రమాదం గురించి సమాచారం అందిన వెంటనే పోలీసులు, అగ్నిమాపక సిబ్బంది సార్లంక గ్రామానికి చేరుకున్నారు. అయితే, అగ్నిమాపక సిబ్బంది వచ్చేలోపే చాలా నష్టం జరిగింది. 40 పూరిళ్లు పూర్తిగా కాలిపోయాయి. ఇళ్లలోని బట్టలు, సామాన్లు, వంట సరుకులు, ధాన్యం అగ్నికి ఆహుతయ్యాయి. ఈ ప్రమాదంతో గ్రామంలోని ప్రజలంతా నిరాశ్రయులయ్యారు. పండుగ పూట గ్రామస్తులంతా రోడ్డు పాలయ్యారు. ప్రభుత్వమే తమను ఆదుకోవాలని వారు వేడుకుంటున్నారు. అదృష్టం బాగుండి ప్రాణనష్టం జరగలేదు.. కానీ లక్షల రూపాయల మేర ఆస్తి నష్టం జరిగింది.

Follow us