Leopard Attack : తిరుపతిలో చిరుత దాడి యత్నం కలకలం.. అలిపిరి రోడ్డులో భక్తులు భయాందోళన

Leopard Attack : తిరుపతి ప్రాంతంలో చిరుతపులుల సంచారం మళ్లీ కలకలం రేపుతోంది. తాజాగా అలిపిరి ఘాట్ రోడ్డులో జరిగిన ఒక ఘటన భక్తులు, స్థానికులు, అధికారులు అందరినీ అలెర్ట్‌ చేయించింది. బైక్‌పై ప్రయాణిస్తున్న ఇద్దరు వ్యక్తులపై ఒక చిరుతపులి అకస్మాత్తుగా దాడి చేయడానికి ప్రయత్నించగా, ఆ సంఘటన మొత్తం బైక్ వెనకాల వస్తున్న కారు డ్యాష్ కెమెరాలో రికార్డయింది. ఈ వీడియో సోషల్ మీడియాలో విపరీతంగా వైరల్ అవుతోంది. భక్తుల భద్రతను దృష్టిలో పెట్టుకొని తిరుమల తిరుపతి దేవస్థానం (టీటీడీ) అధికారులు, అటవీ శాఖ (ఫారెస్ట్) సిబ్బంది వెంటనే అప్రమత్తమయ్యారు. ప్రత్యేక జాగ్రత్తలు చేపట్టి, ప్రమాదకర ప్రాంతాల్లో అదనపు పహారా, గస్తీ పెంచారు.

ఇటీవల కొన్ని వారాలుగా అలిపిరి, ఎస్వీ జూ పార్క్ రోడ్డుల పరిసరాల్లో చిరుతల కదలికలు ఎక్కువగా కనిపిస్తున్నాయని స్థానికులు చెబుతున్నారు. రాత్రి వేళల్లో చిరుతలు తరచుగా రోడ్లను దాటుతున్న దృశ్యాలు కనబడుతున్నాయి. కొన్నిసార్లు వాహనాలు వెళ్లే సమయంలో రహదారి అంచుల వద్ద కూర్చుని కదలికలను గమనిస్తున్న చిరుతలు భయాందోళన కలిగిస్తున్నాయి. భక్తులు, ప్రయాణికులు ఈ మార్గాన్ని రాత్రి వేళల్లో ఉపయోగించడానికి భయపడుతున్నారు.

Kadapa : జగన్ అడ్డాలో కమలం కసరత్తులు

తాజాగా జరిగిన ఘటనలో, ఒక ద్విచక్ర వాహనం అలిపిరి-ఎస్వీ జూ పార్క్ రోడ్డులో ప్రయాణిస్తుండగా రోడ్డుపక్కన పొంచి ఉన్న చిరుత బైక్ పైకి ఎగబడి దాడి చేయడానికి ప్రయత్నించింది. అయితే బైక్ వేగంగా వెళ్తుండడంతో దాని గోర్లు ప్రయాణికులకు తగలనప్పటికీ, ఒక క్షణం పాటు భయంకర పరిస్థితి నెలకొంది. చిరుత పట్టు తప్పి రహదారిపై పడిపోవడంతో బైక్ పై ప్రయాణిస్తున్న వారు తృటిలో ప్రాణాలతో బయటపడ్డారు. ఈ సంఘటన బైక్ వెనక వస్తున్న కారు డ్యాష్‌కెమెరాలో పూర్తిగా రికార్డు కావడంతో ఆ వీడియో ఇప్పుడు సోషల్ మీడియాలో హాట్ టాపిక్ అయింది.

ఈ ఘటనతో చలించిన టీటీడీ అధికారులు, అటవీ శాఖ సిబ్బంది భక్తుల భద్రత కోసం పలు చర్యలు చేపడుతున్నారు. రాత్రి వేళల్లో ఘాట్ రోడ్డుపై ద్విచక్ర వాహనాల రాకపోకలను తాత్కాలికంగా నిషేధించారు. భక్తులు, పర్యాటకులకు రాత్రి సమయంలో కారు లేదా బస్సుల్లో మాత్రమే ప్రయాణించమని సూచించారు. ప్రమాదకర ప్రాంతాల్లో సీసీటీవీ కెమెరాలు, ట్రాప్ కెమెరాలు అమర్చి చిరుతల కదలికలను నిరంతరం పర్యవేక్షిస్తున్నారు.

ఇది తొలిసారి కాదు, గతంలో కూడా తిరుమల మార్గాల్లో చిరుతల దాడులతో పలు ఘటనలు చోటుచేసుకున్నాయి. గత సంవత్సరం అలిపిరి-తిరుమల మార్గంలో చిన్నారిపై చిరుత దాడి చేసి ప్రాణాలు తీసిన ఘటన ఇంకా మర్చిపోలేదు. అప్పటి నుండి టీటీడీ అధికారులు పలు భద్రతా చర్యలు చేపట్టినప్పటికీ, ఈ సమస్య పూర్తిగా తగ్గలేదని స్థానికులు చెబుతున్నారు.

ప్రస్తుతం తిరుమల వెళ్ళే భక్తులలో భయాందోళన నెలకొంది. “ప్రతి రోజు వేల సంఖ్యలో భక్తులు ఈ మార్గంలో ప్రయాణిస్తారు. అలాంటి సమయంలో చిరుతలు రోడ్డు పక్కన ఉండటం భయంకరంగా ఉంది” అని భక్తులు చెబుతున్నారు. అధికారులు రాత్రిపూట భక్తులను ప్రయాణించవద్దని హెచ్చరిస్తున్నారు. అదేవిధంగా వాహనాలు, పాదయాత్ర మార్గాలపై గస్తీ పెంచి, అవసరమైతే నైట్ ప్యాట్రోల్ టీమ్‌లను ఏర్పాటుచేయాలని ప్రణాళిక రూపొందిస్తున్నారు.

Benefits Of Crying: ఏడ‌వ‌టం కూడా ఆరోగ్య‌మేనా? నిపుణులు ఏం చెబుతున్నారు?!