Roja Daughter : కుమార్తెకు ప్రతిష్టాత్మక పురస్కారం..రోజా సంతోషం !!

Roja Daughter Anshumalika

మాజీ మంత్రి, సినీ నటి రోజా కుమార్తె అన్షు మాలిక అంతర్జాతీయ స్థాయిలో మరో అరుదైన గౌరవాన్ని సొంతం చేసుకున్నారు. విద్యా రంగంలో ఆమె కనబరుస్తున్న అసాధారణ ప్రతిభకు గుర్తింపుగా అమెరికాలోని ప్రతిష్టాత్మక ఇండియానా యూనివర్సిటీ నుంచి ‘హెర్మన్ బి వెల్స్’ అవార్డును అందుకున్నారు. ఈ విజయంపై రోజా సోషల్ మీడియా వేదికగా స్పందిస్తూ తన కుమార్తె ప్రయాణం ఎంతో మందికి స్ఫూర్తిదాయకమని ఆనందం వ్యక్తం చేశారు.

హెర్మన్ బి వెల్స్ అవార్డు – ఒక అరుదైన గౌరవం

ఇండియానా యూనివర్సిటీ మాజీ ప్రెసిడెంట్ హెర్మన్ బి వెల్స్ స్మారకార్థం ఇచ్చే ఈ పురస్కారం ఆ వర్సిటీలోనే అత్యున్నతమైనదిగా పరిగణించబడుతుంది. విద్య, నాయకత్వం, ప్రజాసేవ లేదా సైన్స్ రంగాల్లో విశేష కృషి చేసిన విద్యార్థులకు మాత్రమే దీనిని అందజేస్తారు. ప్రస్తుతం అన్షు మాలిక ఇండియానాలోని లూడీ స్కూల్ ఆఫ్ ఇన్ఫర్మేటిక్స్ లో కంప్యూటర్ సైన్స్ అండర్ గ్రాడ్యుయేషన్ చదువుతున్నారు. విద్యాపరమైన మేధస్సుతో పాటు సామాజిక దృక్పథం ఉన్న విద్యార్థినిగా ఆమెను ఈ అవార్డుకు ఎంపిక చేయడం గమనార్హం.

చదువులోనే కాకుండా అన్షు మాలిక చిన్నతనం

కేవలం చదువులోనే కాకుండా అన్షు మాలిక చిన్నతనం నుంచే బహుముఖ ప్రజ్ఞను చాటుతున్నారు. ఏడేళ్ల వయసులోనే కోడింగ్ నేర్చుకోవడమే కాకుండా, ‘ది ఫ్లేమ్ ఇన్ మై హార్ట్’ అనే పుస్తకాన్ని కూడా రచించారు. గతంలో నైజీరియాలో జరిగిన గ్లోబల్ ఎంటర్‌ప్రెన్యూర్‌షిప్ ఫెస్టివల్‌లో ‘సోషల్ ఇంపాక్ట్’ విభాగంలో అంతర్జాతీయ అవార్డును సైతం ఆమె అందుకున్నారు. సినిమాల్లోకి వస్తారని చాలా మంది భావించినప్పటికీ, ఒక గొప్ప సైంటిస్ట్ కావాలనే లక్ష్యంతో ఆమె పరిశోధనలు మరియు సాంకేతిక విద్యపైనే తన పూర్తి దృష్టిని కేంద్రీకరించారు.

అమ్మ బాటలోనే అన్షు

అమ్మ బాటలోనే సామాజిక స్పృహను చాటుకుంటున్న అన్షు, హైదరాబాద్‌లోని ఛీర్స్ ఫౌండేషన్ ద్వారా ఐదుగురు అనాథ పిల్లల చదువుకు అండగా నిలుస్తున్నారు. చదువుతో పాటు సమాజానికి తిరిగి ఇవ్వాలనే ఆమె ఆలోచనా విధానం పట్ల సర్వత్రా ప్రశంసలు వ్యక్తమవుతున్నాయి. కష్టపడే తత్వం, పట్టుదలతో తను అనుకున్న లక్ష్యాలను సాధిస్తూ.. తెలుగు గడ్డ ఖ్యాతిని ప్రపంచ స్థాయిలో చాటిచెబుతున్న అన్షు మాలికను చూసి తనకెంతో గర్వంగా ఉందని రోజా తన పోస్ట్‌లో పేర్కొన్నారు.

Follow us