Amaravati: అమరావతి శంకుస్థాపనకు నేటితో 9 ఏళ్ళు..

Ap Capital Amaravati

Amaravati: అమరావతి పునర్నిర్మాణం వేగంగా కొనసాగుతోంది. రాజధానిని అంతర్జాతీయ ప్రమాణాలకు అనుగుణంగా అభివృద్ధి చేయాలనే లక్ష్యంతో టీడీపీ ప్రభుత్వం సీఆర్‌డీఏని ఏర్పాటు చేసి, మాస్టర్ ప్లాన్‌ను రూపొందించింది. అభివృద్ధి ప్రాజెక్టులకు రూ. 9,000 కోట్ల అగ్రిమెంట్‌ విలువతో పనులు ప్రారంభించారు. రోడ్లు మరియు ఇతర మౌలిక వసతుల కోసం రూ. 13,760 కోట్ల అగ్రిమెంట్‌ విలువ నిర్ణయించబడింది. భూ సమీకరణ కింద రైతులకు ప్యాకేజీగా రూ. 37,660.80 కోట్ల అగ్రిమెంట్‌ విలువ ప్రకటించబడింది.

2019 ఎన్నికల సమీపంలో, దాదాపు రూ. 50,000 కోట్ల అగ్రిమెంట్‌ విలువతో కూడిన పనులకు శ్రీకారం చుట్టగా, భవన అభివృద్ధి ప్రాజెక్టులకు రూ. 2,055.43 కోట్ల వ్యయం జరిగింది. ట్రంక్ ఇన్ఫ్రా పనులకు రూ. 3,533.78 కోట్లు, ఎల్‌పీఎస్ ఇన్ఫ్రా పనులకు రూ. 12,669 కోట్లు ఖర్చు చేయబడ్డాయి. మూడున్నర సంవత్సరాలపాటు రాత్రింబవళ్లు పనులు జరిగాయి.

గత టీడీపీ ప్రభుత్వం రోడ్లు, ట్రంక్ ఇన్ఫ్రా కోసం రూ. 1,275 కోట్ల హడ్కో రుణాన్ని పొందింది. అమరావతి బాండ్ల ద్వారా రూ. 2,000 కోట్లు సమీకరించింది. గృహ నిర్మాణ ప్రాజెక్టుల కోసం బ్యాంకుల కన్సార్టియం ద్వారా రూ. 2,060 కోట్ల రుణం తీసుకుంది. మొత్తంగా, రూ. 5,300 కోట్లను సమీకరించి కలల రాజధానిని సాధించడంలో అడుగులు వేస్తోంది.

Amaravati Foundation Stone

గత ప్రభుత్వం హయంలో:

వైసీపీ 2019లో అధికారం చేపట్టిన తర్వాత, రాజధాని నిర్మాణ పనులను అడ్డుకోవడం ప్రధాన లక్ష్యంగా పెట్టుకుంది. 25 శాతం కూడా పూర్తికాని పనులను నిలిపివేసినట్టు ప్రకటించి, శాశ్వత రాజధానీ నిర్మాణం మొత్తం అడ్డుకుంది. ముఖ్యమైన జీఏడీ టవర్‌తో పాటు నాలుగు ఇతర టవర్ల నిర్మాణానికి రూ. 3,453.16 కోట్లతో ప్రారంభించిన ప్రాజెక్టులు, హైకోర్టు పనులు కూడా ఆగిపోయాయి. హైకోర్టు 13 శాతం, జీఏడీ టవర్ 19 శాతం, టవర్-1, 2లు 18 శాతం, టవర్-3, 4లు 20 శాతం మేర పనులు పూర్తయ్యాయి, కానీ వీటన్నింటినీ 25 శాతం పురోగతి లేని జాబితాలో చేర్చారు.

తర్వాత, నిధులు ఇవ్వకుండా, ఎమ్మెల్యేలకు, ఆలిండియా సర్వీసు అధికారులకు నిర్మిస్తున్న మల్టీస్టోరెడ్ అపార్ట్‌మెంట్లు, ఎన్‌జీవో అపార్ట్‌మెంట్లు, ప్రభుత్వ టైప్-1, 2 భవనాల పనులను ఆపేశారు. రోడ్లు, డ్రెయిన్లు, మంచినీటి పైపులైన్ల వంటి అభివృద్ధి పనులు అన్ని నిలిపివేయబడ్డాయి. రైతులకు అందించిన రిటర్నబుల్ ప్లాట్ల అభివృద్ధి కూడా పక్కన పెట్టబడింది. అమరావతిలో నెలకొల్పాల్సిన సంస్థలు, కొత్త రైల్వే లైన్లు, అమరావతి ఓఆర్‌ఆర్‌, ఐఆర్‌ఆర్‌ వంటి ప్రాజెక్టులకు కూడా అడ్డంకులు వేసారు.

Amaravati Jungle Clearance

ప్రస్తుతం:

కూటమి ప్రభుత్వం ఏర్పడిన వెంటనే, అమరావతిలో రూ. 43 కోట్లతో పెరిగిన పిచ్చిచెట్లను తొలగించింది. 5 సంవత్సరాలుగా శాశ్వత రాజధాని భవనాలు నీటిలో ఉండటం వల్ల, అవి ఉపయోగపడతాయా లేదా అనేది తెలుసుకునేందుకు టెక్నికల్ కమిటీని ఏర్పాటు చేసింది. చెన్నై, హైదరాబాద్ ఐఐటీల బృందాలు కాంక్రీట్, స్టీల్ శాంపిళ్లను సేకరించి పరీక్షించిన తర్వాత, అవి దృఢంగా ఉన్నాయని రిపోర్టు ఇచ్చాయి. దీంతో ప్రభుత్వ కాంప్లెక్స్ పనులను పునఃప్రారంభించేందుకు ప్రభుత్వం సిద్ధమైంది.

గత టీడీపీ ప్రభుత్వ కాలంలో 75 శాతం పురోగతిలో ఉన్న ఎమ్మెల్యే, ఎమ్మెల్సీ, ఆలిండియా సర్వీసు అధికారుల భవనాల పాత టెండర్‌ను రద్దు చేసి, రూ. 524.70 కోట్లతో తిరిగి పూర్తి చేసేందుకు చర్యలు తీసుకోనుంది. సీఆర్‌డీఏ ప్రాజెక్టు కాంప్లెక్స్ పనులకు ఇటీవల ముఖ్యమంత్రి చంద్రబాబు శంకుస్థాపన చేశారు.

నిలిచిపోయిన ట్రంక్ ఇన్ఫ్రా పనులను ముందుకు తీసుకెళ్లేందుకు డీపీఆర్ తయారీలో సీఆర్‌డీఏ సిద్ధమైంది. సీడ్ యాక్సెస్ రోడ్డు రెండో దశ పనులతో పాటు, ఈ-11, ఈ-13 రోడ్లను ఎన్‌హెచ్-16తో అనుసంధానం చేసేందుకు టెండర్లు పిలవడానికి ప్రణాళికలు రూపొందిస్తున్నాయి. హ్యాపీనెస్ట్ ప్రాజెక్టును మళ్లీ ప్రారంభించి పూర్తి చేయడానికి ఇటీవల టెండర్లు పిలవబడాయి.

శాశ్వత వరద నివారణ చర్యల కింద, కొండవీడు వాగు, గ్రావిటీ వాగు, పాలవాగులను విస్తరించి అభివృద్ధి చేసేందుకు అంచనాలు తయారు చేస్తున్నారు. 3 పంపింగ్ స్టేషన్లు, ఆరు రిజర్వాయర్ల అభివృద్ధికి కూడా టెండర్లు పిలవబడనున్నాయి. రాజధాని పనులు మహాయజ్ఞంలా ప్రారంభమై, కొత్త సంవత్సరంలో రాత్రింబవళ్లు కొనసాగనున్నాయి.

Follow us