Milk Price Hike : సామాన్య ప్రజలపై పాల భారం..భారీగా పెరిగిన ధరలు

Milk Price Hike

ఇప్పటికే ఆకాశాన్నంటుతున్న గ్యాస్, పెట్రోల్, నిత్యావసర వస్తువుల ధరలతో సతమతమవుతున్న సామాన్యుడికి పాల ధరల పెంపు గోరుచుట్టుపై రోకలిపోటులా మారింది. అంతర్జాతీయ పరిణామాలు, యుద్ధ వాతావరణం కారణంగా ఇంధన ధరలు పెరగడం, తద్వారా రవాణా ఖర్చులు భారమవ్వడం అన్ని రంగాలపై ప్రభావం చూపుతోంది. ఈ క్రమంలోనే ప్రముఖ పాల ఉత్పత్తి సంస్థలైన విజయ, సంగం డెయిరీలు లీటరు పాలపై రూ. 2 వరకు ధరను పెంచుతూ నిర్ణయం తీసుకున్నాయి. పాల సేకరణ వ్యయం, ప్యాకేజింగ్ మెటీరియల్ ధరలు మరియు విద్యుత్ ఛార్జీలు పెరగడమే ఈ ధరల పెంపునకు ప్రధాన కారణమని డెయిరీ యాజమాన్యాలు పేర్కొంటున్నాయి.

కృష్ణా మిల్క్ యూనియన్ ప్రకటించిన వివరాల ప్రకారం.. పెరిగిన ధరలు నేటి నుంచే రాష్ట్రవ్యాప్తంగా అమల్లోకి వచ్చాయి. అయితే, కృష్ణా, ఎన్టీఆర్, ఏలూరు జిల్లాల్లో మాత్రం ఏప్రిల్ 4 నుంచి ఇవి వర్తిస్తాయి. కార్డ్ వినియోగదారులకు కొంత ఊరటనిస్తూ ఏప్రిల్ 9 వరకు పాత ధరలకే పాలు సరఫరా చేయనున్నారు. సవరించిన ధరల ప్రకారం:

స్టాండర్డ్ పాలు: రూ. 62 నుండి రూ. 64 కు పెంపు.

టోన్డ్ పాలు: రూ. 58 నుండి రూ. 60 కి పెంపు.

ఫుల్ క్రీమ్ మిల్క్: లీటరుకు రూ. 4 పెరిగి రూ. 72 కి చేరింది.

పెరుగు (450 గ్రాములు): రూ. 32 నుండి రూ. 33 కి పెరిగింది.
కేవలం వినియోగదారులకే కాకుండా, ఉత్పత్తిదారులకు (పాడి రైతులు) కూడా మేలు చేసేలా సంగం డెయిరీ పాల సేకరణ ధరలను పెంచడం గమనార్హం. వంట గ్యాస్ సిలిండర్ ధరలు పెరగడంతో ఇప్పటికే హోటళ్లలో తినుబండారాల ధరలు పెరిగిపోయాయి. ఇప్పుడు పాల ధరలు కూడా తోడవడంతో సామాన్యుడి నెలవారీ బడ్జెట్ తలకిందులవుతోంది. పాలు అత్యంత ప్రాథమిక అవసరం కావడంతో, ఈ పెంపు పిల్లల పోషకాహారం మరియు రోజువారీ ఖర్చులపై నేరుగా ప్రభావం చూపుతుంది. ప్రభుత్వం మరియు సంబంధిత సంస్థలు ధరలను నియంత్రించకపోతే, సామాన్యుడి జీవన ప్రమాణాలు మరింత దిగజారే ప్రమాదం ఉందని ఆర్థిక నిపుణులు ఆందోళన వ్యక్తం చేస్తున్నారు. నిత్యావసరాల ధరల పెరుగుదల గొలుసుకట్టు చర్యలా మారి, చివరికి సామాన్యుడి జేబుకు చిల్లు పెడుతోంది.

Follow us