APSRTC : ఫ్రీ బస్ లలో సీసీ కెమెరాలు..?

ఆంధ్రప్రదేశ్ కూటమి ప్రభుత్వం (AP Govt) తమ కీలక ఎన్నికల హామీల్లో ఒకటైన మహిళలకు ఉచిత బస్సు ప్రయాణ పథకాన్ని(Free Bus ) ఈ నెల 15 నుంచి అమలు చేయడానికి సిద్ధమవుతోంది. ఈ పథకంపై ఏర్పాటైన కేబినెట్ సబ్ కమిటీ తన సిఫార్సుల నివేదికను ప్రభుత్వానికి సమర్పించింది. అయితే ఈ నివేదికలో కొన్ని అంశాలు మహిళలకు అనుకున్నంత ఊరట కలిగించేవిగా లేవని తెలుస్తోంది. ఈ పథకం అమలులో కొన్ని నిబంధనలు, షరతులు ఉంటాయని, దానివల్ల కొంతమంది మహిళలకు నిరాశ తప్పదని వార్తలు వస్తున్నాయి. తుది నిర్ణయం కోసం వచ్చే కేబినెట్ సమావేశంపై సర్వత్రా ఉత్కంఠ నెలకొంది.

కేబినెట్ సబ్ కమిటీ నివేదిక ప్రకారం, ఈ ఉచిత ప్రయాణ పథకం మహిళలతో పాటు ట్రాన్స్‌జెండర్లకు కూడా వర్తిస్తుంది. పల్లెవెలుగు, ఎక్స్‌ప్రెస్ సర్వీసులు, అలాగే విజయవాడ, విశాఖపట్నంలో మెట్రో సర్వీసులు వంటి ఐదు రకాల సర్వీసుల్లో ఈ పథకం అందుబాటులో ఉంటుంది. అయితే, బస్సుల్లో సీసీ కెమెరాలు ఏర్పాటు చేయాలన్న సబ్ కమిటీ సిఫార్సు కొంత ఆందోళన కలిగిస్తోంది. ఇది మహిళల గోప్యతకు భంగం కలిగిస్తుందని, వారికి ఇబ్బందికరంగా మారుతుందని చర్చ జరుగుతోంది.

KSRTC Protest : కర్ణాటకలో ఆర్టీసీ సమ్మె.. బోసిపోయిన బస్టాండ్స్

మరోవైపు, అంతర్ రాష్ట్ర సర్వీసులతో పాటు తిరుపతి-తిరుమల ఘాట్ రోడ్డు సర్వీసుల్లో ఉచిత ప్రయాణాన్ని అనుమతించవద్దని సబ్ కమిటీ సిఫార్సు చేయడం ప్రయాణికులకు ఒక షాక్‌గా మారింది. ప్రస్తుతం ఆంధ్రప్రదేశ్ నుంచి తమిళనాడు, కర్ణాటక వంటి రాష్ట్రాలకు నడుస్తున్న బస్సులలో, అలాగే తిరుమల ఘాట్ రోడ్డులో ప్రయాణించే మహిళలకు ఈ పథకం వర్తించకపోవచ్చు. ఈ నిబంధన వల్ల వేలాది మంది ప్రయాణికులకు ఈ పథకం పూర్తి ప్రయోజనం చేకూర్చదని విమర్శలు వస్తున్నాయి. ముఖ్యంగా నిత్యం ప్రయాణాలు చేసేవారికి ఇది ఒక పెద్ద సమస్య కానుంది.

ఈ నివేదికలోని అంశాలపై త్వరలో జరగబోయే కేబినెట్ సమావేశంలో చర్చ జరగనుంది. సీఎం చంద్రబాబు నాయుడు, ఇతర మంత్రులు ఈ సిఫార్సులను సమీక్షించి తుది మార్గదర్శకాలను ఖరారు చేస్తారు. సబ్ కమిటీ సిఫార్సులను యథాతథంగా ఆమోదిస్తారా, లేక ప్రజల నుంచి వస్తున్న అభిప్రాయాలను పరిగణనలోకి తీసుకుని మార్పులు చేస్తారా అనేది ఆసక్తికరంగా మారింది. ముఖ్యంగా అంతర్ రాష్ట్ర సర్వీసులు, తిరుమల ఘాట్ రోడ్డు బస్సుల విషయంలో కేబినెట్ తీసుకునే నిర్ణయంపై ప్రయాణికులు ఉత్కంఠగా ఎదురుచూస్తున్నారు.