China : బుద్ధి మార్చుకోని చైనా.. భారత్ పై బంగ్లాదేశ్ లో కుతంత్రాలు..

China : బంగ్లాదేశ్ మాజీ ప్రధానమంత్రి షేక్ హసీనా బహిష్కరణ తర్వాత, ఆ దేశంలో భారత వ్యతిరేక శక్తుల ప్రభావం క్రమంగా పెరుగుతోంది. మొహమ్మద్ యూనస్ నేతృత్వంలోని తాత్కాలిక ప్రభుత్వం పదవిలోకి వచ్చిన తర్వాత, హిందూ మైనారిటీలపై దాడులు, దేవాలయాల విధ్వంసం వంటి సంఘటనలు పెరగడం ఆందోళన కలిగిస్తోంది.

ఇక, తాజాగా రాడికల్ ఇస్లామిక్ గ్రూపులు చైనాతో పొత్తు పెంచుకోవడం, ఈ పరిణామాలపై మరింత అనుమానాలను రేకెత్తిస్తోంది. భారత వ్యతిరేక ఎజెండా అమలు చేయడంలో చైనా వ్యూహాత్మక మద్దతు ఇస్తోందని విశ్లేషకులు అంటున్నారు.

ఇటీవలి పరిణామాల్లో, బంగ్లాదేశ్‌లోని ఫండమెంటలిస్ట్ సంస్థ జమాతే-ఇ-ఇస్లామీ నాయకులు ఐదు రోజుల పాటు చైనాను పర్యటించడం ఒక ప్రధాన సంకేతం. జమాతే చీఫ్ డాక్టర్ షఫీకుర్ రెహమాన్తో సహా తొమ్మిది మంది ప్రతినిధులు ఈ పర్యటనలో భాగమయ్యారు. ముఖ్యంగా, ఈ పర్యటనకు చైనా ప్రత్యేక ఆహ్వానం పంపడం విశేషంగా ఉంది.

ఇది చైనాతో ఈ సంస్థకు జరిగిన రెండవ సమావేశం కావడం గమనార్హం. గతంలో కూడా ఢాకాలోని చైనా రాయబారి కార్యాలయం జమాతే నేతలకు ఆతిథ్యం ఇచ్చిన విషయం తెలిసిందే. రాబోయే బంగ్లాదేశ్ ఎన్నికల్లో ప్రాతినిధ్య ఎన్నికల వ్యవస్థను అమలు చేయడం, దేశాన్ని ఇస్లామిక్ నిబంధనల ప్రకారం నడపడం వంటి అంశాలపై చర్చ జరిగినట్లు సమాచారం.

జూలై 19న జరిగిన ఢాకా ర్యాలీలో జమాతే-ఇ-ఇస్లామీ, రాబోయే ప్రభుత్వం ఇస్లామిక్ చట్టాల ప్రకారం నడవాలని స్పష్టం చేసింది. ఈ సంస్థ నిరంతరం ఇస్లామిక్ చట్టాల అమలుపై కఠిన వైఖరిని కొనసాగిస్తోంది. ఈ నేపథ్యంలో, చైనాతో పెరుగుతున్న ఆత్మీయ సంబంధాలు భారతదేశానికి ఆందోళన కలిగిస్తున్నాయి.

భారత భద్రతా వర్గాలు, నిఘా సంస్థలు ఈ పరిణామాలను నిశితంగా గమనిస్తున్నాయి. ఎందుకంటే, బంగ్లాదేశ్‌లో రాడికల్ ఇస్లామిక్ శక్తుల బలపాటు హిందూ మైనారిటీలపై మరింత దాడులకు దారితీయవచ్చు. అదే సమయంలో, దక్షిణాసియాలో భారత ప్రభావాన్ని తగ్గించడానికి చైనా ఈ శక్తులకు వ్యూహాత్మక మద్దతు ఇస్తోందని భావిస్తున్నారు.

గత ఏడాది వరకు ఉగ్రవాద చర్యల కారణంగా నిషేధం ఎదుర్కొన్న జమాతే-ఇ-ఇస్లామీ, షేక్ హసీనా ప్రభుత్వ పతనం తరువాత తిరిగి చురుకుగా మారింది. తాత్కాలిక ప్రభుత్వం ఆ నిషేధాన్ని ఎత్తివేయడంతో, ఈ సంస్థ రాబోయే ఎన్నికల్లో ప్రత్యక్షంగా పోటీకి సిద్ధమవుతోంది. ఇస్లామిక్ చట్టాలను పార్లమెంటరీ విధానంలో ప్రవేశపెట్టాలని ఇది పట్టుదలగా కోరుతోంది.

Mytra : మింత్రా ఆన్‌లైన్‌ పోర్టల్‌పై ఈడీ కేసు నమోదు