Dubai: పబ్లిక్ లో నానా గొడవ చేసిన అమెరికా టిక్ టాక్ స్టార్.. చివరికి?

Dubai

ఈ మధ్యకాలంలో చాలా మంది సోషల్ మీడియాలో ఫేమస్ అవడం కోసం రకరకాల పిచ్చిపిచ్చి స్టంట్ లు చేయడంతో పాటు పబ్లిక్ లో న్యూసెన్స్ లు చేస్తున్నారు. ఇంకొందరు పబ్లిక్ లో ఉన్న వారికి ఇబ్బంది కలిగించే విధంగా ప్రవర్తిస్తున్నారు. ఇప్పటికే గతంలో ఇలాంటి సంఘటనలు చాలానే చోటు చేసుకున్నాయి. అటువంటి వారికి పోలీసులు కూడా గట్టిగానే బుద్ధి చెప్పారు. అయినప్పటికీ సోషల్ మీడియాపై ఉన్న పిచ్చితో రకరకాల పిచ్చిపిచ్చి స్టంట్ లు చేస్తూనే ఉన్నారు. తాజాగా ఒక యువతి పబ్లిక్ లో అలాగే ప్రవర్తించడంతో పోలీసులు ఆమెకు గట్టిగా బుద్ధి చెప్పారు. అమెరికా టిక్ టాకర్ దుబాయ్ లో ఇరుక్కుపోయింది.

తన స్నేహితుడితో జాలీ ట్రిప్ కోసం యూఏఈ వెళ్లిన టియెర్రా యంగ్ అలెన్ అనుకోకుండా అక్కడ యాక్సిడెంట్ చేసింది. తర్వాత అనవసరంగా అద్దె కార్ షోరూం యజమాని పై నోరు జారి న్యూసెన్స్ చేసి జైలు పాలయ్యింది. అమెరికాకు చెందిన టిక్ టాక్ స్టార్ టియెర్రా యంగ్ అలెన్ అనే 29 ఏళ్ళ యువతి యూఏఈ పర్యటనకు వచ్చి చిక్కుల్లో పడింది. దుబాయ్ లో తన స్నేహితుడితో కలిసి ప్రయాణిస్తున్న కారు యాక్సిడెంట్ కు గురి అవ్వడంతో వెంటనే స్థానిక పోలీసులు కేసు నమోదు చేసి డ్రైవింగ్ చేస్తున్నందుకు బాయ్ ఫ్రెండ్ ను అరెస్టు చేశారు.

టిక్ టాకర్ స్నేహితుడిని అదుపులోకి తీసుకున్న పోలీసులు కారును కూడా స్వాధీనం చేసుకున్నారు. అయితే అంతకు ముందు అద్దెకు కారు తీసుకున్నప్పుడు షోరూంలో ఇద్దరూ తమ గుర్తింపు కార్డులు అక్కడ వారికి ఇచ్చారు. మరుసటి రోజున అమెరికా తిరిగి ప్రయాణమవ్వనున్న నేపథ్యంలో అలెన్ కారు షోరూంకి వెళ్లి తన ఐడెంటిటీ కార్డులు తనకు తిరిగి ఇవ్వాల్సిందిగా కోరింది. కానీ ఆ కార్ షోరూం యజమాని కేసు తేలేంత వరకు అవి ఇవ్వడం కుదరదని చెప్పడంతో టిక్ టాకర్ రెచ్చిపోయింది. షోరూం యజమానిపై చిర్రుబుర్రులాడి గట్టి గట్టిగా అరుస్తూ గొడవ చేసింది. దీంతో దుబాయ్ పోలీసులు ఆమెపై కేసు నమోదు చేసి కటకటాల వెనక్కి నెట్టారు.

Follow us