Telanganas OffTrack : అధికారం కోసం కుస్తీ.. నిశ్శబ్ద తిరుగుబాట్లు, తిరుగుబాటు డ్రామాలు, మంత్రివర్గంలో రచ్చ

కవిత పోరాటం.. పరమార్ధం

కవిత చేస్తున్నది కేవలం బీసీ హక్కుల పోరాటం కాదు. బీఆర్‌ఎస్‌లో తన స్థానాన్ని ఆమె  ఎంత బలంగా నిలబెట్టుకోగలదు అనేది నిర్ణయించే అంశం కూడా ఇదే. బీఆర్ఎస్‌లో అత్యంత ప్రసిద్ధ మహిళా నాయకురాలు కవితే. కానీ ఆశ్చర్యకరంగా బీఆర్‌ఎస్ ఇప్పటి వరకు మహిళల విభాగాన్ని ఏర్పాటు చేయనేలేదు. బీఆర్ఎస్‌లోని అగ్ర నాయకులు మరో శక్తికేంద్రం రావడం అనవసరమని భావిస్తున్నారా?  పార్టీలోని ప్రస్తుత సమీకరణాలను మార్చే సామర్థ్యం కలిగిన కవితకు కీలక స్థానం ఇవ్వడానికి కొందరు అగ్రజులు ఇష్టపడటం లేదా ? అనే కోణాల్లో పార్టీ శ్రేణుల్లో చర్చ జరుగుతోంది.

ఒకే ఒక్క వ్యక్తి చుట్టూ బీఆర్‌ఎస్‌ ప్రదక్షిణలు

తెలంగాణలో ఎన్నికల ప్రక్రియ పూర్తయినప్పటి నుంచి బీఆర్‌ఎస్‌ మొత్తం ఒకే ఒక్క వ్యక్తి (కేటీఆర్) చుట్టూ తిరుగుతోంది. ఈ పరిస్థితిలో కవితకు రాజకీయంగా తనదైన స్థానం ఏర్పర్చుకోవడానికి తగిన అవకాశాలు లభించడం లేదు. ఢిల్లీ లిక్కర్ స్కామ్ కేసులో బెయిల్ పొందిన తర్వాత, కొన్ని నెలల పాటు కవిత రాజకీయాల నుంచి దూరంగా ఉండిపోయారు. అయితే ఎప్పటికైనా ఆమె యాక్టివేట్ అవుతారని రాజకీయ విశ్లేషకులు ముందే ఊహించారు. ఇప్పుడు, కవిత తిరిగి వచ్చింది, అది మామూలుగా కాదు. తెలంగాణ రాజకీయాల్లో కీలకమైన బీసీ అంశంపై బలమైన వాణితో ఆమె తెరపైకి వచ్చారు. జగిత్యాలలో కవిత ప్రసంగిస్తూ.. ‘‘తెలంగాణ ఉద్యమం మాదిరిగానే బీసీల హక్కుల కోసం ఉద్యమించాలి’’ అని పిలుపునిచ్చారు. కాంగ్రెస్, బీజేపీ రెండింటినీ టార్గెట్ చేస్తూ.. ” ఆ రెండు పార్టీలు దశాబ్దాలుగా బీసీలను పట్టించుకోలేదు” అని తీవ్ర విమర్శలు గుప్పించారు.

సొంత పార్టీని ఇరకాటంలో పడేసేలా..

ఇక్కడే కీలక మలుపు ఉంది.  కవిత కేవలం రాజకీయ ప్రసంగాలకే పరిమితం కావడం లేదు. ఆమె సొంత పార్టీని ఇరకాటంలో పడేసేలా అడుగులు వేస్తున్నారు. స్థానిక సంస్థల్లో బీసీలకు 42 శాతం రిజర్వేషన్ కల్పించాలని, కుల గణనను జాతీయ జనగణనలో భాగంగా చేయాలని కవిత కోరుతున్నారు.  అసెంబ్లీ ఆవరణలో జ్యోతిరావు పూలేే విగ్రహాన్ని ఏర్పాటు చేయాలని డిమాండ్ చేస్తున్నారు. ఇవన్నీ బీఆర్‌ఎస్‌ను తక్షణమే స్పందించాల్సిన పరిస్థితిలోకి నెట్టేసే రాజకీయ ఆయుధాలు. కానీ, బీఆర్‌ఎస్  నేతలు ఈ దిశగా వెళ్లడానికి ఇష్టపడటం లేదు. పలువురు బీఆర్‌ఎస్ నేతలు అంతర్గతంగా కవిత వ్యూహాత్మక రాజకీయాలకు మద్దతు ఇవ్వడం లేదు. ఆమె తిరిగి రాజకీయ బలాన్ని సంతరించుకోవడం అనేది  పార్టీలోని కొందరిని అసహనానికి గురిచేస్తోంది. కవితకు పార్టీలో ఎంత మేరకు అవకాశం కల్పించాలి అనే దానిపై  బీఆర్ఎస్‌లో అంతర్గతంగా  చర్చలు జరుగుతున్నాయి. కొంతమంది భావన ఏమిటంటే.. కవిత బీసీ హక్కుల కోసం పోరాడుతున్నప్పటికీ, ఈ పోరాటం అంతా రాజకీయంగా తాను సొంతంగా తిరిగి నిలబడటానికే.  కవిత ముందుకు సాగుతున్న తీరు అనేది పార్టీ అగ్రనాయకత్వానికి అస్సలు నచ్చడం లేదని అంటున్నారు.

త్వరలోనే సమాధానం 

ఇప్పుడు బీఆర్ఎస్ పార్టీ కవిత ప్రతీ కార్యక్రమాన్ని కళ్లప్పగించి గమనిస్తోంది. బీసీల సంఘాలు కవితకు మద్దతుగా నిలిచిన సందర్భాల్లో, పార్టీ ఆమెను విస్మరించలేకపోతోంది. ఒకవేళ భవిష్యత్తులో కవిత పోరాటానికి విస్తృత మద్దతు లభించకపోతే, బీఆర్‌ఎస్ శ్రేణుల్లో ఆమె స్థానం మరింత బలహీనపడే అవకాశం ఉంటుంది. ప్రస్తుతం, ఆమె రాజకీయంగా ఒక కీలక నిర్ణయం తీసుకుంది. కవిత చెబుతున్న విధంగా బీసీ హక్కుల ఉద్యమాన్ని బీఆర్‌ఎస్ పార్టీ అంగీకరించి ఆమెకు మద్దతుగా నిలవాలా ? ఆమెను ఇంకొంత కాలం మౌనంగా ఉంచాలా ? అనే ప్రశ్నకు త్వరలోనే సమాధానం లభించనుంది.

Also Read :Ranveer Allahbadia: ‘‘తల్లిదండ్రులు అది చేస్తుంటే చూస్తావా ?’’.. యూట్యూబర్ నీచ వ్యాఖ్యలపై దుమారం

ఆ ఎమ్మెల్యేలకు టెలిఫోన్ కాల్స్: తెలంగాణలో ఓ రహస్య సమావేశానికి చుక్కెదురు

అది చాలా కీలకమైన రహస్య సమావేశం. శ్రద్ధగా, ప్రణాళికా బద్ధంగా.. విశ్వసనీయుల మధ్య చర్చ జరగాల్సిన సమావేశం అది. కానీ, కొన్ని ఫోన్ కాల్స్ అన్నీ తారుమారు చేశాయి. సమావేశం మొదలయ్యే ముందు రాత్రి వచ్చిన కొన్ని కీలకమైన కాల్స్‌తో పెనుమార్పులు జరిగాయి.

హైదరాబాద్‌కు చెందిన ఓ సీనియర్ ఎమ్మెల్యే, ఇప్పుడు కాంగ్రెస్ పార్టీలోకి మారిపోయిన 9 మంది మాజీ బీఆర్‌ఎస్ ఎమ్మెల్యేలకు ఫోన్ చేశారు. వీరంతా తెలంగాణ రాష్ట్ర అసెంబ్లీ కార్యదర్శి డాక్టర్ వి. నరసింహాచార్యులు నుంచి ఇటీవలే అనర్హత నోటీసులు అందుకున్న ఎమ్మెల్యేలు. అందరూ ఒకే చోట కలవాలని, తమ రాజకీయ భవిష్యత్తుపై చర్చించాలని నిర్ణయించుకున్నారు. ఈ సమావేశాన్ని సీనియర్ ఎమ్మెల్యే తన నివాసంలో గోప్యంగా నిర్వహించాలని ప్లాన్ చేశారు. అయితే, ఈ సమావేశం ముందురోజు రాత్రే చీలిపోయింది. “ప్రభుత్వానికి సలహాదారుగా ఉన్న” ఓ కీలకమైన వ్యక్తి ఈ ఎమ్మెల్యేలకు ఒక్కొక్కరికి ఫోన్ కాల్ చేసి.. “మీ స్థానం అస్థిరతకు గురికాకుండా చూసుకుంటాం. మీ భవిష్యత్తుకు ముప్పు లేకుండా చర్యలు తీసుకుంటాం. అందుకే ఆ సమావేశానికి వెళ్లకండి’’ అంటూ గట్టిగా హెచ్చరించారు. ఈ ఫోన్ కాల్స్ ప్రభావం స్పష్టంగా కనిపించింది.

సీనియర్ ఎమ్మెల్యేకు షాక్ 

ఇప్పటికే అనేక మంది అసంతృప్తులతో టచ్‌లో ఉన్న సదరు సీనియర్ ఎమ్మెల్యే, ఈ సమావేశం రద్దు కావడాన్ని తనకు తగిలిన మరో ఎదురు దెబ్బగా భావించారు. అనుచరులు భూముల సమస్యలు, రాజకీయ అస్థిరత వంటి అంశాలతో ఇప్పటికే ఇబ్బందుల్లో ఉన్న ఆ  సీనియర్ ఎమ్మెల్యే దీన్ని మరో విశ్వాస ఘాతుకంగా అనుకున్నారు. అలాంటి పరిస్థితుల్లోనూ  పార్టీ ఫిరాయించే దిశగా సదరు ఎమ్మెల్యే రిస్కీ నిర్ణయం  తీసుకున్నాడు. ఆయనను తమ పార్టీలోకి ఆహ్వానించిన అగ్ర నాయకులు, ఇప్పుడు సదరు సీనియర్  ఎమ్మెల్యేను కాపాడే విషయంలో ఆచితూచి స్పందిస్తుండటం గమనార్హం.

బీఆర్ఎస్‌ ఎమ్మెల్యేల అనర్హత పిటిషన్ల ఆధారంగా అసెంబ్లీ స్పీకర్ జి. ప్రసాద్ కుమార్‌కు ఆ పార్టీ నేతలు ఫిర్యాదు చేశారు. దీంతో “పార్టీ మారినందుకు మమ్మల్ని అనర్హులుగా ప్రకటించొద్దు” అని బీఆర్ఎస్ ఫిరాయింపు ఎమ్మెల్యేలు అసెంబ్లీ కార్యదర్శికి వివరణ ఇవ్వాల్సి ఉంది. నోటీసులు అందుకున్న ఎమ్మెల్యేలు తమ వివరణ ఇచ్చేందుకు కొంత సమయం కోరారు.

నోటీసులు అందుకున్న ఫిరాయింపు ఎమ్మెల్యేలు.. 

• బాన్సువాడ ఎమ్మెల్యే పోచారం శ్రీనివాస్ రెడ్డి
• చేవెళ్ల ఎమ్మెల్యే కాలే యాదయ్య
• జగిత్యాల ఎమ్మెల్యే ఎం. సంజయ్ కుమార్
• గద్వాల ఎమ్మెల్యే బీ. కృష్ణమోహన్ రెడ్డి
• పఠాన్‌ చెరు ఎమ్మెల్యే జీ. మహిపాల్ రెడ్డి
• రాజేంద్రనగర్ ఎమ్మెల్యే టి. ప్రకాష్ గౌడ్
• శేరిలింగంపల్లి ఎమ్మెల్యే ఆరికపూడి గాంధీ
• ఖైరతాబాద్ ఎమ్మెల్యే దానం నాగేందర్
• స్టేషన్ ఘన్‌పూర్ ఎమ్మెల్యే కడియం శ్రీహరి
• భద్రాచలం ఎమ్మెల్యే తెల్లం వెంకట్ రావు

రక్షిస్తారా ? బలి చేస్తారా ? 

ఖైరతాబాద్ ఎమ్మెల్యే దానం నాగేందర్ మాట్లాడుతూ “నేను అసెంబ్లీ కార్యదర్శి నుంచి నోటీసులు ఇప్పటి వరకు పొందలేదు. నేను ఎటువంటి తప్పు చేయలేదు. నా జవాబును సమయానికి ఇస్తాను,” అని అన్నారు. భద్రాచలం ఎమ్మెల్యే తెల్లం వెంకట్ రావు మాత్రం “నాకు స్పీకర్ కార్యాలయం నుంచి నోటీసు వచ్చింది. నా న్యాయ సలహాదారులతో మాట్లాడి, సమాధానం ఇస్తాను” అని స్పష్టం చేశారు. ఈ ఎమ్మెల్యేలు తమ రాజకీయ భవిష్యత్తును కాపాడుకోగలరా? లేదంటే రాజకీయంగా బలికావాల్సి వస్తుందా? అనే అనుమానాలు పెరుగుతున్నాయి. దీని వెనుక ఎవరి హస్తం ఉంది? మళ్లీ మరో ఫోన్ కాల్ ఈ వ్యవహారాన్ని తారుమారు చేస్తుందా? అనే ప్రశ్నలు ఇప్పుడు ఉదయిస్తున్నాయి. ఈ ఫిరాయింపు ఎమ్మెల్యేలకు రక్షణ ఉందా? లేదా చర్యలను ఎదుర్కోవాల్సిందేనా ? అనేది ఇప్పుడు తెలంగాణలో హాట్ టాపిక్‌గా మారింది.

Also Read :RK Roja : రోజా సీటుకు ఎస‌రు.. 12న వైఎస్సార్ సీపీలోకి గాలి జ‌గ‌దీష్ ప్ర‌కాశ్ ?