42% Reservation: బీసీల స్వప్నం మళ్లీ మాటగా మారిందా?

తెలంగాణలో బీసీ వర్గాల సుదీర్ఘ ఆశయంగా నిలిచిన స్థానిక సంస్థల్లో 42 శాతం రిజర్వేషన్ కల్పన మరోసారి అడ్డంకులను ఎదుర్కొంది. రాష్ట్ర ప్రభుత్వం జారీ చేసిన తాజా గవర్నమెంట్ ఆర్డర్ (జీఓ)పై తెలంగాణ హైకోర్టు గురువారం స్టే విధించింది. ఈ నిర్ణయంతో రాష్ట్రవ్యాప్తంగా లక్షలాది బీసీ ప్రజల్లో తీవ్ర నిరాశ నెలకొంది. ముఖ్యమంత్రి రేవంత్ రెడ్డి నేతృత్వంలోని ప్రభుత్వం బీసీ రిజర్వేషన్ల పెంపు కోసం చేసిన ప్రయత్నాలు గత కొద్ది నెలలుగా రాజకీయ, చట్టపరమైన సవాళ్ల మధ్య సాగాయి. అసెంబ్లీలో ఏకగ్రీవంగా ఆమోదించిన రిజల్యూషన్‌కు సెంట్రల్ బీజేపీ ప్రభుత్వం నుంచి అనుమతి రాకపోవడంతో, రాష్ట్ర ప్రభుత్వం ఆర్డినెన్స్ మార్గం ఎంచుకుంది. అయితే రాష్ట్ర గవర్నర్ కేంద్ర ప్రతినిధిగా వ్యవహరిస్తూ ఆ ఆర్డినెన్స్‌పై సంతకం చేయడానికి నిరాకరించారు.

దాంతో చివరి మార్గంగా ప్రభుత్వం జీఓ రూపంలో 42 శాతం రిజర్వేషన్ అమలు చేయాలని నిర్ణయించింది. కానీ బీఆర్ఎస్‌కు అనుబంధ సంస్థ ఈ జీఓని హైకోర్టులో సవాలు చేసింది. సుప్రీంకోర్టు ఈ కేసును విచారించబోమని తెలిపినా, హైకోర్టు తుది నిర్ణయంగా జీఓపై స్టే విధించింది. ఈ పరిణామంపై మంత్రి జూపల్లి కృష్ణారావు తీవ్ర ఆవేశం వ్యక్తం చేశారు. ఆయన మాట్లాడుతూ, “మేము చట్టపరమైన అన్ని మార్గాలు అనుసరించాము. అసెంబ్లీలో రిజల్యూషన్ పాస్ చేశాం, ఆర్డినెన్స్ జారీ చేశాం. గవర్నర్ అడ్డుకట్టవేశారు. ఇప్పుడు ఈ జీఓ కూడా స్టే కావడం విచారకరం. అయినా ఇది ఎండ్ కాదు. బీసీల కోసం మా పోరాటం కొనసాగుతుంది” అని అన్నారు.

TDP : ప్రతి టీడీపీ కార్యకర్త నా కుటుంబసభ్యుడే – నారా లోకేష్

ఇక బీసీ ఉద్యమకారులు తీవ్ర ఆవేదన వ్యక్తం చేశారు. బీసీ నేత ఆర్. కృష్ణయ్య మాట్లాడుతూ, “మేము తట్టిన ప్రతి తలుపూ మూయబడుతోంది. మొదట బీజేపీ, ఇప్పుడు బీఆర్ఎస్. రాజకీయ లాభనష్టాల కోసం బీసీ వర్గాల హక్కులను తొక్కిపెడుతున్నారు. ఇది ప్రజలతో ద్రోహం,” అని విమర్శించారు. రాష్ట్రవ్యాప్తంగా బీసీ సంఘాలు, విద్యార్థి సంఘాలు, సామాజిక సంస్థలు ఈ నిర్ణయంపై ఆందోళనలు ప్రకటిస్తున్నాయి. బీసీ సమాజం ప్రతినిధులు ఈ వ్యవహారాన్ని కేవలం చట్టపరమైన అంశంగా కాకుండా సామాజిక న్యాయం కోసం జరగాల్సిన పోరాటంగా చూస్తున్నారు.

ప్రభుత్వం వైపు నుండి కూడా వెనక్కి తగ్గే ఆలోచన కనిపించడం లేదు. సీఎంరేవంత్ రెడ్డి తన సమీప సహచరులతో జరిగిన సమావేశంలో, “ఇది కేవలం చట్టపరమైన యుద్ధం కాదు, ఇది సమాజానికి హక్కుల యుద్ధం,” అని వ్యాఖ్యానించినట్లు సమాచారం. ఆయన, అవసరమైతే సుప్రీంకోర్టు ద్వారం మరోసారి తట్టే అవకాశం ఉందని సంకేతాలిచ్చారు. నిపుణుల అభిప్రాయం ప్రకారం, ఈ కేసు నాలుగు వారాల్లో మళ్లీ విచారణకు వస్తుంది. ఈ సమయంలో అన్ని పార్టీలు ఒకే విధమైన దృక్పథంతో ముందుకు వస్తే, బీసీ రిజర్వేషన్‌ కల నిజం కావచ్చు. కానీ, ప్రస్తుతం మాత్రం ఆ స్వప్నం మరోసారి నిలిచిపోయినట్టే.

ప్రస్తుతం రాష్ట్ర రాజకీయ వాతావరణం ఈ అంశం చుట్టూ వేడెక్కుతోంది. ప్రభుత్వం నిజాయితీగా ప్రయత్నిస్తోందని, ప్రతిపక్షాలు రాజకీయ ప్రయోజనాల కోసం అడ్డుపడుతున్నాయని అధికార వర్గాలు చెబుతున్నాయి. అయితే, చట్టపరమైన అడ్డంకులను దాటి బీసీ సమాజం కలను సాకారం చేయగలదా అన్న ప్రశ్నకు సమాధానం రాబోయే వారాల్లో వెల్లడి కానుంది.