TCongress: సోనియా నాయకత్వానికే ‘టీకాంగ్రెస్’ జై!

Tcongress

ఐదు రాష్ట్రాల ఎన్నికల్లో కాంగ్రెస్ ఘోర పరాజయం కావడం పట్ల గాంధీ కుటుంబంపై విమర్శలు వెల్లువెత్తున్నాయి. కొంతమంది సోనియా, రాహుల్ గాంధీల నాయకత్వాన్ని బలపరిస్తే, మరికొంతమంది కొత్త నాయకత్వాన్ని కోరుకుంటున్నారు. ఈ నేపథ్యంలో టీపీసీసీ నాయకులు గాంధీల నాయకత్వాన్ని సమర్థించారు. తెలంగాణ కాంగ్రెస్ పార్టీ (టిసిఎల్‌పి) సోనియా లేదా రాహుల్ గాంధీని ఏఐసిసి అధ్యక్ష పదవిని చేపట్టి, పార్టీని భవిష్యత్తులోకి నడిపించాలని కోరింది. సీఎల్పీ నేత మల్లు భట్టి విక్రమార్క అధ్యక్షతన జరిగిన టీసీఎల్పీ సమావేశంలో ఈ మేరకు ఏకగ్రీవ తీర్మానం చేశారు. సమావేశంలో ఎమ్మెల్సీ టి.జీవన్‌రెడ్డి, ఎమ్మెల్యేలు టి.జయప్రకాష్‌ జగ్గారెడ్డి, డి.శ్రీధర్‌బాబు, పొడెం వీరయ్య, సీతక్క పాల్గొన్నారు.

అనంతరం మీడియాతో మాట్లాడుతూ.. మతవాదులు దేశ సమగ్రతను అస్థిరపరిచేందుకు ప్రయత్నిస్తున్న తరుణంలో లౌకిక స్వరూపాన్ని, రాజ్యాంగ స్ఫూర్తిని కాంగ్రెస్ మాత్రమే పరిరక్షించగలదని, ఈ పరిస్థితుల్లో రాహుల్ గాంధీ ఆదర్శంగా నిలిచారన్నారు. దేశానికి నాయకత్వం వహించాలని చెప్పారు. తెలంగాణ రాష్ట్రంలో పంజాబ్ ఎన్నికల ఫలితాలు పునరావృతం కాబోవని, రాష్ట్రంలో కాంగ్రెస్ అధికారంలోకి వస్తుందని ఆశాభావం వ్యక్తం చేశారు. కాగా జీ23 నేతల సమావేశానికి సంబంధించి కాంగ్రెస్ సీనియర్ నేత మల్లికార్జున్ ఖర్గే రియాక్ట్ అవుతూ.. ‘జీ23’ గ్రూపు నేతలు పదే పదే సమావేశాలు నిర్వహిస్తూ పార్టీని విచ్ఛిన్నం చేసేందుకు ప్రయత్నిస్తున్నారని మండిపడ్డారు. మొత్తం కాంగ్రెస్‌లోని ఏ పార్టీ అధ్యక్షుడూ సోనియా గాంధీని బలహీనపరచలేరని, పార్టీ ప్రజలంతా ఆమె వెంటే ఉన్నారని అన్నారు.

Follow us