దేశ రక్షణలో భాగం కాబోతున్న పూడూరు సర్పంచ్

Pudur Sarpanch

• పూడూరు సర్పంచ్‌కి ప్రత్యేక స్థానం
• వీఎల్ఎఫ్ ప్రాజెక్ట్‌లో భాగం
• రాష్ట్రం మొత్తం మీద ఈ సర్పంచ్‌ చాలా స్పెషల్

తెలంగాణలో సర్పంచ్ ఎన్నికలు ముగిశాయి. మరో మూడు రోజుల్లో కొత్తగా ఎన్నికైన సర్పంచులు ప్రమాణ స్వీకారం చేయనున్నారు. మూడు విడతల్లో పంచాయతీ ఎన్నికలు నిర్వహించగా, కొత్తగా ఎన్నికైన సర్పంచులు ప్రారంభంలో గ్రామాల్లోని సమస్యలపై దృష్టి సారించాల్సి ఉంటుంది. మురుగుకాల్వల ఏర్పాటు, తాగునీరు వంటి సమస్యల పరిష్కారం కోసం కృషి చేయాల్సి ఉంటుంది.

రాష్ట్రంలో నూతనంగా ఎన్నికైన సర్పంచులంతా గ్రామ సమస్యలకే పరిమితమైతే, ఒక సర్పంచ్ మాత్రం దేశంలో అత్యంత ప్రతిష్టాత్మకమైన రక్షణ రంగ ప్రాజెక్టులో భాగం కానున్నారు. ఈ ప్రాజెక్టులో సర్పంచ్ నిర్ణయాలు కూడా కీలకం కానున్నాయి. ఇంతకు ఆ గ్రామ పంచాయతీ ఏదంటే పూడూరు.

వికారాబాద్ జిల్లాలోని పుడూరు సర్పంచ్ ఎన్నికలు ఒక సాధారణ గ్రామ పంచాయతీ ఎన్నికల కంటే చాలా ఎక్కువ ప్రాధాన్యతను సంతరించుకున్నాయి. అందుకు ముఖ్య కారణం… దేశ రక్షణ వ్యవస్థలో కీలకమైన ఒక ప్రాజెక్టుకు సంబంధించిన నిర్ణయాలు ఇప్పుడు పుడూరు సర్పంచ్ చేతిలో ఉన్నాయి.

పూడూరు గ్రామం, దమగుండం అటవీ ప్రాంతంలో ఉంది. ఇక్కడ భారత నావికాదళానికి చెందిన ‘వెరీ లో ఫ్రీక్వెన్సీ’ (VLF) కమ్యూనికేషన్ స్టేషన్ నిర్మాణంలో ఉంది. ఇది చాలా సున్నితమైన, వ్యూహాత్మకమైన ప్రాజెక్టు. ఈ VLF స్టేషన్ నిర్మాణంలో, పుడూరు సర్పంచ్ కీలకమైన వ్యక్తిగా వ్యవహరించాల్సి ఉంటుంది. ప్రాజెక్టు ముందుకు సాగాలంటే చాలా సందర్భాల్లో సర్పంచ్ అనుమతి, ఆమోదాలు, సంతకాలు అవసరం. అంటే, కేంద్ర ప్రభుత్వంతో పాటు, గ్రామ పంచాయతీ కూడా ఈ ప్రాజెక్టులో భాగస్వామి అవుతుంది.

ప్రాజెక్టు నిర్మాణంలో భాగంగా… రక్షణ మంత్రిత్వ శాఖ, పర్యావరణ, అటవీ, వాతావరణ మార్పుల మంత్రిత్వ శాఖల నుండి అనుమతులు వచ్చినప్పటికీ… సర్పంచ్ ఆమోదం కూడా తప్పనిసరి. ఉన్నత స్థాయి రక్షణ, పర్యావరణ అధికారులతో సమన్వయం చేసుకోవడం కూడా పూడూరు సర్పంచ్ బాధ్యతల్లో భాగం.

ఈ VLF స్టేషన్ ప్రాజెక్టుకు సుమారు 3,200 కోట్ల రూపాయలు ఖర్చవుతుందని అంచనా వేస్తున్నారు. దీనిని దాదాపు 2,900 ఎకరాల విస్తీర్ణంలో నిర్మిస్తున్నారు. నావికాదళానికి చెందిన సుదూర కమ్యూనికేషన్ సామర్థ్యాలను, ముఖ్యంగా కష్టమైన సముద్ర పరిస్థితుల్లో పనిచేసే సబ్‌మెరైన్లతో సురక్షితమైన సమాచార మార్పిడిని మెరుగుపరచడమే దీని ముఖ్య ఉద్దేశ్యం. ఈ ప్రాజెక్టుకు నవంబర్ 2024లో రక్షణ మంత్రి రాజ్‌నాథ్ సింగ్, ముఖ్యమంత్రి రేవంత్ రెడ్డి సమక్షంలో శంకుస్థాపన చేశారు.

అయితే, ఈ ప్రాజెక్టు పూడూరు, దాని చుట్టుపక్కల గ్రామాల్లో తీవ్ర ఆందోళనకు కారణమవుతోంది. ప్రాజెక్ట్ కోసం లక్ష చెట్లు నరికివేశారని ప్రజలు ఆరోపిస్తున్నారు. ఈ ప్రాజెక్టు వల్ల తమ జీవన విధానంలో మార్పులు వస్తాయని భయపడుతున్నారు. ఈ క్రమంలో ఇప్పుడు అందరి దృష్టి పూడూరు కొత్త సర్పంచ్ ఖిజర్ పాషాపైనే ఉంది. ఈ సందర్భంగా పాషా మాట్లాడుతూ… గ్రామస్తులతో చర్చించి, ప్రతిపాదిత VLF స్టేషన్ విషయంలో భవిష్యత్తు కార్యాచరణపై సమిష్టి నిర్ణయాలు తీసుకుంటానని ఆయన తెలిపారు. అలానే పూడూరు గ్రామాన్ని ఆదర్శగ్రామంగా తీర్చిదిద్దుతానని తెలిపారు.

Follow us