Telangana Cabinet Meeting : క్యాబినెట్ సమావేశానికి కొండా సురేఖ గైర్హాజరు

తెలంగాణ రాజకీయ వర్గాల్లో మంత్రి కొండా సురేఖ గైర్హాజరు చర్చనీయాంశంగా మారింది. రాష్ట్ర మంత్రివర్గ సమావేశానికి ఆమె హాజరు కాకపోవడం పలు అనుమానాలకు తావిస్తోంది. సమాచారం ప్రకారం, సమావేశానికి వెళ్లే ముందు ఆమె డిప్యూటీ సీఎం భట్టి విక్రమార్కతో కొద్దిసేపు భేటీ అయ్యారు. ఆ భేటీ అనంతరం సచివాలయానికి రాకుండా నేరుగా బయటకు వెళ్లిపోయారని అధికార వర్గాలు వెల్లడించాయి. ఇటీవల ఆమెపై వస్తున్న వివాదాలు, పార్టీ అంతర్గత వాతావరణం నేపథ్యంలో సురేఖ ఈ నిర్ణయం తీసుకున్నట్లు చెబుతున్నారు.

Us President : మోదీ తనకు మాటిచ్చారంటూ అమెరికా అధ్యక్షుడు డొనాల్డ్ ట్రంప్..!

గత కొన్ని రోజులుగా సురేఖ చుట్టూ రాజకీయ పరిణామాలు వేగంగా మారుతున్నాయి. ముఖ్యంగా మేడారం అభివృద్ధి పనుల కేటాయింపులో, అటవీశాఖ పరిపాలనలో కొన్ని విభేదాలు చోటుచేసుకోవడంతో పార్టీ నాయకత్వంతో ఆమెకు భిన్నాభిప్రాయాలు వచ్చినట్లు సమాచారం. కొంతమంది అధికారులు ఆమె నిర్ణయాలను ప్రశ్నించడం, మేడారం ప్రాజెక్ట్ టెండర్ల విషయంలో సీనియర్ నేతలతో తగాదాలు జరగడం కూడా ఈ పరిణామాలకు దారితీసినట్లు తెలుస్తోంది. దీంతో పార్టీ హైకమాండ్ కూడా ఆమె వైఖరిపై అసంతృప్తిగా ఉందని సమాచారం.

ఈ నేపథ్యంలో సురేఖ మంత్రివర్గ సమావేశానికి దూరంగా ఉండటం రాజకీయంగా పెద్ద సంకేతంగా భావిస్తున్నారు. పార్టీ లోపల ఆమెపై క్రమశిక్షణా చర్యలు తీసుకునే అవకాశం ఉందని కొందరు నేతలు అంచనా వేస్తున్నారు. అదే సమయంలో, సురేఖ అనుచరులు మాత్రం ఆమెకు అన్యాయం జరుగుతోందని వాదిస్తున్నారు. సచివాలయానికి రాకుండా వెళ్లిపోవడం ఆమె అసంతృప్తికి ప్రతీకగా చూస్తున్నారు. రాబోయే రోజుల్లో ఆమె తదుపరి నిర్ణయం తెలంగాణ రాజకీయాలపై ప్రభావం చూపే అవకాశముందని విశ్లేషకులు పేర్కొంటున్నారు.