Kavitha : బిఆర్ఎస్ ను ఉక్కిరి బిక్కిరి చేస్తున్న కవిత

Telangana Jagruti

మద్యం కుంభకోణం కేసు(Liquor scam case)లో జైలుకు వెళ్లి వచ్చిన తర్వాత బీఆర్ఎస్ ఎమ్మెల్సీ కల్వకుంట్ల కవిత (Kavitha) తన రాజకీయ అడుగులు వ్యూహాత్మకంగా వేస్తున్నారని రాజకీయ వర్గాల్లో చర్చ జరుగుతోంది. తన సొంత పార్టీతోనే ఢీ అంటే ఢీ అనేలా ఆమె వ్యవహరిస్తున్నారని విశ్లేషకులు అభిప్రాయపడుతున్నారు. పార్టీ అధినేత కేసీఆర్‌కు రాసిన లేఖ బయటకు వచ్చినప్పటి నుండి కవిత, బీఆర్ఎస్ ముఖ్య నాయకత్వం మధ్య దూరం పెరిగిందని స్పష్టంగా తెలుస్తోంది. ఆమె తన అసమ్మతిని బహిరంగంగానే వ్యక్తపరుస్తూ, పార్టీలో తనకు సరైన గుర్తింపు లేదని ఆవేదన వ్యక్తం చేయడం గమనార్హం.

కాళేశ్వరం కమిషన్ బీఆర్ఎస్ చీఫ్ కేసీఆర్‌కు నోటీసులు ఇవ్వడంపై ఆగ్రహం వ్యక్తం చేస్తూ ఇందిరా పార్కు వద్ద ధర్నాకు దిగారు. బీఆర్ఎస్ పార్టీ చేయనిది తాను కేసీఆర్ కోసం ఈ ధర్నా చేపడుతున్నట్లు ప్రకటించి, పార్టీకి, పార్టీ కార్యకర్తలకు తనదైన శైలిలో రాజకీయ సందేశం పంపారు. ఆ తర్వాత బీసీ ఉద్యమం పేరుతో మరోసారి ఇందిరా పార్కు వద్ద ధర్నా చేసి, బీఆర్ఎస్ అనుమతి లేకుండానే ఇతర పార్టీల నేతలను కలుసుకున్నారు. ఈ చర్యల ద్వారా కవిత తన సొంత దారి చూసుకుంటున్నారని స్పష్టమవుతోంది. ఈ కార్యక్రమాల్లో ఆమె బీఆర్ఎస్ కండువాను ధరించకుండా, తన సొంత సంస్థ తెలంగాణ జాగృతి కండువానే ధరించడం కూడా గమనించాల్సిన విషయం.

Tesla : భారత్‌లో టెస్లా దూకుడు.. ఢిల్లీలో రెండవ షోరూమ్ ప్రారంభం

తాజాగా బీఆర్ఎస్ అనుబంధ కార్మిక సంఘమైన తెలంగాణ బొగ్గుగని కార్మిక సంఘం (టీజీబీకేఎస్) గౌరవ అధ్యక్షురాలు పదవి నుండి కవితను తప్పించి, మాజీ మంత్రి కొప్పుల ఈశ్వర్‌ను నియమించారు. దీనికి ప్రతీకారంగా కవిత తన ఆధ్వర్యంలోని తెలంగాణ జాగృతికి అనుబంధంగా కార్మిక విభాగాన్ని పటిష్టం చేశారు. అంతేకాకుండా హెచ్‌ఎంఎస్ కార్మిక సంఘంతో కలిసి పని చేయనున్నట్లు ప్రకటించారు. రాబోయే సింగరేణి గుర్తింపు సంఘం ఎన్నికల్లో బీఆర్ఎస్ కార్మిక సంఘానికి కవిత వ్యతిరేకంగా పనిచేసే అవకాశం ఉందని ఈ పరిణామాలు సూచిస్తున్నాయి. ఇది బీఆర్ఎస్‌తో కవిత అమీ తుమీ తేల్చుకోవడానికి సిద్ధపడినట్లు కనిపిస్తోంది.

కవిత చేపట్టిన ఈ కార్యక్రమాలు, ముఖ్యంగా మరో కార్మిక సంఘంతో చేతులు కలపడం అనేది పార్టీ లక్ష్మణ రేఖ దాటినట్లేనని బీఆర్ఎస్ సీనియర్లు భావిస్తున్నారు. ఇది పార్టీని బలహీనపరిచే చర్యగా అభివర్ణిస్తున్నారు. అయితే, ఇప్పటివరకు కేసీఆర్ లేదా కేటీఆర్ ఈ విషయాలపై ఎలాంటి వ్యాఖ్యలు చేయకపోవడం, క్రమశిక్షణ చర్యలు తీసుకోకపోవడం గమనార్హం. ఇది వారి వ్యూహమా లేక భవిష్యత్తులో పార్టీకి నష్టం చేస్తుందా అనేది వేచి చూడాలి. కవిత వేస్తున్న అడుగులు తెలంగాణ రాజకీయాల్లో ఎలాంటి మార్పులు తెస్తాయో చూడాలి.

Follow us