జాబ్ క్యాలెండర్ కోసం హైదరాబాద్ లో రోడ్డెక్కిన నిరుద్యోగులు

Job Calendar Students

• నిరుద్యోగ యువత నిరసన
• మరోసారి రోడ్డెక్కిన నిరుద్యోగులు
• రహదారిపై బైఠాయించి ప్రభుత్వానికి వ్యతిరేకంగా నినాదాలు

తెలంగాణ రాష్ట్రంలో ఉద్యోగ నోటిఫికేషన్ల కోసం ఎదురుచూస్తున్న నిరుద్యోగ యువత నిరసన గళం విప్పింది. ప్రభుత్వం వెంటనే పక్కాగా ‘జాబ్ క్యాలెండర్’ (Job Calendar) విడుదల చేయాలనే డిమాండ్‌తో హైదరాబాద్‌లోని కీలక ప్రాంతమైన దిల్సుఖ్‌నగర్‌లో వందలాది మంది విద్యార్థులు, అభ్యర్థులు రోడ్డెక్కారు. గత కొంతకాలంగా నోటిఫికేషన్ల విషయంలో నెలకొన్న అనిశ్చితి తమ భవిష్యత్తును ప్రశ్నార్థకం చేస్తోందని ఆవేదన వ్యక్తం చేస్తూ, ప్రభుత్వం తక్షణమే స్పందించి పరీక్షల షెడ్యూల్‌ను ప్రకటించాలని వారు నినదించారు. ఈ ఆందోళన కార్యక్రమం నిరుద్యోగుల్లో పేరుకుపోయిన అసంతృప్తికి అద్దం పడుతోంది.

Job Calendar Students Protest

దిల్సుఖ్‌నగర్ చౌరస్తా వద్ద విద్యార్థులు భారీ ర్యాలీగా తరలివచ్చి ప్రధాన రహదారిపై బైఠాయించడంతో ఉద్రిక్త పరిస్థితి నెలకొంది. రహదారిపై బైఠాయించి ప్రభుత్వానికి వ్యతిరేకంగా నినాదాలు చేయడంతో కిలోమీటర్ల మేర ట్రాఫిక్ నిలిచిపోయింది. కార్యాలయాలకు వెళ్లే ఉద్యోగులు, సాధారణ ప్రయాణికులు మరియు వాహనదారులు గంటల తరబడి ట్రాఫిక్‌లో చిక్కుకుపోయి తీవ్ర ఇబ్బందులు ఎదుర్కొన్నారు. విద్యార్థులు పట్టుబట్టి రోడ్డును ఖాళీ చేయకపోవడంతో ఆ ప్రాంతమంతా ఆందోళనకారులతో కిక్కిరిసిపోయింది.

పరిస్థితిని గమనించిన పోలీసులు వెంటనే రంగంలోకి దిగి ఆందోళనకారులను శాంతింపజేసే ప్రయత్నం చేశారు. అయితే విద్యార్థులు తమ డిమాండ్లపై స్పష్టమైన హామీ ఇచ్చే వరకు కదిలేది లేదని భీష్మించడంతో, పోలీసులు వారిని బలవంతంగా అదుపులోకి తీసుకున్నారు. తోపులాటల మధ్య నిరసనకారులను అరెస్టు చేసి సమీపంలోని పోలీస్ స్టేషన్లకు తరలించారు. అనంతరం ట్రాఫిక్‌ను క్రమబద్ధీకరించి వాహనాల రాకపోకలను పునరుద్ధరించారు. ప్రభుత్వం స్పందించి సానుకూల నిర్ణయం తీసుకోకపోతే రాష్ట్రవ్యాప్తంగా ఉద్యమాన్ని ఉధృతం చేస్తామని ఈ సందర్భంగా విద్యార్థి సంఘాలు హెచ్చరించాయి.

Follow us