Future City: ఫ్యూచర్ సిటీకి సహకరించండి.. కోర్టుల చుట్టూ తిరగొద్దు – సీఎం రేవంత్

తెలంగాణలోని మీరాఖాన్‌పేట వద్ద ప్రారంభం కానున్న ‘ఫ్యూచర్ సిటీ’ (Future City) ప్రాజెక్ట్‌పై సీఎం రేవంత్ రెడ్డి (Revanth) కీలక వ్యాఖ్యలు చేశారు. ఈ ప్రాజెక్ట్ రాష్ట్ర భవిష్యత్తుకు, ముఖ్యంగా రాబోయే తరాలకు అంతర్జాతీయ ప్రమాణాల వసతులు కల్పించడానికి ఉద్దేశించబడిందని ఆయన అన్నారు. ఫ్యూచర్ సిటీ రూపకల్పనలో అత్యాధునిక సాంకేతికత, పర్యావరణ అనుకూల అభివృద్ధి, పారిశ్రామిక కేంద్రాలు, ఐటీ హబ్‌లు, నివాస ప్రాంతాలు వంటి అంశాలను ప్రతిపాదిస్తున్నామని సీఎం వివరించారు. ఈ నగరాన్ని పదేళ్లలో న్యూయార్క్‌కి పోటీ పడేలా తీర్చిదిద్దడమే లక్ష్యమని ఆయన స్పష్టం చేశారు.

సీఎం రేవంత్ రెడ్డి మాట్లాడుతూ.. ఫ్యూచర్ సిటీపై రాజకీయ వర్గాల నుంచి వస్తున్న ఆరోపణలను ఖండించారు. “రేవంత్ రెడ్డికి ఈ ప్రాంతంలో భూములు ఉన్నాయని కొందరు చెబుతున్నారు. నాకు భూములు ఉంటే అవి అందరికీ కనిపిస్తాయి, దాచిపెట్టడం సాధ్యం కాదు” అని ఆయన వ్యాఖ్యానించారు. ఈ ప్రాజెక్ట్ పూర్తి స్థాయిలో పారదర్శకంగా జరుగుతుందని, ఎలాంటి దుర్వినియోగం లేదని తెలిపారు. సింగరేణి కోసం 10 ఎకరాలను కేటాయించినట్టు ఆయన ప్రకటించి, ఈ ప్రాజెక్ట్‌లో ప్రభుత్వ రంగ సంస్థలకు, ప్రైవేట్ పెట్టుబడిదారులకు సమాన అవకాశాలు కల్పిస్తామని చెప్పారు.

ఫ్యూచర్ సిటీ అభివృద్ధికి అందరూ సహకరించాలని, ఏవైనా సమస్యలు ఉంటే అవి ప్రభుత్వ స్థాయిలో పరిష్కరించబడతాయని సీఎం హామీ ఇచ్చారు. “కోర్టుల చుట్టూ తిరగకండి. రాజకీయ పార్టీలు ఉసిగొల్పితే చిక్కుల్లో పడకండి. సమస్యలు ఉంటే అవుట్ ఆఫ్ కోర్ట్ సెటిల్మెంట్ చేసుకోండి” అని ఆయన సూచించారు. రాబోయే తరాలకు అంతర్జాతీయ స్థాయి మౌలిక వసతులు, ఉపాధి అవకాశాలు కల్పించడమే ఈ ప్రాజెక్ట్ ప్రధాన ఉద్దేశమని సీఎం రేవంత్ స్పష్టం చేశారు. ఈ ప్రాజెక్ట్ పూర్తి అయితే తెలంగాణను గ్లోబల్ మ్యాప్‌లో ప్రత్యేక స్థానం దక్కుతుందని ఆయన ధీమా వ్యక్తం చేశారు.