I Am With CBN : చంద్ర‌బాబుకి మ‌ద్ధ‌తుగా నేడు హైద‌రాబాద్ ఓఆర్ఆర్‌పై కార్ల ర్యాలీ

“ఐయామ్ విత్ సీబీఎన్ ” అంటూ హైద‌రాబాద్ ఐటీ కారిడార్ మారుమోగుతుంది. మాజీ సీఎం చంద్ర‌బాబు నాయుడు స్కిల్ డెవ‌ల‌ప్‌మెంట్ కేసులో అరెస్ట్ అయి రాజ‌మండ్రి సెంట్ర‌ల్ జైల్లో రిమావ‌డ్‌లో ఉన్న విష‌యం తెలిసిందే. అయితే బాబు జైలుకు వెళ్లిన త‌రువాత ఆయ‌న‌కు రెండు తెలుగు రాష్ట్రాల్లోనే కాక ఇత‌ర రాష్ట్రాల్లో కూడా ఆయ‌న‌కు మ‌ద్ద‌తు ల‌భిస్తుంది. హైదరాబాద్‌, బెంగుళూరు, చెన్నైతో పాటు అమెరికాలోని తెలుగు ప్ర‌జ‌లు చంద్ర‌బాబుకు మ‌ద్దతుగా నిలుస్తున్నారు. ఇప్ప‌టికే గ‌త నాలుగు రోజులుగా చంద్ర‌బాబుకు తెలంగాణ‌లో ప్ర‌జ‌లు మ‌ద్ద‌తుగా త‌ర‌లివ‌స్తున్నారు. ముఖ్యంగా హైద‌రాబాద్ ఐటీ కారిడార్‌లో స్వ‌చ్ఛంధంగా ఉద్యోగులు త‌ర‌లివ‌చ్చి చంద్ర‌బాబుకు మ‌ద్ధ‌తు తెలుపుతున్నారు. ఐటీ అంటే చంద్ర‌బాబు అని.. ఆనాడు ఆయ‌న చేసిన కృషి ఫ‌లితంగానే తాము ఐటీ నిపుణులుగా ఉన్నామ‌ని వారు చెప్తున్నారు. హైద‌రాబాద్‌లోని గ‌చ్చిబౌలి విప్రో స‌ర్కిల్‌, సైబ‌ర్ ట‌వ‌ర్స్‌, కేపీహెచ్‌బీ ఏరియాల్లో చంద్ర‌బాబు మ‌ద్ద‌తుగా ఐటీ ఉద్యోగులు ఆందోళ‌న చేశారు. నేడు మ‌ణికొండ‌లో ఐటీ ఉద్యోగులు ఆందోళ‌న‌కు పిలుపునిచ్చారు. ఇటు ఓఆర్ఆర్‌పై చంద్ర‌బాబుకు మ‌ద్ధ‌తుగా భారీ కార్ల ర్యాలీని ఐటీ ఉద్యోగులు నిర్వ‌హించ‌నున్నారు. ఐటీ ఉద్యోగుల ఆందోళ‌న నేప‌థ్యంలో పోలీసులు అప్ర‌మ‌త్త‌మైయ్యారు. న‌గ‌రంలో ఎలాంటి ఆందోళ‌న‌కు, ర్యాలీల‌కు అనుమ‌తి లేద‌ని పోలీసులు చెప్తున్నారు.