Bhoodan Lands : అసలు ఏంటి ‘వెలుగుమట్ల’ భూముల వివాదం ? ఎక్కడ మొదలైంది ?

Bhoodan Lands Khammam

Bhoodan Lands : ఖమ్మం నగర శివార్లలోని వెలుగుమట్ల భూదాన్ భూముల వివాదం ప్రస్తుతం తీవ్ర ఉత్కంఠకు దారితీస్తోంది. దశాబ్దాల చరిత్ర ఉన్న ఈ భూ సమస్య ఇప్పుడు వందలాది పేద, మధ్యతరగతి కుటుంబాల నివాసాలను ప్రశ్నార్థకం చేసింది.

భూదానోద్యమం నుండి భూ కబ్జాల వరకు

ఈ వివాదానికి బీజం 1950వ దశకంలో పడింది. ఆచార్య వినోబా భావే ప్రారంభించిన భూదానోద్యమానికి ఆకర్షితులైన రాయల కోటేశ్వరరావు అనే భూస్వామి, ఖమ్మం జిల్లా వెలుగుమట్ల రెవెన్యూ పరిధిలోని సర్వే నంబర్ 106లో ఉన్న సుమారు 62 ఎకరాల భూమిని భూదాన్ బోర్డుకు దానం చేశారు. పేదలకు పంచాలనే ఉద్దేశంతో ఇచ్చిన ఈ భూమి, కాలక్రమేణా ఖమ్మం నగరం విస్తరించడంతో అత్యంత విలువైనదిగా మారింది. ఇదే అదనుగా భావించిన కొందరు అక్రమార్కులు, రాజకీయ పలుకుబడితో తప్పుడు పత్రాలు సృష్టించి, ఈ భూదాన్ భూములను ప్రైవేట్ వ్యక్తులకు విక్రయించారు.

పేదల సొంతింటి కల – కోర్టు స్టే

తమ కష్టార్జితంతో సొంతిళ్లు నిర్మించుకోవాలని భావించిన సామాన్యులు, ఆ పత్రాలు అసలైనవేనని నమ్మి ప్లాట్లు కొనుగోలు చేశారు. చాలామంది ఇప్పటికే అక్కడ ఇళ్లు నిర్మించుకుని నివసిస్తున్నారు. అయితే, ఈ భూములు భూదాన్ బోర్డుకు చెందినవని, వీటి విక్రయాలు చెల్లవని ప్రభుత్వం కోర్టును ఆశ్రయించింది. కేసు విచారణలో ఉండగానే, కోర్టు అక్కడ ఎటువంటి కొత్త నిర్మాణాలు చేపట్టవద్దని, యథాతథ స్థితిని (Status Quo) కొనసాగించాలని స్టే ఉత్తర్వులు జారీ చేసింది. కానీ కోర్టు ఆదేశాలను ఉల్లంఘించి నిర్మాణాలు కొనసాగడంతో అధికారులు రంగంలోకి దిగారు.

కూల్చివేతలు

కోర్టు ఆదేశాల అమలులో భాగంగా రెవెన్యూ మరియు మున్సిపల్ అధికారులు భారీ పోలీస్ బందోబస్తు మధ్య వెలుగుమట్లలోని అక్రమ నిర్మాణాలను తొలగిస్తున్నారు. తమ ఇళ్లను కూల్చివేయవద్దని బాధితులు ఆందోళనలు చేస్తున్నప్పటికీ, చట్టపరంగా ఆ భూమి ప్రభుత్వానిదేనని అధికారులు స్పష్టం చేస్తున్నారు. తప్పుడు పత్రాలతో భూములు అమ్మిన రియల్టర్ల మోసానికి తాము బలైపోయామని బాధితులు కన్నీరుమున్నీరవుతున్నారు. ఈ వివాదం ఖమ్మం రాజకీయాల్లోనూ వేడి పుట్టిస్తోంది. ప్రభుత్వం మానవతా దృక్పథంతో ఆలోచించి తమకు న్యాయం చేయాలని బాధితులు వేడుకుంటున్నారు.

Follow us