ఫిర్యాదులు రావడంతో సమస్యను పరిష్కరించామన్న యూట్యూబ్

రికమెండేషన్ సిస్టంలో సమస్య వల్ల యూట్యూబ్ హోంపేజీ, యాప్, యూట్యూబ్ కిడ్స్, మ్యూజిక్‌లో వీడియోలు రాలేదని తెలిపింది. లాగిన్ కాలేకపోయామని కొందరి నుంచి ఫిర్యాదులు అందాయని తెలిపింది. ఈ విస్తృత సమస్యను పరిష్కరించామని, ప్రస్తుతం అన్ని సేవలు యథావిధిగా అందుబాటులోకి వచ్చాయని తెలిపింది.

ప్రపంచవ్యాప్తంగా లక్షలాది మంది వినియోగదారులు అంతరాయంపై ఫిర్యాదు చేయడంతో దానిని పునరుద్ధరించినట్లు యూట్యూబ్ వెల్లడించింది. ఈ సమస్యను అన్నిచోట్ల పరిష్కరించినట్లు తెలిపింది. సాంకేతిక సమస్యను పరిష్కరించేంత వరకు సహనం వహించిన వినియోగదారులకు ధన్యవాదాలు కూడా తెలిపింది. ఈ మేరకు టీమ్ యూట్యూబ్ ‘ఎక్స్’ వేదికగా పోస్టు చేసింది.

కాగా, అవుటేజ్-ట్రాకింగ్ సైట్ డౌన్‌డిటెక్టర్ యూట్యూబ్‌పై 3,21,958 ఫిర్యాదులు వచ్చినట్లు సూచించింది. భారత్‌లో ఉదయం ఆరు గంటల ప్రాంతంలో 20,000 ఫిర్యాదులు వచ్చినట్లు సూచించింది. ఇందులో ఎక్కువగా యూట్యూబ్ యాప్ వినియోగదారుల నుంచి వచ్చిన ఫిర్యాదుగా తెలిపింది.