Drugs : అంత‌రాష్ట్ర డ్ర‌గ్స్ వ్యాపారి అరెస్ట్‌.. భారీగా డ్ర‌గ్స్ స్వాధీనం

Drugs

డ్రగ్స్ విక్రయిస్తున్న అంతర్ రాష్ట్ర డ్రగ్స్ వ్యాపారిని చౌటుప్పల్ పోలీసులు రెడ్ హ్యాండెడ్ గా పట్టుకున్నారు. నిందితుడి వద్ద నుంచి రూ.7.92 లక్షల విలువైన డ్రగ్స్‌ను అధికారులు స్వాధీనం చేసుకున్నారు. నిందితుడు సయన్ లాహిరి (27) పశ్చిమ బెంగాల్‌కు చెందినవాడిగా పోలీసులు గుర్తించారు. నిందితుడు స‌య‌న్ లాహిరి నుంచి బ్లూ ఎక్స్‌టసీ, పింక్‌ ఎక్స్‌టసీ, ఎండీఎంఏ వంటి పలు మాత్రలు, 3.9 గ్రాముల కొకైన్‌ను పోలీసులు స్వాధీనం చేసుకున్నారు. డిప్యూటి సూపరింటెండెంట్ ఆఫ్ పోలీస్ రాజేష్ చంద్ర తెలిపిన వివరాల ప్రకారం స‌య‌న్ లాహిరి పేరుమోసిన డ్రగ్స్ విక్రేత అని.. గోవాలో గత మూడు సంవత్సరాలుగా డ్రగ్స్ విక్రయిస్తున్నాడని తెలిపారు. ఉత్తర గోవాలోని ఎడ్మండ్ దిలీప్ నుంచి డ్ర‌గ్స్ సేకరించి రాష్ట్రంలో తక్కువ ధరకు, ఇతర రాష్ట్రాల్లో ఎక్కువ ధరకు విక్రయించాడని తెలిపారు. గోవాలో అతని వ్యాపారం సరిగ్గా లేదని.. డబ్బు కొరత కారణంగా హైదరాబాద్‌లో డ్రగ్స్ వ్యాపారాన్ని విస్తరించాలని ప్లాన్ చేశాడని డీఎస్పీ తెలిపారు. స‌య‌న్ లాహిరి అశోకా ఇంజినీరింగ్ కాలేజీ సమీపంలో కస్టమర్లకు డ్రగ్స్ విక్రయిస్తూ రెడ్ హ్యాండెడ్ గా పట్టుబడ్డాడు. దీనిపై కేసు నమోదు చేసి దర్యాప్తు జరుపుతున్నారు.

Follow us