Gitanjali Iyer: ప్రముఖ యాంకర్ గీతాంజలి అయ్యర్ కన్నుమూత

Gitanjali Iyer: ప్రముఖ న్యూస్ యాంకర్ గీతాంజలి అయ్యర్ (Gitanjali Iyer) బుధవారం (జూన్ 7) కన్నుమూశారు. ఆమె వయస్సు 76 సంవత్సరాలు. ఆమె దూరదర్శన్‌లో 30 సంవత్సరాలకు పైగా పనిచేశారు. అయ్యర్ (Gitanjali Iyer) మృతితో అభిమానుల్లో విషాద ఛాయలు అలముకున్నాయి. సోషల్ మీడియాలో అయ్యర్‌కు నివాళులు అర్పిస్తూ, ఆమె కుటుంబానికి పలువురు సంతాపం తెలియజేస్తున్నారు. గీతాంజలి అయ్యర్ మృతి పట్ల కేంద్ర క్రీడా మంత్రి అనురాగ్ ఠాకూర్ కూడా సంతాపం తెలిపారు.

క్రీడా మంత్రి అనురాగ్ ఠాకూర్ సంతాపం 

దూరదర్శన్, ఆల్ ఇండియా రేడియోలో మొదటి, అత్యుత్తమ ఆంగ్ల వార్తా యాంకర్‌లలో ఒకరైన గీతాంజలి అయ్యర్ మరణం గురించి వినడం చాలా బాధ కలిగించిందని క్రీడా మంత్రి ట్వీట్ చేశారు. జర్నలిజం, ప్రసార పరిశ్రమలలో చెరగని ముద్ర వేశారు. ఈ క్లిష్ట సమయంలో ఆమె కుటుంబ సభ్యులకు, ప్రియమైనవారికి నా హృదయపూర్వక సానుభూతి. ఓం శాంతి అని ట్వీట్ చేశారు.

Also Read: Wrestlers protest : రెజ్ల‌ర్ల నిర‌స‌న‌కు బ్రేక్‌! కేంద్ర మంత్రితో సుదీర్ఘంగా చ‌ర్చ‌లు.. స‌యోధ్య కుదిరిన‌ట్లేనా?

గీతాంజలి అయ్యర్ గురించి..

గీతాంజలి అయ్యర్ కోల్‌కతాలోని లోరెటో కాలేజీ నుండి గ్రాడ్యుయేషన్ పూర్తి చేసింది. నేషనల్ స్కూల్ ఆఫ్ డ్రామా నుంచి డిప్లొమా కూడా చేశారు. దేశంలోని తొలి ఆంగ్ల వార్తా యాంకర్లలో ఆమె ఒకరు. అయ్యర్ 1971లో దూరదర్శన్‌లో చేరారు. ఛానల్‌తో ఆమె కెరీర్‌లో నాలుగు సార్లు ఉత్తమ యాంకర్ అవార్డును అందుకున్నారు. 1989లో ఆమె ప్రముఖ మహిళల గౌరవార్థం ఇచ్చే ఇందిరా గాంధీ ప్రియదర్శిని అవార్డును కూడా అందుకుంది. వార్తా పరిశ్రమలో సుదీర్ఘ కెరీర్ తర్వాత ఆమె కార్పొరేట్ కమ్యూనికేషన్స్, ప్రభుత్వ సంబంధాలు, మార్కెటింగ్‌లోకి ప్రవేశించింది. ఆమె భారతదేశంలోని ‘వరల్డ్ వైడ్ ఫండ్’కి ప్రధాన దాతలకు అధిపతి. శ్రీధర్ క్షీరసాగర్ టీవీ సీరియల్ ‘ఖందాన్’లో కూడా నటించారు.