CM Siddaramaiah Review Meeting: సమీక్షల వేళా ముఖ్యమంత్రి సిద్దా రామయ్యా సీరియస్

ఆర్థిక సంవత్సరం తొలి త్రైమాసికం ఇంకా మొదలుకాకముందే ముఖ్యమంత్రి సిద్ధరామయ్య శాఖల ప్రగతిని సమీక్షించారు. శుక్రవారం జిల్లా పాలనాధికారులు, సీఈఓలతో ఆయన విస్తృతంగా సమావేశమయ్యారు. ఈ సందర్భంగా లక్ష్యాలను సాధించలేకపోయిన అధికారులపై సీఎం తీవ్ర అసంతృప్తి వ్యక్తం చేశారు. ప్రజలకు అందుబాటులో ఉండాల్సిన కొంతమంది అధికారులు నిర్లక్ష్యంగా వ్యవహరిస్తున్నారని తెలిసి వారిపై మండిపడ్డారు.

ప్రజలతో నేరుగా మమేకమవండి

‘‘ప్రభుత్వ సేవలు, పథకాలు సమర్థంగా అమలయ్యేందుకు జిల్లా పాలనాధికారులు, పోలీసు యంత్రాంగం, సీఈఓలు కీలక పాత్ర వహించాలి. మీరు రోజూ కార్యాలయాల్లో ఉండి ప్రజల ఫిర్యాదులను వినాలి. ప్రతి వారం జరిగే ‘జనస్పందన’ కార్యక్రమాల గురించి ముందుగానే సమాచారం ఇవ్వాలి. పాఠశాలలు, ఆస్పత్రులు, వసతి గృహాల పరిస్థితిని తెలుసుకోవడానికి ఆకస్మిక తనిఖీలు నిర్వహించాలి. కానీ ఇప్పటివరకు మీ నుంచి ఏ తనిఖీ వివరాలు అందలేదు,’’ అంటూ సీఎం అసహనం వ్యక్తం చేశారు.

పారదర్శక పాలన కోసం ప్రత్యేక డ్యాష్‌బోర్డు

పాలనను మరింత పారదర్శకంగా, వేగంగా సాగించేందుకు ప్రభుత్వం ప్రత్యేక డ్యాష్‌బోర్డును ఆవిష్కరించింది. లక్ష్యాలను చేరిన అధికారులను సీఎం పేరుపేరునా ప్రశంసించారు. ఇదే సమయంలో కిందిస్థాయి అధికారులపై బాధ్యతలు వదలేయడంతో జిల్లా కలెక్టర్లు వెనుకడుగు వేస్తున్నారన్న అభిప్రాయాన్ని వ్యక్తం చేశారు.

వల్లభాయి పటేల్‌ స్ఫూర్తిగా

1949లో వల్లభాయి పటేల్‌ చేసిన ఐఏఎస్‌ సేవల ప్రాముఖ్యతపై వ్యాఖ్యలను గుర్తు చేస్తూ, స్వాతంత్య్ర పోరాట ఆశయాలను నెరవేర్చడంలో ఐఏఎస్‌ అధికారుల పాత్రను సీఎం ప్రస్తావించారు. పాలనలో శ్రద్ధ వహించాలని, ప్రజల సంక్షేమం పట్ల బాధ్యతతో ఉండాలని అధికారులను హెచ్చరించారు.

ఇంత నిర్లక్ష్యమా? – సీఎం సిద్ధరామయ్య ఆగ్రహం

‘‘దేశానికి స్వాతంత్య్రం వచ్చి ఏడు దశాబ్దాలు దాటినా, ఇంకా బాల్యవివాహాలు కొనసాగుతుండడం దురదృష్టకరం. ఈ ఏడాదిలోనే 700 బాల్యవివాహాలు జరిగినట్టు నివేదికలు చెబుతున్నాయి. ఈ విషయంలో జిల్లా యంత్రాంగం ఎందుకు నిర్లక్ష్యంగా వ్యవహరిస్తోంది? తాలూకా, గ్రామస్థాయి సిబ్బందిని అప్రమత్తం చేయడంలో ఇంత అలసత్వమా?’’ అంటూ ముఖ్యమంత్రి సిద్ధరామయ్య తీవ్ర అసహనం వ్యక్తం చేశారు.

చెరువుల ఆక్రమణలపై అధికారుల దృష్టికి

మరోవైపు, చెరువులపై జరుగుతున్న ఆక్రమణలను తొలగించడంలో అధికారుల పాత్రలపై కూడా సీఎం ప్రశ్నించారు. “రెండు మూడు జిల్లాల్లో ఒక చెరువు ఆక్రమణను కూడా తొలగించలేదంటే అధికారులు ఏమి చేస్తున్నారు?” అని ఆయన నిలదీశారు.

రైతుల సమస్యలు, బాలింతల మరణాలు, విద్యా ఫలితాలపై ఆందోళన

రైతుల ఆత్మహత్యలలో 13 కుటుంబాలకు ఇప్పటికీ పరిహారం అందలేదని సీఎం వెల్లడించారు. అలాగే, బాలింతల మరణాలు కేరళతో పోలిస్తే కర్ణాటకలో ఎక్కువగా ఉండటం ఆందోళన కలిగిస్తోందని పేర్కొన్నారు. కల్యాణ కర్ణాటకలో పదో తరగతి, పీయూసీ పరీక్షల్లో తక్కువ ఉత్తీర్ణత నమోదయ్యిందని, దీనిపై సమగ్ర వివరణ కోరారు. దక్షిణ కన్నడ జిల్లాలో ఇళ్లు, భూములు కూలిపోవడంతో ప్రజలు చిక్కుకున్నా, రక్షణ చర్యలు ఆలస్యం కావడం పట్ల అసంతృప్తి వ్యక్తం చేశారు.

ప్రశాసన పారదర్శకత కోసం ప్రత్యేక డ్యాష్‌బోర్డ్ ఆవిష్కరణ

పాలనలో పారదర్శకతను, వేగవంతమైన నిర్ణయాలను తీసుకునేందుకు ముఖ్యమంత్రి సిద్ధరామయ్య శుక్రవారం ప్రత్యేక డ్యాష్‌బోర్డ్‌ను ప్రారంభించారు. సెంటర్ ఫర్ ఈ-గవర్నెన్స్ (CeG) రూపొందించిన ఈ డ్యాష్‌బోర్డ్ ద్వారా పథకాల పురోగతి, రోజువారీ సమీక్షలు, లక్ష్యాలపై నిఘా ఉంచే అవకాశాన్ని కల్పించారు.

ఈ డ్యాష్‌బోర్డ్‌లో:

• ఆర్థిక ప్రగతి
• న్యాయ వ్యవస్థలు
• మౌలిక సదుపాయాలు
• పౌర కేంద్రిత పాలన అనే నాలుగు ప్రధాన విభాగాలపై దృష్టి పెట్టారు.

సకాల, ఆర్‌టీఐ, జనస్పందన, నీటిపారుదల, వస్తువుల పంపిణీ, సాంకేతిక రంగం, సామాజిక సంక్షేమ పథకాలు వంటి కీలక రంగాల్లో రియల్‌టైమ్ పర్యవేక్షణకు వీలుగా ఈ వెబ్‌పోర్టల్ రూపొందించబడింది.