Hair Oil: తలకు నూనె రాసేటప్పుడు ఈ పొరపాట్లు అస్సలు చేయకండి..!!

అందమైన, పొడవాటి జుట్టు కావాలని ప్రతిఒక్క అమ్మాయి కోరుకుంటుంది. కానీ మారిన జీవనశైలి, సరైన పౌష్టికాహారం తీసుకోకపోవడం, రసాయనిక పదార్థాలతో కూడిన షాంపూలు వాడకం వల్ల జుట్టు దెబ్బతింటుంది. అలాగే చుండ్రు, పొడి జుట్టు, దురద వంటి సమస్యల వల్ల జుట్టు ఎక్కువగా రాలిపోతుంది. జుట్టు ఆరోగ్యంగా ఉండాలంటే తలకు నూనె రాయడం సహజం. అయితే జుట్టుకు నూనే రాసేటప్పుడు తప్పులు చేయకూడదు, జుట్టు సంరక్షణ గురించి ఆయుర్వేదం ఏం చెబుతోంది?తెలుసుకుందాం.

రాత్రి పూట తలకు నూనె రాస్తే…
కొందరు రాత్రిపూట తలకు నూనె రాసుకుంటే జుట్టు బాగా పెరుగుంతుందని అనుకుంటారు. అది కరెక్టు కాదు. రాత్రిపూట తలకు నూనె రాసుకోవడం వల్ల జుట్టు పాడవుతుంది. డల్ గా మారే ఛాన్స్ ఉంటుంది. అంతేకాదు.. సైనస్, మెడనొప్పి, తలనొప్పి వంటి ఆరోగ్య సమస్యలు కూడా వచ్చే ప్రమాదం ఉంటుంది. కాబట్టి రాత్రంతా తలకు నూనె రాసుకుని పడుకోవడం మంచిది కాదని వైద్యులు చెబుతున్నారు.

స్నానం చేసిన తర్వాత..
జుట్టుకు నూనె ఎప్పుడు రాసుకోవాలో కొంతమందికి తెలియదు. తలస్నానం చేసిన తర్వాత లేదా జుట్టు తడిగా ఉన్నప్పుడు నూనె రాయకూడదు. ఇలా చేస్తే జుట్టుకు ఎక్కువగా దుమ్ము అంటుకుంటుంది. అలాగే జుట్టుకు నీరు ఉన్నప్పుడు నూనె రాసుకుంటే…చల్లదనం పెరిగి తలనొప్పి వచ్చే అవకాశం ఉంటుంది.

జుట్టు చివర్లకు మాత్రమే నూనె రాసుకోవడం
నూనెతో తలకు మసాజ్ చేయడం వల్ల రక్త ప్రసరణ మెరుగుపడుతుంది. ఇది జుట్టు రాలడం, చుండ్రును నివారిస్తుంది. అలా కాకుండా జుట్టు చివర్లకు మాత్రమే నూనె రాస్తే…అది ఎలాంటి ప్రభావం చూపదు. అలాగే పొడవాటి జుట్టుకు ఇలా నూనె రాసుకుంటే దుమ్ము త్వరగా అంటుకుని చివర్లు చిట్లిపోతాయి.

జుట్టు సంరక్షణ..
ఎవరో చెప్పారని మార్కెట్లో దొరికే నూనెలన్నీ జుట్టుకు రాసుకోకండి. అందులో ఉండే కెమికల్స్ జుట్టును పాడుచేస్తాయి. అంతేకాకుండా తరచుగా నూనెను మార్చుతుంటారు. అలా ఎప్పుడూ చేయకూడదు. దాని ప్రభావం జుట్టుపై ఎక్కువ కనిపిస్తుంది. స్వచ్చమైన నూనె మార్కెట్లో దొరకడం చాలా కష్టం. ఏవి పడితే అవి జుట్టుకు రాస్తే జుట్టు రాలిపోయే ప్రమాదం ఉంటుంది.