Ukraine: సినిమాలకు, చదువులకు ఒకే కేరాఫ్.. దటీజ్ ఉక్రెయిన్
- By Hashtag U Published Date - 09:34 AM, Sun - 27 February 22
రష్యా-ఉక్రెయిన్ మధ్య యుద్ధం రాగానే ఇండియాలో కలవరం మొదలైంది. ఉక్రెయిన్లో చదువుల కోసం వెళ్లిన భారత విద్యార్ధులు ఏకంగా 23వేల మంది ఉన్నారు. అన్ని వేల మంది తల్లిదండ్రుల గుండెల్లో భయం మొదలైంది. యుద్ధానికి ముందే తట్టాబుట్టా సర్దుకుని కొంత మంది వచ్చేశారు.
ఉక్రెయిన్ లో ఇంకా దాదాపు 18వేల మంది విద్యార్థులు అక్కడే చిక్కుకుపోయారు. ఒకేసారి అంతమందిని తీసుకురావడం కష్టమే అయినా.. కేంద్ర ప్రభుత్వం మాత్రం తనవంతు ప్రయత్నం చేస్తోంది. కాని, ఇక్కడ గమనించాల్సిన అంశం ఒకటుంది. ఉక్రెయిన్లో అన్ని వేల మంది భారతీయ విద్యార్ధులు చదువుతున్నారా అని.
అసలు ఉక్రెయిన్లో ఏముందని అంత దూరం వెళ్లారని ఆరా తీస్తున్నారు. వస్తున్న సమాధానాలు చూస్తుంటే.. అర్రెర్రె అంత మంచి అవకాశం ఇక పోయినట్టేనా? మళ్లీ అలాంటి రోజులు రావా అన్న ఆందోళన కలుగుతుంది. ఇంతకీ, ఉక్రెయిన్లో భారత విద్యార్ధులకు దొరికి అడ్వాంటేజ్ ఏంటి?
ఫారెన్ కంట్రీలో.. అందులోనూ మెడిసిన్ చదువుకునే అవకాశం వస్తే వదులుకుంటారా? ఉక్రెయిన్లో చదువుకునేందుకు పోటీ ప్రధాన కారణం ఇదే. మెడిసిన్ పూర్తి చేస్తే ఫారిన్లో చదువుకున్నాడన్న పేరు వస్తుంది. అందులోనూ ఉక్రెయిన్ కాలేజీలు ఇచ్చే సర్టిఫికెట్లకు ఇండియాలో వాలిడిటీ ఉంది. అంతేకాదు, ప్రపంచంలో ఎక్కడైనా ఉక్రెయిన్ డిగ్రీకి విలువ ఉంది.
ఉక్రెయిన్ కాలేజీలకు వరల్డ్ హెల్త్ ఆర్గనైజేషన్ గుర్తింపు ఉంది. దీంతో ప్రపంచంలో ఎక్కడికి వెళ్లినా ఈ సర్టిఫికెట్ను యాక్సెప్ట్ చేస్తారు. పైగా డాక్టర్ కోర్సు పూర్తి చేసిన వారికి యూరప్లో పర్మినెంట్ రెసిడెంట్ అయ్యే అవకాశాలు చాలా చాలా ఎక్కువ. అందుకే ఉక్రెయిన్ ను ఎక్కువమంది సెలక్ట్ చేసుకుంటారు.
పైగా ఇండియాలో మెడిసిన్ చదవాలంటే ఎంసెట్ అని, నీట్ అని ఇలా పరీక్షలు రాయాలి. అందులో ర్యాంక్ వస్తేనే మెడిసిన్ చదువు. లేదంటే మేనేజ్మెంట్ కోటాలో కొనుక్కోవాలి. ఇప్పుడున్న పరిస్థితుల్లో కోటికి పైనే పెట్టాలి. కాని, ఉక్రెయిన్లో అలా కాదు.. ఏడాదికి ఖర్చులన్నీ కలిపి కేవలం ఓ ఐదారు లక్షల్లో అవుతుందంటారు. ఎక్కువలో ఎక్కువ అర కోటి కన్నా ఎక్కువ ఖర్చు కాదు.
ఖర్కీవ్, సుమీ లాంటి ప్రాంతాల్లో కాస్ట్ ఆఫ్ లివింగ్ కూడా తక్కువేనన్నది అక్కడ చదువుతున్న విద్యార్ధులు చెబుతున్నారు. ఉక్రెయిన్ వెళ్లడానికి ప్రధాన కారణాల్లో ఇదీ ఒకటి. అక్కడ ఓ ఎంట్రన్స్ టెస్ట్ రాస్తే చాలు.. మెడిసిన్లో సీటు వచ్చేస్తుంది. ఇంటర్లో 70 శాతం, 80 శాతం మార్కులు సాధించిన వాళ్లకి ఒక్కోసారి ర్యాంక్ రాకపోవచ్చు.
మార్కులు తక్కువ వచ్చినా సరే.. అలాంటివాళ్లు ఉక్రెయిన్లో ట్రై చేస్తే మాత్రం ఈజీగా పాస్ అయిపోతున్నారు. ఇంత మంచి సౌలభ్యం ఉండడం, తక్కువ ఖర్చుతోనే మెడిసిన్ పూర్తవుతుండడం, పైగా విదేశాల్లో చదువుకున్నాడనే పేరు.. ఇవన్నీ స్పెషల్ యాడ్ ఆన్స్. అందుకే, ఏకంగా 23వేల మంది విద్యార్ధులు ఉక్రెయిన్లో చదువు కోసం వెళ్లారు.
విద్యార్థులకే కాదు సినిమా వాళ్లకు కూడా ఉక్రెయిన్ హాట్ డెస్టినేషన్. రష్యా-ఉక్రెయిన్ యుద్ధం మొదలవగానే రాజమౌళి ట్రిపుల్ఆర్ సినిమా అక్కడే షూటింగ్ జరుపుకుందట అనే వార్త తెగ పాపులర్ అయింది. లిస్ట్ చూస్తే చాలా ఇండియన్ సినిమాలు అక్కడి లొకేషన్లలో షూటింగ్స్ జరుపుకున్నాయి.
ఇంతకీ, ఉక్రెయిన్ స్పెషాలిటీ ఏంటని అడిగితే మొదటగా చెప్పేది అక్కడి భౌగోళిక అందాలు. ఏ దర్శకుడికైనా ముందుగా కావాల్సింది లొకేషన్. డైరెక్టర్ కోణాన్ని ఆవిష్కరించే అద్భుతమైన లొకేషన్స్ ఉక్రెయిన్లో ఉన్నాయి. సినిమా వాళ్లు లొకేషన్ తరువాత చూసేది బడ్జెట్. రిచ్గా కనిపించాలి కాని ఎక్కువ కాస్ట్ అవకూడదు. అలాంటి వాళ్లకి బెస్ట్ డెస్టినేషన్ ఉక్రెయిన్.
సినిమా షూటింగుల కోసమే ఇక్కడ మౌలిక వసతులు, సినిమాకు కావాల్సిన వివిధ విభాగాల సిబ్బందిని తయారుచేస్తున్నారు. ఉక్రెయిన్లో 200లకు పైగా ప్రొడక్షన్ కంపెనీలు, ఫిల్మ్ స్టూడియోలు, పోస్ట్ ప్రొడక్షన్ యూనిట్లు, విజువల్ ఎఫెక్ట్ ఫెసిలిటీస్ ఉన్నాయి. పైగా ఇక్కడే ప్రపంచలోని లార్జెస్ట్ స్టూడియోస్లో ఒకటైన ఫిల్మ్ డాట్ యూఏ కూడా ఉంది.
ఉక్రెయిన్లో ఫారెనర్స్ కూడా చాలా ఎక్కువ మంది ఉంటారు. వీళ్లు షూటింగ్కు ఛార్జ్ చేసేది కూడా తక్కువే. యూరోపియన్ యూనియన్, కెనడా, బ్రిటన్, అమెరికా పౌరులకు వీసా అక్కర్లేదు. మూడు నెలల పాటు స్పెషల్ పర్మిషన్తో ఉక్రెయిన్లో ఉండిపోవచ్చు. పైగా ఉక్రెయిన్ లొకేషన్లలో షూటింగ్ జరుపుకునే వారికి 30 శాతం రిబేట్ కూడా ఇస్తున్నారు.
ఇక ట్రాన్స్ పోర్టేషన్ పరంగానూ మెరుగ్గా ఉంటుంది. రాజధాని కీవ్లో రెండు ఇంటర్నేషనల్ ఎయిర్ పోర్ట్స్ ఉన్నాయి. ఇక్కడి నుంచి దేశంలోని అన్ని ప్రాంతాలకు సులువుగా చేరుకునే అవకాశాలున్నాయి. ఉక్రెయిన్లో వాతావరణం కూడా చాలా అనుకూలంగా ఉంటుంది. శీతాకాలంలో మైనస్ 20 డిగ్రీలు చలి ఉంటుంది. మిగతా కాలాల్లో అంతగా చలి ఉండదు. ఇన్ని సౌలభ్యాలు ఉన్న కారణంగానే సినిమా షూటింగులకు వస్తుంటారు. కేవలం ఇండియన్సే కాదు హాలీవుడ్ సినిమాలు కూడా ఇక్కడ షూటింగ్స్ జరుపుకుంటుంటాయి.
Related News
Russia-Ukraine War: రష్యా-ఉక్రెయిన్ యుద్ధంలో హ్యారీ పోటర్ కోట ధ్వంసం
హ్యారీ పోటర్ సిరీస్ లో ఓ భారీ కోట అందరికి తెలిసే ఉంటుంది. ఆ భవనం ఉక్రెయిన్లోని ఒడెస్సా నగరంలో ఉంది. ఇప్పుడు ఇది రష్యా-ఉక్రెయిన్ యుద్ధంలో భాగంగా నాశనం అయింది. ఈ విద్యా సంస్థ భవనంపై రష్యన్ క్షిపణి దాడి చేసింది.