Parliament Winter Session: పార్లమెంట్ శీతాకాల సమావేశాల షెడ్యూల్ ఖరారు!

Parliament Winter Session: దేశ రాజకీయాలకు అత్యంత కీలకమైన పార్లమెంట్ శీతాకాల సమావేశాలు (Parliament Winter Session) త్వరలో ప్రారంభం కానున్నాయి. అందిన సమాచారం ప్రకారం.. ఈ సమావేశాలు నవంబర్ 24 లేదా 25 నుండి ప్రారంభమై.. డిసెంబర్ 19, 2025 వరకు కొనసాగే అవకాశం ఉంది. ఈ సమావేశాల కాలంలో కేంద్ర ప్రభుత్వం పలు ముఖ్యమైన బిల్లులను ఆమోదించుకోవడానికి సిద్ధమవుతోంది.

సాధారణంగా పార్లమెంట్ సమావేశాలలో శీతాకాల సమావేశం అత్యంత కీలకంగా పరిగణించబడుతుంది. ఈసారి కూడా దేశవ్యాప్తంగా చర్చనీయాంశమైన అనేక ముఖ్యమైన అంశాలు ఉభయ సభల్లో చర్చకు రానున్నాయి. కీలకమైన శాసనపరమైన అజెండాను పూర్తి చేయాలని అధికార పక్షం భావిస్తుండగా, ప్రతిపక్షాలు వివిధ ప్రజా సమస్యలపై ప్రభుత్వాన్ని నిలదీయడానికి సన్నద్ధమవుతున్నాయి.

Also Read: World Expensive Cars: ప్రపంచంలోని 5 అత్యంత ఖరీదైన లగ్జరీ కార్లు ఇవే.. ధ‌ర రూ. 250 కోట్లు!

ప్రభుత్వ అజెండాలో కీలక బిల్లులు

కేంద్ర ప్రభుత్వం ఈ శీతాకాల సమావేశాల్లో అనేక కీలక బిల్లులను ప్రవేశపెట్టి ఆమోదం పొందాలని లక్ష్యంగా పెట్టుకుంది. ముఖ్యంగా గత కొంతకాలంగా దేశంలో తీవ్ర చర్చకు దారితీస్తున్న ‘ఒకే దేశం, ఒకే ఎన్నిక’ బిల్లు, అలాగే వక్ఫ్ బోర్డు సవరణ బిల్లు వంటి వాటిని సభ ముందు ఉంచే అవకాశాలు మెండుగా ఉన్నాయి. ఈ బిల్లులు దేశ భవిష్యత్తుపై ప్రభావం చూపే అవకాశం ఉన్నందున వీటిపై వాడివేడిగా చర్చ జరిగే అవకాశం ఉంది.

నవంబర్ 26, 2025న ‘రాజ్యాంగ దినోత్సవం’ సందర్భంగా భారత రాజ్యాంగాన్ని ఆమోదించి 75 సంవత్సరాలు పూర్తవుతున్న సందర్భంగా ఉభయ సభల సభ్యులు ‘సంవిధాన్ సదన్’ (పాత పార్లమెంట్ భవనం)లోని సెంట్రల్ హాల్‌లో ప్రత్యేకంగా సమావేశమయ్యే అవకాశం ఉంది.

ప్రతిపక్షాల వ్యూహం

ప్రతిపక్ష పార్టీలు దేశంలో పెరుగుతున్న ద్రవ్యోల్బణం, నిరుద్యోగం, రైతుల సమస్యలు వంటి అంశాలను ప్రధానంగా లేవనెత్తాలని నిర్ణయించుకున్నాయి. ముఖ్యంగా ‘ఒకే దేశం, ఒకే ఎన్నిక’ వంటి కీలక బిల్లులపై తమ వ్యతిరేకతను బలంగా వినిపించడానికి ప్రతిపక్షాలు సన్నద్ధమవుతున్నాయి. సమావేశాలు సజావుగా సాగడానికి ప్రతిపక్ష పార్టీలు సహకరించాలని ప్రభుత్వం కోరుకుంటున్నప్పటికీ.. కీలక అంశాలపై ఉభయ సభల్లో పదేపదే అంతరాయాలు ఏర్పడే అవకాశం ఉంది.